៩. វនសំយុត្តំ

៩. វនសំយុត្តំ

១. វិវេកសុត្តំ

២២១. ឯវំ មេ សុតំ – ឯកំ សមយំ អញ្ញតរោ ភិក្ខុ កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន សោ ភិក្ខុ ទិវាវិហារគតោ បាបកេ អកុសលេ វិតក្កេ វិតក្កេតិ គេហនិស្សិតេ។ អថ ខោ យា តស្មិំ វនសណ្ឌេ អធិវត្ថា ទេវតា តស្ស ភិក្ខុនោ អនុកម្បិកា អត្ថកាមា តំ ភិក្ខុំ សំវេជេតុកាមា យេន សោ ភិក្ខុ តេនុបសង្កមិ; ឧបសង្កមិត្វា តំ ភិក្ខុំ គាថាហិ អជ្ឈភាសិ –

‘‘វិវេកកាមោសិ វនំ បវិដ្ឋោ,

អថ តេ មនោ និច្ឆរតី ពហិទ្ធា;

ជនោ ជនស្មិំ វិនយស្សុ ឆន្ទំ,

តតោ សុខី ហោហិសិ វីតរាគោ។

‘‘អរតិំ បជហាសិ សតោ, ភវាសិ សតំ តំ សារយាមសេ;

បាតាលរជោ ហិ ទុត្តរោ, មា តំ កាមរជោ អវាហរិ។

‘‘សកុណោ យថា បំសុកុន្ថិតោ [បំសុកុណ្ឋិតោ (ក.), បំសុកុណ្ឌិតោ (សី. ស្យា. កំ. បី.)], វិធុនំ បាតយតិ សិតំ រជំ;

ឯវំ ភិក្ខុ បធានវា សតិមា, វិធុនំ បាតយតិ សិតំ រជ’’ន្តិ។

អថ ខោ សោ ភិក្ខុ តាយ ទេវតាយ សំវេជិតោ សំវេគមាបាទីតិ។

២. ឧបដ្ឋានសុត្តំ

២២២. ឯកំ សមយំ អញ្ញតរោ ភិក្ខុ កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន សោ ភិក្ខុ ទិវាវិហារគតោ សុបតិ។ អថ ខោ យា តស្មិំ វនសណ្ឌេ អធិវត្ថា ទេវតា តស្ស ភិក្ខុនោ អនុកម្បិកា អត្ថកាមា តំ ភិក្ខុំ សំវេជេតុកាមា យេន សោ ភិក្ខុ តេនុបសង្កមិ; ឧបសង្កមិត្វា តំ ភិក្ខុំ គាថាហិ អជ្ឈភាសិ –

‘‘ឧដ្ឋេហិ ភិក្ខុ កិំ សេសិ, កោ អត្ថោ សុបិតេន [សុបិនេន (សី.)] តេ;

អាតុរស្ស ហិ កា និទ្ទា, សល្លវិទ្ធស្ស រុប្បតោ។

‘‘យាយ សទ្ធាយ បព្ពជិតោ [យាយ សទ្ធាបព្ពជិតោ (សី. ស្យា. កំ.)], អគារស្មានគារិយំ;

តមេវ សទ្ធំ ព្រូហេហិ, មា និទ្ទាយ វសំ គមី’’តិ។

‘‘អនិច្ចា អទ្ធុវា កាមា, យេសុ មន្ទោវ មុច្ឆិតោ;

ពទ្ធេសុ [ខន្ធេសុ (សី.)] មុត្តំ អសិតំ, កស្មា បព្ពជិតំ តបេ។

‘‘ឆន្ទរាគស្ស វិនយា, អវិជ្ជាសមតិក្កមា;

តំ ញាណំ បរមោទានំ [បរិយោទាតំ (សី. បី.), បរមោទាតំ (ស្យា. កំ.), បរមវោទានំ (សី. អដ្ឋ.)], កស្មា បព្ពជិតំ តបេ។

‘‘ឆេត្វា [ភេត្វា (សី. ស្យា. កំ. បី.)] អវិជ្ជំ វិជ្ជាយ, អាសវានំ បរិក្ខយា;

អសោកំ អនុបាយាសំ, កស្មា បព្ពជិតំ តបេ។

‘‘អារទ្ធវីរិយំ បហិតត្តំ, និច្ចំ ទឡ្ហបរក្កមំ;

និព្ពានំ អភិកង្ខន្តំ, កស្មា បព្ពជិតំ តបេ’’តិ។

៣. កស្សបគោត្តសុត្តំ

២២៣. ឯកំ សមយំ អាយស្មា កស្សបគោត្តោ កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន អាយស្មា កស្សបគោត្តោ ទិវាវិហារគតោ អញ្ញតរំ ឆេតំ ឱវទតិ។ អថ ខោ យា តស្មិំ វនសណ្ឌេ អធិវត្ថា ទេវតា អាយស្មន្តំ កស្សបគោត្តំ សំវេជេតុកាមា យេនាយស្មា កស្សបគោត្តោ តេនុបសង្កមិ; ឧបសង្កមិត្វា អាយស្មន្តំ កស្សបគោត្តំ គាថាហិ អជ្ឈភាសិ –

‘‘គិរិទុគ្គចរំ ឆេតំ, អប្បបញ្ញំ អចេតសំ;

អកាលេ ឱវទំ ភិក្ខុ, មន្ទោវ បដិភាតិ មំ។

‘‘សុណាតិ ន វិជានាតិ, អាលោកេតិ ន បស្សតិ;

ធម្មស្មិំ ភញ្ញមានស្មិំ, អត្ថំ ពាលោ ន ពុជ្ឈតិ។

‘‘សចេបិ ទស បជ្ជោតេ, ធារយិស្សសិ កស្សប;

នេវ ទក្ខតិ រូបានិ, ចក្ខុ ហិស្ស ន វិជ្ជតី’’តិ។

អថ ខោ អាយស្មា កស្សបគោត្តោ តាយ ទេវតាយ សំវេជិតោ សំវេគមាបាទីតិ។

៤. សម្ពហុលសុត្តំ

២២៤. ឯកំ សមយំ សម្ពហុលា ភិក្ខូ កោសលេសុ វិហរន្តិ អញ្ញតរស្មិំ វនសណ្ឌេ។ អថ ខោ តេ ភិក្ខូ វស្សំវុដ្ឋា [វស្សំវុត្ថា (សី. ស្យា. កំ. បី.)] តេមាសច្ចយេន ចារិកំ បក្កមិំសុ។ អថ ខោ យា តស្មិំ វនសណ្ឌេ អធិវត្ថា ទេវតា តេ ភិក្ខូ អបស្សន្តី បរិទេវមានា តាយំ វេលាយំ ឥមំ គាថំ អភាសិ –

‘‘អរតិ វិយ មេជ្ជ ខាយតិ,

ពហុកេ ទិស្វាន វិវិត្តេ អាសនេ;

តេ ចិត្តកថា ពហុស្សុតា,

កោមេ គោតមសាវកា គតា’’តិ។

ឯវំ វុត្តេ, អញ្ញតរា ទេវតា តំ ទេវតំ គាថាយ បច្ចភាសិ –

‘‘មាគធំ គតា កោសលំ គតា, ឯកច្ចិយា បន វជ្ជិភូមិយា;

មគា វិយ អសង្គចារិនោ, អនិកេតា វិហរន្តិ ភិក្ខវោ’’តិ។

៥. អានន្ទសុត្តំ

២២៥. ឯកំ សមយំ អាយស្មា អានន្ទោ កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន អាយស្មា អានន្ទោ អតិវេលំ គិហិសញ្ញត្តិពហុលោ វិហរតិ។ អថ ខោ យា តស្មិំ វនសណ្ឌេ អធិវត្ថា ទេវតា អាយស្មតោ អានន្ទស្ស អនុកម្បិកា អត្ថកាមា អាយស្មន្តំ អានន្ទំ សំវេជេតុកាមា យេនាយស្មា អានន្ទោ តេនុបសង្កមិ; ឧបសង្កមិត្វា អាយស្មន្តំ អានន្ទំ គាថាយ អជ្ឈភាសិ –

‘‘រុក្ខមូលគហនំ បសក្កិយ, និព្ពានំ ហទយស្មិំ ឱបិយ;

ឈា គោតម មា បមាទោ [មា ច បមាទោ (សី. បី.)], កិំ តេ ពិឡិពិឡិកា ករិស្សតី’’តិ។

អថ ខោ អាយស្មា អានន្ទោ តាយ ទេវតាយ សំវេជិតោ សំវេគមាបាទីតិ។

៦. អនុរុទ្ធសុត្តំ

២២៦. ឯកំ សមយំ អាយស្មា អនុរុទ្ធោ កោសលេសុ វិហរតិ អញ្ញតរស្មិំ វនសណ្ឌេ។ អថ ខោ អញ្ញតរា តាវតិំសកាយិកា ទេវតា ជាលិនី នាម អាយស្មតោ អនុរុទ្ធស្ស បុរាណទុតិយិកា យេនាយស្មា អនុរុទ្ធោ តេនុបសង្កមិ; ឧបសង្កមិត្វា អាយស្មន្តំ អនុរុទ្ធំ គាថាយ អជ្ឈភាសិ –

‘‘តត្ថ ចិត្តំ បណិធេហិ, យត្ថ តេ វុសិតំ បុរេ;

តាវតិំសេសុ ទេវេសុ, សព្ពកាមសមិទ្ធិសុ;

បុរក្ខតោ បរិវុតោ, ទេវកញ្ញាហិ សោភសី’’តិ។

‘‘ទុគ្គតា ទេវកញ្ញាយោ, សក្កាយស្មិំ បតិដ្ឋិតា;

តេ ចាបិ ទុគ្គតា សត្តា, ទេវកញ្ញាហិ បត្ថិតា’’តិ។

‘‘ន តេ សុខំ បជានន្តិ, យេ ន បស្សន្តិ នន្ទនំ;

អាវាសំ នរទេវានំ, តិទសានំ យសស្សិន’’ន្តិ។

‘‘ន ត្វំ ពាលេ វិជានាសិ, យថា អរហតំ វចោ;

អនិច្ចា សព្ពសង្ខារា, ឧប្បាទវយធម្មិនោ;

ឧប្បជ្ជិត្វា និរុជ្ឈន្តិ, តេសំ វូបសមោ សុខោ។

‘‘នត្ថិ ទានិ បុនាវាសោ, ទេវកាយស្មិ ជាលិនិ;

វិក្ខីណោ ជាតិសំសារោ, នត្ថិ ទានិ បុនព្ភវោ’’តិ។

៧. នាគទត្តសុត្តំ

២២៧. ឯកំ សមយំ អាយស្មា នាគទត្តោ កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន អាយស្មា នាគទត្តោ អតិកាលេន គាមំ បវិសតិ, អតិទិវា បដិក្កមតិ។ អថ ខោ យា តស្មិំ វនសណ្ឌេ អធិវត្ថា ទេវតា អាយស្មតោ នាគទត្តស្ស អនុកម្បិកា អត្ថកាមា អាយស្មន្តំ នាគទត្តំ សំវេជេតុកាមា យេនាយស្មា នាគទត្តោ តេនុបសង្កមិ; ឧបសង្កមិត្វា អាយស្មន្តំ នាគទត្តំ គាថាហិ អជ្ឈភាសិ –

‘‘កាលេ បវិស នាគទត្ត, ទិវា ច អាគន្ត្វា អតិវេលចារី;

សំសដ្ឋោ គហដ្ឋេហិ, សមានសុខទុក្ខោ។

‘‘ភាយាមិ នាគទត្តំ សុប្បគព្ភំ, កុលេសុ វិនិពទ្ធំ;

មា ហេវ មច្ចុរញ្ញោ ពលវតោ, អន្តកស្ស វសំ ឧបេសី’’តិ [វសមេយ្យាតិ (សី. បី.), វសមេសីតិ (ស្យា. កំ.)]។

អថ ខោ អាយស្មា នាគទត្តោ តាយ ទេវតាយ សំវេជិតោ សំវេគមាបាទីតិ។

៨. កុលឃរណីសុត្តំ

២២៨. ឯកំ សមយំ អញ្ញតរោ ភិក្ខុ កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន សោ ភិក្ខុ អញ្ញតរស្មិំ កុលេ អតិវេលំ អជ្ឈោគាឡ្ហប្បត្តោ វិហរតិ។ អថ ខោ យា តស្មិំ វនសណ្ឌេ អធិវត្ថា ទេវតា តស្ស ភិក្ខុនោ អនុកម្បិកា អត្ថកាមា តំ ភិក្ខុំ សំវេជេតុកាមា យា តស្មិំ កុលេ កុលឃរណី, តស្សា វណ្ណំ អភិនិម្មិនិត្វា យេន សោ ភិក្ខុ តេនុបសង្កមិ; ឧបសង្កមិត្វា តំ ភិក្ខុំ គាថាយ អជ្ឈភាសិ –

‘‘នទីតីរេសុ សណ្ឋានេ, សភាសុ រថិយាសុ ច;

ជនា សង្គម្ម មន្តេន្តិ, មញ្ច តញ្ច [ត្វញ្ច (ក.)] កិមន្តរ’’ន្តិ។

‘‘ពហូហិ សទ្ទា បច្ចូហា, ខមិតព្ពា តបស្សិនា;

ន តេន មង្កុ ហោតព្ពំ, ន ហិ តេន កិលិស្សតិ។

‘‘យោ ច សទ្ទបរិត្តាសី, វនេ វាតមិគោ យថា;

លហុចិត្តោតិ តំ អាហុ, នាស្ស សម្បជ្ជតេ វត’’ន្តិ។

៩. វជ្ជិបុត្តសុត្តំ

២២៩. ឯកំ សមយំ អញ្ញតរោ វជ្ជិបុត្តកោ ភិក្ខុ វេសាលិយំ វិហរតិ អញ្ញតរស្មិំ វនសណ្ឌេ។ តេន ខោ បន សមយេន វេសាលិយំ វជ្ជិបុត្តកោ សព្ពរត្តិចារោ ហោតិ។ អថ ខោ សោ ភិក្ខុ វេសាលិយា តូរិយ-តាឡិត-វាទិត-និគ្ឃោសសទ្ទំ សុត្វា បរិទេវមានោ តាយំ វេលាយំ ឥមំ គាថំ អភាសិ –

‘‘ឯកកា មយំ អរញ្ញេ វិហរាម,

អបវិទ្ធំវ [អបវិដ្ឋំវ (ស្យា. កំ.)] វនស្មិំ ទារុកំ;

ឯតាទិសិកាយ រត្តិយា,

កោ សុ នាមម្ហេហិ [នាម អម្ហេហិ (សី. បី.)] បាបិយោ’’តិ។

អថ ខោ យា តស្មិំ វនសណ្ឌេ អធិវត្ថា ទេវតា តស្ស ភិក្ខុនោ អនុកម្បិកា អត្ថកាមា តំ ភិក្ខុំ សំវេជេតុកាមា យេន សោ ភិក្ខុ តេនុបសង្កមិ; ឧបសង្កមិត្វា តំ ភិក្ខុំ គាថាយ អជ្ឈភាសិ –

‘‘ឯកកោវ ត្វំ អរញ្ញេ វិហរសិ, អបវិទ្ធំវ វនស្មិំ ទារុកំ;

តស្ស តេ ពហុកា បិហយន្តិ, នេរយិកា វិយ សគ្គគាមិន’’ន្តិ។

អថ ខោ សោ ភិក្ខុ តាយ ទេវតាយ សំវេជិតោ សំវេគមាបាទីតិ។

១០. សជ្ឈាយសុត្តំ

២៣០. ឯកំ សមយំ អញ្ញតរោ ភិក្ខុ កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន សោ ភិក្ខុ យំ សុទំ បុព្ពេ អតិវេលំ សជ្ឈាយពហុលោ វិហរតិ សោ អបរេន សមយេន អប្បោស្សុក្កោ តុណ្ហីភូតោ សង្កសាយតិ។ អថ ខោ យា តស្មិំ វនសណ្ឌេ អធិវត្ថា ទេវតា តស្ស ភិក្ខុនោ ធម្មំ អសុណន្តី យេន សោ ភិក្ខុ តេនុបសង្កមិ; ឧបសង្កមិត្វា តំ ភិក្ខុំ គាថាយ អជ្ឈភាសិ –

‘‘កស្មា តុវំ ធម្មបទានិ ភិក្ខុ, នាធីយសិ ភិក្ខូហិ សំវសន្តោ;

សុត្វាន ធម្មំ លភតិប្បសាទំ, ទិដ្ឋេវ ធម្មេ លភតិប្បសំស’’ន្តិ។

‘‘អហុ បុរេ ធម្មបទេសុ ឆន្ទោ, យាវ វិរាគេន សមាគមិម្ហ;

យតោ វិរាគេន សមាគមិម្ហ, យំ កិញ្ចិ ទិដ្ឋំវ សុតំ មុតំ វា;

អញ្ញាយ និក្ខេបនមាហុ សន្តោ’’តិ។

១១. អកុសលវិតក្កសុត្តំ

២៣១. ឯកំ សមយំ អញ្ញតរោ ភិក្ខុ កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន សោ ភិក្ខុ ទិវាវិហារគតោ បាបកេ អកុសលេ វិតក្កេ វិតក្កេតិ, សេយ្យថិទំ – កាមវិតក្កំ, ព្យាបាទវិតក្កំ, វិហិំសាវិតក្កំ។ អថ ខោ យា តស្មិំ វនសណ្ឌេ អធិវត្ថា ទេវតា តស្ស ភិក្ខុនោ អនុកម្បិកា អត្ថកាមា តំ ភិក្ខុំ សំវេជេតុកាមា យេន សោ ភិក្ខុ តេនុបសង្កមិ; ឧបសង្កមិត្វា តំ ភិក្ខុំ គាថាហិ អជ្ឈភាសិ –

‘‘អយោនិសោ មនសិការា, សោ វិតក្កេហិ ខជ្ជសិ;

អយោនិសោ [អយោនិំ (បី. ក.)] បដិនិស្សជ្ជ, យោនិសោ អនុចិន្តយ។

‘‘សត្ថារំ ធម្មមារព្ភ, សង្ឃំ សីលានិ អត្តនោ;

អធិគច្ឆសិ បាមោជ្ជំ, បីតិសុខមសំសយំ;

តតោ បាមោជ្ជពហុលោ, ទុក្ខស្សន្តំ ករិស្សសី’’តិ។

អថ ខោ សោ ភិក្ខុ តាយ ទេវតាយ សំវេជិតោ សំវេគមាបាទីតិ។

១២. មជ្ឈន្ហិកសុត្តំ

២៣២. ឯកំ សមយំ អញ្ញតរោ ភិក្ខុ កោសលេសុ វិហរតិ អញ្ញតរស្មិំ វនសណ្ឌេ។ អថ ខោ តស្មិំ វនសណ្ឌេ អធិវត្ថា ទេវតា យេន សោ ភិក្ខុ តេនុបសង្កមិ; ឧបសង្កមិត្វា តស្ស ភិក្ខុនោ សន្តិកេ ឥមំ គាថំ អភាសិ –

‘‘ឋិតេ មជ្ឈន្ហិកេ កាលេ, សន្និសីវេសុ [សន្និសិន្នេសុ (ស្យា. កំ. បី.)] បក្ខិសុ;

សណតេវ ព្រហារញ្ញំ, តំ ភយំ បដិភាតិ មំ។

‘‘ឋិតេ មជ្ឈន្ហិកេ កាលេ, សន្និសីវេសុ បក្ខិសុ;

សណតេវ ព្រហារញ្ញំ, សា រតិ បដិភាតិ ម’’ន្តិ។

១៣. បាកតិន្ទ្រិយសុត្តំ

២៣៣. ឯកំ សមយំ សម្ពហុលា ភិក្ខូ កោសលេសុ វិហរន្តិ អញ្ញតរស្មិំ វនសណ្ឌេ ឧទ្ធតា ឧន្នឡា ចបលា មុខរា វិកិណ្ណវាចា មុដ្ឋស្សតិនោ អសម្បជានា អសមាហិតា វិព្ភន្តចិត្តា បាកតិន្ទ្រិយា។ អថ ខោ យា តស្មិំ វនសណ្ឌេ អធិវត្ថា ទេវតា តេសំ ភិក្ខូនំ អនុកម្បិកា អត្ថកាមា តេ ភិក្ខូ សំវេជេតុកាមា យេន តេ ភិក្ខូ តេនុបសង្កមិ; ឧបសង្កមិត្វា តេ ភិក្ខូ គាថាហិ អជ្ឈភាសិ –

‘‘សុខជីវិនោ បុរេ អាសុំ, ភិក្ខូ គោតមសាវកា;

អនិច្ឆា បិណ្ឌមេសនា, អនិច្ឆា សយនាសនំ;

លោកេ អនិច្ចតំ ញត្វា, ទុក្ខស្សន្តំ អកំសុ តេ។

‘‘ទុប្បោសំ កត្វា អត្តានំ, គាមេ គាមណិកា វិយ;

ភុត្វា ភុត្វា និបជ្ជន្តិ, បរាគារេសុ មុច្ឆិតា។

‘‘សង្ឃស្ស អញ្ជលិំ កត្វា, ឥធេកច្ចេ វទាមហំ;

អបវិទ្ធា [អបវិដ្ឋា (ស្យា. កំ.)] អនាថា តេ, យថា បេតា តថេវ តេ។

‘‘យេ ខោ បមត្តា វិហរន្តិ, តេ មេ សន្ធាយ ភាសិតំ;

យេ អប្បមត្តា វិហរន្តិ, នមោ តេសំ ករោមហ’’ន្តិ។

អថ ខោ តេ ភិក្ខូ តាយ ទេវតាយ សំវេជិតា សំវេគមាបាទុន្តិ។

១៤. គន្ធត្ថេនសុត្តំ

២៣៤. ឯកំ សមយំ អញ្ញតរោ ភិក្ខុ កោសលេសុ វិហរតិ អញ្ញតរស្មិំ វនសណ្ឌេ។ តេន ខោ បន សមយេន សោ ភិក្ខុ បច្ឆាភត្តំ បិណ្ឌបាតបដិក្កន្តោ បោក្ខរណិំ ឱគាហេត្វា បទុមំ ឧបសិង្ឃតិ។ អថ ខោ យា តស្មិំ វនសណ្ឌេ អធិវត្ថា ទេវតា តស្ស ភិក្ខុនោ អនុកម្បិកា អត្ថកាមា តំ ភិក្ខុំ សំវេជេតុកាមា យេន សោ ភិក្ខុ តេនុបសង្កមិ; ឧបសង្កមិត្វា តំ ភិក្ខុំ គាថាយ អជ្ឈភាសិ –

‘‘យមេតំ វារិជំ បុប្ផំ, អទិន្នំ ឧបសិង្ឃសិ;

ឯកង្គមេតំ ថេយ្យានំ, គន្ធត្ថេនោសិ មារិសា’’តិ។

‘‘ន ហរាមិ ន ភញ្ជាមិ, អារា សិង្ឃាមិ វារិជំ;

អថ កេន នុ វណ្ណេន, គន្ធត្ថេនោតិ វុច្ចតិ។

‘‘យ្វាយំ ភិសានិ ខនតិ, បុណ្ឌរីកានិ ភញ្ជតិ;

ឯវំ អាកិណ្ណកម្មន្តោ, កស្មា ឯសោ ន វុច្ចតី’’តិ។

‘‘អាកិណ្ណលុទ្ទោ បុរិសោ, ធាតិចេលំវ មក្ខិតោ;

តស្មិំ មេ វចនំ នត្ថិ, ត្វញ្ចារហាមិ វត្តវេ។

‘‘អនង្គណស្ស បោសស្ស, និច្ចំ សុចិគវេសិនោ;

វាលគ្គមត្តំ បាបស្ស, អព្ភាមត្តំវ ខាយតី’’តិ។

‘‘អទ្ធា មំ យក្ខ ជានាសិ, អថោ មេ អនុកម្បសិ;

បុនបិ យក្ខ វជ្ជាសិ, យទា បស្សសិ ឯទិស’’ន្តិ។

‘‘នេវ តំ ឧបជីវាម, នបិ តេ ភតកាម្ហសេ;

ត្វមេវ ភិក្ខុ ជានេយ្យ, យេន គច្ឆេយ្យ សុគ្គតិ’’ន្តិ។

អថ ខោ សោ ភិក្ខុ តាយ ទេវតាយ សំវេជិតោ សំវេគមាបាទីតិ។

វនសំយុត្តំ សមត្តំ។

តស្សុទ្ទានំ –

វិវេកំ ឧបដ្ឋានញ្ច, កស្សបគោត្តេន សម្ពហុលា;

អានន្ទោ អនុរុទ្ធោ ច, នាគទត្តញ្ច កុលឃរណី។

វជ្ជិបុត្តោ ច វេសាលី, សជ្ឈាយេន អយោនិសោ;

មជ្ឈន្ហិកាលម្ហិ បាកតិន្ទ្រិយ, បទុមបុប្ផេន ចុទ្ទស ភវេតិ។