អបរគាថាសង្គណិកំ
១. ចោទនាទិបុច្ឆាវិស្សជ្ជនា
៣៥៩.
ចោទនា កិមត្ថាយ, សារណា កិស្ស ការណា;
សង្ឃោ កិមត្ថាយ, មតិកម្មំ បន កិស្ស ការណា។
ចោទនា សារណត្ថាយ, និគ្គហត្ថាយ សារណា;
សង្ឃោ បរិគ្គហត្ថាយ, មតិកម្មំ បន បាដិយេក្កំ។
មា ខោ តុរិតោ អភណិ, មា ខោ ចណ្ឌិកតោ ភណិ;
មា ខោ បដិឃំ ជនយិ, សចេ អនុវិជ្ជកោ តុវំ។
មា ខោ សហសា អភណិ, កថំ វិគ្គាហិកំ អនត្ថសំហិតំ;
សុត្តេ វិនយេ អនុលោមេ, បញ្ញត្តេ អនុលោមិកេ។
អនុយោគវត្តំ និសាមយ, កុសលេន ពុទ្ធិមតា កតំ;
សុវុត្តំ សិក្ខាបទានុលោមិកំ, គតិំ ន នាសេន្តោ សម្បរាយិកំ;
ហិតេសី អនុយុញ្ជស្សុ, កាលេនត្ថូបសំហិតំ។
ចុទិតស្ស ច ចោទកស្ស ច;
សហសា វោហារំ មា បធារេសិ;
ចោទកោ អាហ អាបន្នោតិ;
ចុទិតកោ អាហ អនាបន្នោតិ។
ឧភោ អនុក្ខិបន្តោ, បដិញ្ញានុសន្ធិតេន ការយេ;
បដិញ្ញា លជ្ជីសុ កតា, អលជ្ជីសុ ឯវំ ន វិជ្ជតិ;
ពហុម្បិ អលជ្ជី ភាសេយ្យ, វត្តានុសន្ធិតេន វុត្តានុសន្ធិតេន (សី. ស្យា. ក.) ការយេ។
អលជ្ជី កីទិសោ ហោតិ, បដិញ្ញា យស្ស ន រូហតិ;
ឯតញ្ច ឯវញ្ច (ក.) តាហំ បុច្ឆាមិ, កីទិសោ វុច្ចតិ អលជ្ជី បុគ្គលោ។
សញ្ចិច្ច អាបត្តិំ អាបជ្ជតិ, អាបត្តិំ បរិគូហតិ;
អគតិគមនញ្ច គច្ឆតិ, ឯទិសោ វុច្ចតិ អលជ្ជីបុគ្គលោ។
សច្ចំ អហម្បិ ជានាមិ, ឯទិសោ វុច្ចតិ អលជ្ជីបុគ្គលោ;
អញ្ញញ្ច តាហំ បុច្ឆាមិ, កីទិសោ វុច្ចតិ លជ្ជីបុគ្គលោ។
សញ្ចិច្ច អាបត្តិំ នាបជ្ជតិ, អាបត្តិំ ន បរិគូហតិ;
អគតិគមនំ ន គច្ឆតិ, ឯទិសោ វុច្ចតិ លជ្ជីបុគ្គលោ។
សច្ចំ អហម្បិ ជានាមិ, ឯទិសោ វុច្ចតិ លជ្ជីបុគ្គលោ;
អញ្ញញ្ច តាហំ បុច្ឆាមិ, កីទិសោ វុច្ចតិ អធម្មចោទកោ។
អកាលេ ចោទេតិ អភូតេន;
ផរុសេន អនត្ថសំហិតេន;
ទោសន្តរោ ចោទេតិ នោ មេត្តាចិត្តោ;
ឯទិសោ វុច្ចតិ អធម្មចោទកោ។
សច្ចំ អហម្បិ ជានាមិ, ឯទិសោ វុច្ចតិ អធម្មចោទកោ;
អញ្ញញ្ច តាហំ បុច្ឆាមិ, កីទិសោ វុច្ចតិ ធម្មចោទកោ។
កាលេន ចោទេតិ ភូតេន, សណ្ហេន អត្ថសំហិតេន;
មេត្តាចិត្តោ ចោទេតិ នោ ទោសន្តរោ;
ឯទិសោ វុច្ចតិ ធម្មចោទកោ។
សច្ចំ អហម្បិ ជានាមិ, ឯទិសោ វុច្ចតិ ធម្មចោទកោ;
អញ្ញញ្ច តាហំ បុច្ឆាមិ, កីទិសោ វុច្ចតិ ពាលចោទកោ។
បុព្ពាបរំ ន ជានាតិ, បុព្ពាបរស្ស អកោវិទោ;
អនុសន្ធិវចនបថំ ន ជានាតិ;
អនុសន្ធិវចនបថស្ស អកោវិទោ;
ឯទិសោ វុច្ចតិ ពាលចោទកោ។
សច្ចំ អហម្បិ ជានាមិ, ឯទិសោ វុច្ចតិ ពាលចោទកោ;
អញ្ញញ្ច តាហំ បុច្ឆាមិ, កីទិសោ វុច្ចតិ បណ្ឌិតចោទកោ។
បុព្ពាបរម្បិ ជានាតិ, បុព្ពាបរស្ស កោវិទោ;
អនុសន្ធិវចនបថំ ជានាតិ, អនុសន្ធិវចនបថស្ស កោវិទោ;
ឯទិសោ វុច្ចតិ បណ្ឌិតចោទកោ។
សច្ចំ អហម្បិ ជានាមិ, ឯទិសោ វុច្ចតិ បណ្ឌិតចោទកោ;
អញ្ញញ្ច តាហំ បុច្ឆាមិ, ចោទនា កិន្តិ វុច្ចតិ។
សីលវិបត្តិយា ចោទេតិ, អថោ អាចារទិដ្ឋិយា;
អាជីវេនបិ ចោទេតិ, ចោទនា តេន វុច្ចតីតិ។
អបរំ គាថាសង្គណិកំ និដ្ឋិតំ។