សេទមោចនគាថា

សេទមោចនគាថា

១. អវិប្បវាសបញ្ហា

៤៧៩.

អសំវាសោ ភិក្ខូហិ ច ភិក្ខុនីហិ ច;

សម្ភោគោ ឯកច្ចោ តហិំ ន លព្ភតិ;

អវិប្បវាសេន អនាបត្តិ;

បញ្ហា មេសា កុសលេហិ ចិន្តិតា។

អវិស្សជ្ជិយំ អវេភង្គិយំ;

បញ្ច វុត្តា មហេសិនា;

វិស្សជ្ជន្តស្ស បរិភុញ្ជន្តស្ស អនាបត្តិ;

បញ្ហា មេសា កុសលេហិ ចិន្តិតា។

ទស បុគ្គលេ ន វទាមិ, ឯកាទស វិវជ្ជិយ;

វុឌ្ឍំ វន្ទន្តស្ស អាបត្តិ, បញ្ហា មេសា កុសលេហិ ចិន្តិតា។

ន ឧក្ខិត្តកោ ន ច បន បារិវាសិកោ;

ន សង្ឃភិន្នោ ន ច បន បក្ខសង្កន្តោ;

សមានសំវាសកភូមិយា ឋិតោ;

កថំ នុ សិក្ខាយ អសាធារណោ សិយា;

បញ្ហា មេសា កុសលេហិ ចិន្តិតា។

ឧបេតិ ធម្មំ បរិបុច្ឆមានោ, កុសលំ អត្ថូបសញ្ហិតំ;

ន ជីវតិ ន មតោ ន និព្ពុតោ, តំ បុគ្គលំ កតមំ វទន្តិ ពុទ្ធា;

បញ្ហា មេសា កុសលេហិ ចិន្តិតា។

ឧព្ភក្ខកេ ន វទាមិ, អធោ នាភិំ វិវជ្ជិយ;

មេថុនធម្មបច្ចយា, កថំ បារាជិកោ សិយា;

បញ្ហា មេសា កុសលេហិ ចិន្តិតា។

ភិក្ខុ សញ្ញាចិកាយ កុដិំ ករោតិ;

អទេសិតវត្ថុកំ បមាណាតិក្កន្តំ;

សារម្ភំ អបរិក្កមនំ អនាបត្តិ;

បញ្ហា មេសា កុសលេហិ ចិន្តិតា។

ភិក្ខុ សញ្ញាចិកាយ កុដិំ ករោតិ;

ទេសិតវត្ថុកំ បមាណិកំ;

អនារម្ភំ សបរិក្កមនំ អាបត្តិ;

បញ្ហា មេសា កុសលេហិ ចិន្តិតា។

ន កាយិកំ កិញ្ចិ បយោគមាចរេ;

ន ចាបិ វាចាយ បរេ ភណេយ្យ;

អាបជ្ជេយ្យ គរុកំ ឆេជ្ជវត្ថុំ;

បញ្ហា មេសា កុសលេហិ ចិន្តិតា។

ន កាយិកំ វាចសិកញ្ច កិញ្ចិ;

មនសាបិ សន្តោ ន ករេយ្យ បាបំ;

សោ នាសិតោ កិន្តិ សុនាសិតោ ភវេ;

បញ្ហា មេសា កុសលេហិ ចិន្តិតា។

អនាលបន្តោ មនុជេន កេនចិ;

វាចាគិរំ នោ ច បរេ ភណេយ្យ;

អាបជ្ជេយ្យ វាចសិកំ ន កាយិកំ;

បញ្ហា មេសា កុសលេហិ ចិន្តិតា។

សិក្ខាបទា ពុទ្ធវរេន វណ្ណិតា;

សង្ឃាទិសេសា ចតុរោ ភវេយ្យុំ;

អាបជ្ជេយ្យ ឯកបយោគេន សព្ពេ;

បញ្ហា មេសា កុសលេហិ ចិន្តិតា។

ឧភោ ឯកតោ ឧបសម្បន្នា;

ឧភិន្នំ ហត្ថតោ ចីវរំ បដិគ្គណ្ហេយ្យ;

សិយា អាបត្តិយោ នានា;

បញ្ហា មេសា កុសលេហិ ចិន្តិតា។

ចតុរោ ជនា សំវិធាយ;

គរុភណ្ឌំ អវាហរុំ;

តយោ បារាជិកា ឯកោ ន បារាជិកោ;

បញ្ហា មេសា កុសលេហិ ចិន្តិតា។

២. បារាជិកាទិបញ្ហា

៤៨០.

ឥត្ថី ច អព្ភន្តរេ សិយា,

ភិក្ខុ ច ពហិទ្ធា សិយា;

ឆិទ្ទំ តស្មិំ ឃរេ នត្ថិ;

មេថុនធម្មបច្ចយា;

កថំ បារាជិកោ សិយា;

បញ្ហា មេសា កុសលេហិ ចិន្តិតា។

តេលំ មធុំ ផាណិតញ្ចាបិ សប្បិំ;

សាមំ គហេត្វាន និក្ខិបេយ្យ;

អវីតិវត្តេ សត្តាហេ;

សតិ បច្ចយេ បរិភុញ្ជន្តស្ស អាបត្តិ;

បញ្ហា មេសា កុសលេហិ ចិន្តិតា។

និស្សគ្គិយេន អាបត្តិ;

សុទ្ធកេន បាចិត្តិយំ;

អាបជ្ជន្តស្ស ឯកតោ;

បញ្ហា មេសា កុសលេហិ ចិន្តិតា។

ភិក្ខូ សិយា វីសតិយា សមាគតា;

កម្មំ ករេយ្យុំ សមគ្គសញ្ញិនោ;

ភិក្ខុ សិយា ទ្វាទសយោជនេ ឋិតោ;

កម្មញ្ច តំ កុប្បេយ្យ វគ្គបច្ចយា;

បញ្ហា មេសា កុសលេហិ ចិន្តិតា។

បទវីតិហារមត្តេន វាចាយ ភណិតេន ច;

សព្ពានិ គរុកានិ សប្បដិកម្មានិ;

ចតុសដ្ឋិ អាបត្តិយោ អាបជ្ជេយ្យ ឯកតោ;

បញ្ហា មេសា កុសលេហិ ចិន្តិតា។

និវត្ថោ អន្តរវាសកេន;

ទិគុណំ សង្ឃាដិំ បារុតោ;

សព្ពានិ តានិ និស្សគ្គិយានិ ហោន្តិ;

បញ្ហា មេសា កុសលេហិ ចិន្តិតា។

ន ចាបិ ញត្តិ ន ច បន កម្មវាចា;

ន ចេហិ ភិក្ខូតិ ជិនោ អវោច;

សរណគមនម្បិ ន តស្ស អត្ថិ;

ឧបសម្បទា ចស្ស អកុប្បា;

បញ្ហា មេសា កុសលេហិ ចិន្តិតា។

ឥត្ថិំ ហនេ ន មាតរំ, បុរិសញ្ច ន បិតរំ ហនេ;

ហនេយ្យ អនរិយំ មន្ទោ, តេន ចានន្តរំ ផុសេ;

បញ្ហា មេសា កុសលេហិ ចិន្តិតា។

ឥត្ថិំ ហនេ ច មាតរំ, បុរិសញ្ច បិតរំ ហនេ;

មាតរំ បិតរំ ហន្ត្វា, ន តេនានន្តរំ ផុសេ;

បញ្ហា មេសា កុសលេហិ ចិន្តិតា។

អចោទយិត្វា អស្សារយិត្វា;

អសម្មុខីភូតស្ស ករេយ្យ កម្មំ;

កតញ្ច កម្មំ សុកតំ ភវេយ្យ;

ការកោ ច សង្ឃោ អនាបត្តិកោ សិយា;

បញ្ហា មេសា កុសលេហិ ចិន្តិតា។

ចោទយិត្វា សារយិត្វា;

សម្មុខីភូតស្ស ករេយ្យ កម្មំ;

កតញ្ច កម្មំ អកតំ ភវេយ្យ;

ការកោ ច សង្ឃោ សាបត្តិកោ សិយា;

បញ្ហា មេសា កុសលេហិ ចិន្តិតា។

ឆិន្ទន្តស្ស អាបត្តិ, ឆិន្ទន្តស្ស អនាបត្តិ;

ឆាទេន្តស្ស អាបត្តិ, ឆាទេន្តស្ស អនាបត្តិ;

បញ្ហា មេសា កុសលេហិ ចិន្តិតា។

សច្ចំ ភណន្តោ គរុកំ, មុសា ច លហុ ភាសតោ;

មុសា ភណន្តោ គរុកំ, សច្ចញ្ច លហុ ភាសតោ;

បញ្ហា មេសា កុសលេហិ ចិន្តិតា។

៣. បាចិត្តិយាទិបញ្ហា

៤៨១.

អធិដ្ឋិតំ រជនាយ រត្តំ;

កប្បកតម្បិ សន្តំ;

បរិភុញ្ជន្តស្ស អាបត្តិ;

បញ្ហា មេសា កុសលេហិ ចិន្តិតា។

អត្ថង្គតេ សូរិយេ ភិក្ខុ មំសានិ ខាទតិ;

ន ឧម្មត្តកោ ន ច បន ខិត្តចិត្តោ;

ន ចាបិ សោ វេទនាដ្ដោ ភវេយ្យ;

ន ចស្ស ហោតិ អាបត្តិ;

សោ ច ធម្មោ សុគតេន ទេសិតោ;

បញ្ហា មេសា កុសលេហិ ចិន្តិតា។

ន រត្តចិត្តោ ន ច បន ថេយ្យចិត្តោ;

ន ចាបិ សោ បរំ មរណាយ ចេតយិ;

សលាកំ ទេន្តស្ស ហោតិ ឆេជ្ជំ;

បដិគ្គណ្ហន្តស្ស ថុល្លច្ចយំ;

បញ្ហា មេសា កុសលេហិ ចិន្តិតា។

ន ចាបិ អារញ្ញកំ សាសង្កសម្មតំ;

ន ចាបិ សង្ឃេន សម្មុតិ ទិន្នា;

ន ចស្ស កថិនំ អត្ថតំ តត្ថេវ;

ចីវរំ និក្ខិបិត្វា គច្ឆេយ្យ អឌ្ឍយោជនំ;

តត្ថេវ អរុណំ ឧគ្គច្ឆន្តស្ស អនាបត្តិ;

បញ្ហា មេសា កុសលេហិ ចិន្តិតា។

កាយិកានិ ន វាចសិកានិ;

សព្ពានិ នានាវត្ថុកានិ;

អបុព្ពំ អចរិមំ អាបជ្ជេយ្យ ឯកតោ;

បញ្ហា មេសា កុសលេហិ ចិន្តិតា។

វាចសិកានិ ន កាយិកានិ;

សព្ពានិ នានាវត្ថុកានិ;

អបុព្ពំ អចរិមំ អាបជ្ជេយ្យ ឯកតោ;

បញ្ហា មេសា កុសលេហិ ចិន្តិតា។

តិស្សិត្ថិយោ មេថុនំ តំ ន សេវេ;

តយោ បុរិសេ តយោ អនរិយបណ្ឌកេ;

ន ចាចរេ មេថុនំ ព្យញ្ជនស្មិំ;

ឆេជ្ជំ សិយា មេថុនធម្មបច្ចយា;

បញ្ហា មេសា កុសលេហិ ចិន្តិតា។

មាតរំ ចីវរំ យាចេ, នោ ច សង្ឃេ នោ សំឃស្ស (ក.), នោ ច សំឃស្ស (ស្យា.), នោ ចេ សំឃស្ស (សី.) បរិណតំ;

កេនស្ស ហោតិ អាបត្តិ, អនាបត្តិ ច ញាតកេ;

បញ្ហា មេសា កុសលេហិ ចិន្តិតា។

កុទ្ធោ អារាធកោ ហោតិ, កុទ្ធោ ហោតិ គរហិយោ;

អថ កោ នាម សោ ធម្មោ, យេន កុទ្ធោ បសំសិយោ;

បញ្ហា មេសា កុសលេហិ ចិន្តិតា។

តុដ្ឋោ អារាធកោ ហោតិ, តុដ្ឋោ ហោតិ គរហិយោ;

អថ កោ នាម សោ ធម្មោ, យេន តុដ្ឋោ គរហិយោ;

បញ្ហា មេសា កុសលេហិ ចិន្តិតា។

សង្ឃាទិសេសំ ថុល្លច្ចយំ;

បាចិត្តិយំ បាដិទេសនីយំ;

ទុក្កដំ អាបជ្ជេយ្យ ឯកតោ;

បញ្ហា មេសា កុសលេហិ ចិន្តិតា។

ឧភោ បរិបុណ្ណវីសតិវស្សា;

ឧភិន្នំ ឯកុបជ្ឈាយោ;

ឯកាចរិយោ ឯកា កម្មវាចា;

ឯកោ ឧបសម្បន្នោ ឯកោ អនុបសម្បន្នោ;

បញ្ហា មេសា កុសលេហិ ចិន្តិតា។

អកប្បកតំ នាបិ រជនាយ រត្តំ;

តេន និវត្ថោ យេន កាមំ វជេយ្យ;

ន ចស្ស ហោតិ អាបត្តិ;

សោ ច ធម្មោ សុគតេន ទេសិតោ;

បញ្ហា មេសា កុសលេហិ ចិន្តិតា។

ន ទេតិ ន បដិគ្គណ្ហាតិ, បដិគ្គហោ តេន ន វិជ្ជតិ;

អាបជ្ជតិ គរុកំ ន លហុកំ, តញ្ច បរិភោគបច្ចយា;

បញ្ហា មេសា កុសលេហិ ចិន្តិតា។

ន ទេតិ ន បដិគ្គណ្ហាតិ, បដិគ្គហោ តេន ន វិជ្ជតិ;

អាបជ្ជតិ លហុកំ ន គរុកំ, តញ្ច បរិភោគបច្ចយា;

បញ្ហា មេសា កុសលេហិ ចិន្តិតា។

អាបជ្ជតិ គរុកំ សាវសេសំ;

ឆាទេតិ អនាទរិយំ បដិច្ច;

ន ភិក្ខុនី នោ ច ផុសេយ្យ វជ្ជំ;

បញ្ហា មេសា កុសលេហិ ចិន្តិតា។

សេទមោចនគាថា និដ្ឋិតា។

តស្សុទ្ទានំ –

អសំវាសោ អវិស្សជ្ជិ, ទស ច អនុក្ខិត្តកោ;

ឧបេតិ ធម្មំ ឧព្ភក្ខកំ, តតោ សញ្ញាចិកា ច ទ្វេ។

ន កាយិកញ្ច គរុកំ, ន កាយិកំ ន វាចសិកំ ន កាយិកំ សុនាសិតំ (ស្យា.);

អនាលបន្តោ សិក្ខា ច, ឧភោ ច ចតុរោ ជនា។

ឥត្ថី តេលញ្ច និស្សគ្គិ, ភិក្ខុ ច បទវីតិយោ;

និវត្ថោ ច ន ច ញត្តិ, ន មាតរំ បិតរំ ហនេ។

អចោទយិត្វា ចោទយិត្វា, ឆិន្ទន្តំ សច្ចមេវ ច;

អធិដ្ឋិតញ្ចត្ថង្គតេ, ន រត្តំ ន ចារញ្ញកំ។

កាយិកា វាចសិកា ច, តិស្សិត្ថី ចាបិ មាតរំ;

កុទ្ធោ អារាធកោ តុដ្ឋោ, សង្ឃាទិសេសា ច ឧភោ។

អកប្បកតំ ន ទេតិ, ន ទេតាបជ្ជតី គរុំ;

សេទមោចនិកា គាថា, បញ្ហា វិញ្ញូហិ វិភាវិតាតិ វិញ្ញូវិភាវិតា (សី. ស្យា.)។