ឧបោសថាទិបុច្ឆាវិស្សជ្ជនា
អាទិមជ្ឈន្តបុច្ឆនំ
៣៣២. ឧបោសថកម្មស្ស កោ អាទិ, កិំ មជ្ឈេ, កិំ បរិយោសានំ? បវារណាកម្មស្ស កោ អាទិ, កិំ មជ្ឈេ, កិំ បរិយោសានំ? តជ្ជនីយកម្មស្ស កោ អាទិ, កិំ មជ្ឈេ, កិំ បរិយោសានំ? និយស្សកម្មស្ស…បេ.… បព្ពាជនីយកម្មស្ស…បេ.… បដិសារណីយកម្មស្ស…បេ.… ឧក្ខេបនីយកម្មស្ស…បេ.… បរិវាសទានស្ស…បេ.… មូលាយបដិកស្សនាយ…បេ.… មានត្តទានស្ស…បេ.… អព្ភានស្ស…បេ.… ឧបសម្បទាកម្មស្ស កោ អាទិ, កិំ មជ្ឈេ, កិំ បរិយោសានំ? តជ្ជនីយកម្មស្ស បដិប្បស្សទ្ធិយា កោ អាទិ, កិំ មជ្ឈេ, កិំ បរិយោសានំ? និយស្សកម្មស្ស បដិប្បស្សទ្ធិយា កោ អាទិ, កិំ មជ្ឈេ, កិំ បរិយោសានំ? បព្ពាជនីយកម្មស្ស បដិប្បស្សទ្ធិយា កោ អាទិ, កិំ មជ្ឈេ, កិំ បរិយោសានំ? បដិសារណីយកម្មស្ស បដិប្បស្សទ្ធិយា កោ អាទិ, កិំ មជ្ឈេ, កិំ បរិយោសានំ? ឧក្ខេបនីយកម្មស្ស បដិប្បស្សទ្ធិយា កោ អាទិ, កិំ មជ្ឈេ, កិំ បរិយោសានំ? សតិវិនយស្ស កោ អាទិ, កិំ មជ្ជេ, កិំ បរិយោសានំ? អមូឡ្ហវិនយស្ស កោ អាទិ, កិំ មជ្ឈេ, កិំ បរិយោសានំ? តស្សបាបិយសិកាយ កោ អាទិ, កិំ មជ្ឈេ, កិំ បរិយោសានំ? តិណវត្ថារកស្ស កោ អាទិ, កិំ មជ្ឈេ, កិំ បរិយោសានំ? ភិក្ខុនោវាទកសម្មុតិយា កោ អាទិ, កិំ មជ្ឈេ, កិំ បរិយោសានំ? តិចីវរេន អវិប្បវាសសម្មុតិយា កោ អាទិ, កិំ មជ្ឈេ, កិំ បរិយោសានំ? សន្ថតសម្មុតិយា កោ អាទិ, កិំ មជ្ឈេ, កិំ បរិយោសានំ? រូបិយឆឌ្ឌកសម្មុតិយា កោ អាទិ, កិំ មជ្ឈេ, កិំ បរិយោសានំ? សាដិយគ្គាហាបកសម្មុតិយោ កោ អាទិ, កិំ មជ្ឈេ, កិំ បរិយោសានំ? បត្តគ្គាហាបកសម្មុតិយា កោ អាទិ, កិំ មជ្ឈេ, កិំ បរិយោសានំ? ទណ្ឌសម្មុតិយា កោ អាទិ, កិំ មជ្ឈេ, កិំ បរិយោសានំ? សិក្កាសម្មុតិយា កោ អាទិ, កិំ មជ្ឈេ, កិំ បរិយោសានំ? ទណ្ឌសិក្កាសម្មុតិយា កោ អាទិ, កិំ មជ្ឈេ, កិំ បរិយោសានំ?
អាទិមជ្ឈន្តវិស្សជ្ជនា
៣៣៣. ឧបោសថកម្មស្ស កោ អាទិ, កិំ មជ្ឈេ, កិំ បរិយោសានន្តិ? ឧបោសថកម្មស្ស សាមគ្គី អាទិ, កិរិយា មជ្ឈេ, និដ្ឋានំ បរិយោសានំ។
បវារណាកម្មស្ស កោ អាទិ, កិំ មជ្ឈេ, កិំ បរិយោសានន្តិ? បវារណាកម្មស្ស សាមគ្គី អាទិ, កិរិយា មជ្ឈេ, និដ្ឋានំ បរិយោសានំ។
តជ្ជនីយកម្មស្ស កោ អាទិ, កិំ មជ្ឈេ, កិំ បរិយោសានន្តិ? តជ្ជនីយកម្មស្ស វត្ថុ ច បុគ្គលោ ច អាទិ, ញត្តិ មជ្ឈេ, កម្មវាចា បរិយោសានំ។
និយស្សកម្មស្ស…បេ.… បព្ពាជនីយកម្មស្ស…បេ.… បដិសារណីយកម្មស្ស…បេ.… ឧក្ខេបនីយកម្មស្ស…បេ.… បរិវាសទានស្ស…បេ.… មូលាយបដិកស្សនាយ…បេ.… មានត្តទានស្ស…បេ.… អព្ភានស្ស កោ អាទិ, កិំ មជ្ឈេ, កិំ បរិយោសានន្តិ? អព្ភានស្ស វត្ថុ ច បុគ្គលោ ច អាទិ, ញត្តិ មជ្ឈេ, កម្មវាចា បរិយោសានំ។
ឧបសម្បទាកម្មស្ស កោ អាទិ, កិំ មជ្ឈេ, កិំ បរិយោសានន្តិ? ឧបសម្បទាកម្មស្ស បុគ្គលោ អាទិ, ញត្តិ មជ្ឈេ, កម្មវាចា បរិយោសានំ។
តជ្ជនីយកម្មស្ស បដិប្បស្សទ្ធិយា កោ អាទិ, កិំ មជ្ឈេ, កិំ បរិយោសានន្តិ? តជ្ជនីយកម្មស្ស បដិប្បស្សទ្ធិយា សម្មាវត្តនា អាទិ, ញត្តិ មជ្ឈេ, កម្មវាចា បរិយោសានំ។
និយស្សកម្មស្ស…បេ.… បព្ពាជនីយកម្មស្ស…បេ.… បដិសារណីយកម្មស្ស…បេ.… ឧក្ខេបនីយកម្មស្ស បដិប្បស្សទ្ធិយា កោ អាទិ, កិំ មជ្ឈេ, កិំ បរិយោសានន្តិ? ឧក្ខេបនីយកម្មស្ស បដិប្បស្សទ្ធិយា សម្មាវត្តនា អាទិ, ញត្តិ មជ្ឈេ, កម្មវាចា បរិយោសានំ។
សតិវិនយស្ស កោ អាទិ , កិំ មជ្ឈេ, កិំ បរិយោសានន្តិ? សតិវិនយស្ស វត្ថុ ច បុគ្គលោ ច អាទិ, ញត្តិ មជ្ឈេ, កម្មវាចា បរិយោសានំ។
អមូឡ្ហវិនយស្ស …បេ.… តស្សបាបិយសិកាយ…បេ.… តិណវត្ថារកស្ស…បេ.… ភិក្ខុនោវាទកសម្មុតិយា…បេ.… តិចីវរេន អវិប្បវាសសម្មុតិយា…បេ.… សន្ថតសម្មុតិយា…បេ.… រូបិយឆឌ្ឌកសម្មុតិយា…បេ.… សាដិយគ្គាហាបកសម្មុតិយា…បេ.… បត្តគ្គាហាបកសម្មុតិយា…បេ.… ទណ្ឌសម្មុតិយា…បេ.… សិក្កាសម្មុតិយា…បេ.… ទណ្ឌសិក្កាសម្មុតិយា កោ អាទិ, កិំ មជ្ឈេ, កិំ បរិយោសានន្តិ? ទណ្ឌសិក្កាសម្មុតិយា វត្ថុ ច បុគ្គលោ ច អាទិ, ញត្តិ មជ្ឈេ, កម្មវាចា បរិយោសានំ។
ឧបោសថាទិបុច្ឆាវិស្សជ្ជនា និដ្ឋិតា។
អត្ថវសបករណំ
៣៣៤. អ. និ. ១០.៣៣៤; បរិ. ២២ ទស អត្ថវសេ បដិច្ច តថាគតេន សាវកានំ សិក្ខាបទំ បញ្ញត្តំ – សង្ឃសុដ្ឋុតាយ, សង្ឃផាសុតាយ, ទុម្មង្កូនំ បុគ្គលានំ និគ្គហាយ, បេសលានំ ភិក្ខូនំ ផាសុវិហារាយ, ទិដ្ឋធម្មិកានំ អាសវានំ សំវរាយ, សម្បរាយិកានំ អាសវានំ បដិឃាតាយ, អប្បសន្នានំ បសាទាយ, បសន្នានំ ភិយ្យោភាវាយ, សទ្ធម្មដ្ឋិតិយា វិនយានុគ្គហាយ។
យំ សង្ឃសុដ្ឋុ តំ សង្ឃផាសុ។ យំ សង្ឃផាសុ តំ ទុម្មង្កូនំ បុគ្គលានំ និគ្គហាយ។ យំ ទុម្មង្កូនំ បុគ្គលានំ និគ្គហាយ តំ បេសលានំ ភិក្ខូនំ ផាសុវិហារាយ។ យំ បេសលានំ ភិក្ខូនំ ផាសុវិហារាយ តំ ទិដ្ឋធម្មិកានំ អាសវានំ សំវរាយ។ យំ ទិដ្ឋធម្មិកានំ អាសវានំ សំវរាយ តំ សម្បរាយិកានំ អាសវានំ បដិឃាតាយ។ យំ សម្បរាយិកានំ អាសវានំ បដិឃាតាយ តំ អប្បសន្នានំ បសាទាយ។ យំ អប្បសន្នានំ បសាទាយ តំ បសន្នានំ ភិយ្យោភាវាយ។ យំ បសន្នានំ ភិយ្យោភាវាយ តំ សទ្ធម្មដ្ឋិតិយា។ យំ សទ្ធម្មដ្ឋិតិយា តំ វិនយានុគ្គហាយ។
យំ សង្ឃសុដ្ឋុ តំ សង្ឃផាសុ។ យំ សង្ឃសុដ្ឋុ តំ ទុម្មង្កូនំ បុគ្គលានំ និគ្គហាយ។ យំ សង្ឃសុដ្ឋុ តំ បេសលានំ ភិក្ខូនំ ផាសុវិហារាយ។ យំ សង្ឃសុដ្ឋុ តំ ទិដ្ឋធម្មិកានំ អាសវានំ សំវរាយ។ យំ សង្ឃសុដ្ឋុ តំ សម្បរាយិកានំ អាសវានំ បដិឃាតាយ។ យំ សង្ឃសុដ្ឋុ តំ អប្បសន្នានំ បសាទាយ។ យំ សង្ឃសុដ្ឋុ តំ បសន្នានំ ភិយ្យោភាវាយ។ យំ សង្ឃសុដ្ឋុ តំ សទ្ធម្មដ្ឋិតិយា។ យំ សង្ឃសុដ្ឋុ តំ វិនយានុគ្គហាយ។
យំ សង្ឃផាសុ តំ ទុម្មង្កូនំ បុគ្គលានំ និគ្គហាយ។ យំ សង្ឃផាសុ តំ បេសលានំ ភិក្ខូនំ ផាសុវិហារាយ ។ យំ សង្ឃផាសុ តំ ទិដ្ឋធម្មិកានំ អាសវានំ សំវរាយ។ យំ សង្ឃផាសុ តំ សម្បរាយិកានំ អាសវានំ បដិឃាតាយ។ យំ សង្ឃផាសុ តំ អប្បសន្នានំ បសាទាយ។ យំ សង្ឃផាសុ តំ បសន្នានំ ភិយ្យោភាវាយ។ យំ សង្ឃផាសុ តំ សទ្ធម្មដ្ឋិតិយា។ យំ សង្ឃផាសុ តំ វិនយានុគ្គហាយ។ យំ សង្ឃផាសុ តំ សង្ឃសុដ្ឋុ។
យំ ទុម្មង្កូនំ បុគ្គលានំ និគ្គហាយ…បេ.… យំ បេសលានំ ភិក្ខូនំ ផាសុវិហារាយ… យំ ទិដ្ឋធម្មិកានំ អាសវានំ សំវរាយ… យំ សម្បរាយិកានំ អាសវានំ បដិឃាតាយ… យំ អប្បសន្នានំ បសាទាយ… យំ បសន្នានំ ភិយ្យោភាវាយ… យំ សទ្ធម្មដ្ឋិតិយា… យំ វិនយានុគ្គហាយ តំ សង្ឃសុដ្ឋុ។ យំ វិនយានុគ្គហាយ តំ សង្ឃផាសុ។ យំ វិនយានុគ្គហាយ តំ ទុម្មង្កូនំ បុគ្គលានំ និគ្គហាយ។ យំ វិនយានុគ្គហាយ តំ បេសលានំ ភិក្ខូនំ ផាសុវិហារាយ។ យំ វិនយានុគ្គហាយ តំ ទិដ្ឋធម្មិកានំ អាសវានំ សំវរាយ។ យំ វិនយានុគ្គហាយ តំ សម្បរាយិកានំ អាសវានំ បដិឃាតាយ។ យំ វិនយានុគ្គហាយ តំ អប្បសន្នានំ បសាទាយ។ យំ វិនយានុគ្គហាយ តំ បសន្នានំ ភិយ្យោភាវាយ។ យំ វិនយានុគ្គហាយ តំ សទ្ធម្មដ្ឋិតិយាតិ។
អត្ថសតំ ធម្មសតំ, ទ្វេ ច និរុត្តិសតានិ;
ចត្តារិ ញាណសតានិ, អត្ថវសេ បករណេតិ។
អត្ថវសបករណំ និដ្ឋិតំ។
មហាវគ្គោ និដ្ឋិតោ។
តស្សុទ្ទានំ –
បឋមំ អដ្ឋបុច្ឆាយំ, បច្ចយេសុ បុនដ្ឋ ច;
ភិក្ខូនំ សោឡស ឯតេ, ភិក្ខុនីនញ្ច សោឡស។
បេយ្យាលអន្តរា ភេទា, ឯកុត្តរិកមេវ ច;
បវារណត្ថវសិកា, មហាវគ្គស្ស សង្គហោតិ។
អត្ថវសបករណំ និដ្ឋិតំ។