៥. ភិក្ខុនីសំយុត្តំ

៥. ភិក្ខុនីសំយុត្តំ

១. អាឡវិកាសុត្តំ

១៦២. ឯវំ មេ សុតំ – ឯកំ សមយំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ អថ ខោ អាឡវិកា ភិក្ខុនី បុព្ពណ្ហសមយំ និវាសេត្វា បត្តចីវរមាទាយ សាវត្ថិំ បិណ្ឌាយ បាវិសិ។ សាវត្ថិយំ បិណ្ឌាយ ចរិត្វា បច្ឆាភត្តំ បិណ្ឌបាតបដិក្កន្តា យេន អន្ធវនំ តេនុបសង្កមិ វិវេកត្ថិនី។ អថ ខោ មារោ បាបិមា អាឡវិកាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ វិវេកម្ហា ចាវេតុកាមោ យេន អាឡវិកា ភិក្ខុនី តេនុបសង្កមិ; ឧបសង្កមិត្វា អាឡវិកំ ភិក្ខុនិំ គាថាយ អជ្ឈភាសិ –

‘‘នត្ថិ និស្សរណំ លោកេ, កិំ វិវេកេន កាហសិ;

ភុញ្ជស្សុ កាមរតិយោ, មាហុ បច្ឆានុតាបិនី’’តិ។

អថ ខោ អាឡវិកាយ ភិក្ខុនិយា ឯតទហោសិ – ‘‘កោ នុ ខ្វាយំ មនុស្សោ វា អមនុស្សោ វា គាថំ ភាសតី’’តិ? អថ ខោ អាឡវិកាយ ភិក្ខុនិយា ឯតទហោសិ – ‘‘មារោ ខោ អយំ បាបិមា មម ភយំ ឆម្ភិតត្តំ លោមហំសំ ឧប្បាទេតុកាមោ វិវេកម្ហា ចាវេតុកាមោ គាថំ ភាសតី’’តិ។ អថ ខោ អាឡវិកា ភិក្ខុនី ‘‘មារោ អយំ បាបិមា’’ ឥតិ វិទិត្វា មារំ បាបិមន្តំ គាថាហិ បច្ចភាសិ –

‘‘អត្ថិ និស្សរណំ លោកេ, បញ្ញាយ មេ សុផុស្សិតំ [សុផស្សិតំ (សី. បី.)];

បមត្តពន្ធុ បាបិម, ន ត្វំ ជានាសិ តំ បទំ។

‘‘សត្តិសូលូបមា កាមា, ខន្ធាសំ អធិកុដ្ដនា;

យំ ត្វំ កាមរតិំ ព្រូសិ, អរតិ មយ្ហ សា អហូ’’តិ។

អថ ខោ មារោ បាបិមា ‘‘ជានាតិ មំ អាឡវិកា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

២. សោមាសុត្តំ

១៦៣. សាវត្ថិនិទានំ ។ អថ ខោ សោមា ភិក្ខុនី បុព្ពណ្ហសមយំ និវាសេត្វា បត្តចីវរមាទាយ សាវត្ថិំ បិណ្ឌាយ បាវិសិ។ សាវត្ថិយំ បិណ្ឌាយ ចរិត្វា បច្ឆាភត្តំ បិណ្ឌបាតបដិក្កន្តា យេន អន្ធវនំ តេនុបសង្កមិ ទិវាវិហារាយ។ អន្ធវនំ អជ្ឈោគាហេត្វា អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា សោមាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ យេន សោមា ភិក្ខុនី តេនុបសង្កមិ; ឧបសង្កមិត្វា សោមំ ភិក្ខុនិំ គាថាយ អជ្ឈភាសិ –

‘‘យំ តំ ឥសីហិ បត្តព្ពំ, ឋានំ ទុរភិសម្ភវំ;

ន តំ ទ្វង្គុលបញ្ញាយ, សក្កា បប្បោតុមិត្ថិយា’’តិ។

អថ ខោ សោមាយ ភិក្ខុនិយា ឯតទហោសិ – ‘‘កោ នុ ខ្វាយំ មនុស្សោ វា អមនុស្សោ វា គាថំ ភាសតី’’តិ? អថ ខោ សោមាយ ភិក្ខុនិយា ឯតទហោសិ – ‘‘មារោ ខោ អយំ បាបិមា មម ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ គាថំ ភាសតី’’តិ។ អថ ខោ សោមា ភិក្ខុនី ‘‘មារោ អយំ បាបិមា’’ ឥតិ វិទិត្វា មារំ បាបិមន្តំ គាថាហិ បច្ចភាសិ –

‘‘ឥត្ថិភាវោ កិំ កយិរា, ចិត្តម្ហិ សុសមាហិតេ;

ញាណម្ហិ វត្តមានម្ហិ, សម្មា ធម្មំ វិបស្សតោ។

‘‘យស្ស នូន សិយា ឯវំ, ឥត្ថាហំ បុរិសោតិ វា;

កិញ្ចិ វា បន អញ្ញស្មិ [អស្មីតិ (ស្យា. កំ. បី.)], តំ មារោ វត្តុមរហតី’’តិ។

អថ ខោ មារោ បាបិមា ‘‘ជានាតិ មំ សោមា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

៣. កិសាគោតមីសុត្តំ

១៦៤. សាវត្ថិនិទានំ។ អថ ខោ កិសាគោតមី ភិក្ខុនី បុព្ពណ្ហសមយំ និវាសេត្វា បត្តចីវរមាទាយ សាវត្ថិំ បិណ្ឌាយ បាវិសិ។ សាវត្ថិយំ បិណ្ឌាយ ចរិត្វា បច្ឆាភត្តំ បិណ្ឌបាតបដិក្កន្តា យេន អន្ធវនំ តេនុបសង្កមិ , ទិវាវិហារាយ។ អន្ធវនំ អជ្ឈោគាហេត្វា អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា កិសាគោតមិយា ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ យេន កិសាគោតមី ភិក្ខុនី តេនុបសង្កមិ; ឧបសង្កមិត្វា កិសាគោតមិំ ភិក្ខុនិំ គាថាយ អជ្ឈភាសិ –

‘‘កិំ នុ ត្វំ មតបុត្តាវ, ឯកមាសិ រុទម្មុខី;

វនមជ្ឈគតា ឯកា, បុរិសំ នុ គវេសសី’’តិ។

អថ ខោ កិសាគោតមិយា ភិក្ខុនិយា ឯតទហោសិ – ‘‘កោ នុ ខ្វាយំ មនុស្សោ វា អមនុស្សោ វា គាថំ ភាសតី’’តិ? អថ ខោ កិសាគោតមិយា ភិក្ខុនិយា ឯតទហោសិ – ‘‘មារោ ខោ អយំ បាបិមា មម ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ គាថំ ភាសតី’’តិ។

អថ ខោ កិសាគោតមី ភិក្ខុនី ‘‘មារោ អយំ បាបិមា’’ ឥតិ វិទិត្វា មារំ បាបិមន្តំ គាថាហិ បច្ចភាសិ –

‘‘អច្ចន្តំ មតបុត្តាម្ហិ, បុរិសា ឯតទន្តិកា;

ន សោចាមិ ន រោទាមិ, ន តំ ភាយាមិ អាវុសោ។

‘‘សព្ពត្ថ វិហតា នន្ទី, តមោក្ខន្ធោ បទាលិតោ;

ជេត្វាន មច្ចុនោ [ជេត្វា នមុចិនោ (សី.)] សេនំ, វិហរាមិ អនាសវា’’តិ។

អថ ខោ មារោ បាបិមា ‘‘ជានាតិ មំ កិសាគោតមី ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

៤. វិជយាសុត្តំ

១៦៥. សាវត្ថិនិទានំ។ អថ ខោ វិជយា ភិក្ខុនី បុព្ពណ្ហសមយំ និវាសេត្វា…បេ.… អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា វិជយាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ យេន វិជយា ភិក្ខុនី តេនុបសង្កមិ; ឧបសង្កមិត្វា វិជយំ ភិក្ខុនិំ គាថាយ អជ្ឈភាសិ –

‘‘ទហរា ត្វំ រូបវតី, អហញ្ច ទហរោ សុសុ;

បញ្ចង្គិកេន តុរិយេន, ឯហយ្យេភិរមាមសេ’’តិ [ឯហិ អយ្យេ រមាមសេតិ (សី.)]។

អថ ខោ វិជយាយ ភិក្ខុនិយា ឯតទហោសិ – ‘‘កោ នុ ខ្វាយំ មនុស្សោ វា អមនុស្សោ វា គាថំ ភាសតី’’តិ? អថ ខោ វិជយាយ ភិក្ខុនិយា ឯតទហោសិ – ‘‘មារោ ខោ អយំ បាបិមា មម ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ គាថំ ភាសតី’’តិ។ អថ ខោ វិជយា ភិក្ខុនី ‘‘មារោ អយំ បាបិមា’’ ឥតិ វិទិត្វា មារំ បាបិមន្តំ គាថាហិ បច្ចភាសិ –

‘‘រូបា សទ្ទា រសា គន្ធា, ផោដ្ឋព្ពា ច មនោរមា;

និយ្យាតយាមិ តុយ្ហេវ, មារ នាហំ តេនត្ថិកា។

‘‘ឥមិនា បូតិកាយេន, ភិន្ទនេន បភង្គុនា;

អដ្ដីយាមិ ហរាយាមិ, កាមតណ្ហា សមូហតា។

‘‘យេ ច រូបូបគា សត្តា, យេ ច អរូបដ្ឋាយិនោ [អារុប្បដ្ឋាយិនោ (សី. បី.)];

យា ច សន្តា សមាបត្តិ, សព្ពត្ថ វិហតោ តមោ’’តិ។

អថ ខោ មារោ បាបិមា ‘‘ជានាតិ មំ វិជយា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

៥. ឧប្បលវណ្ណាសុត្តំ

១៦៦. សាវត្ថិនិទានំ។ អថ ខោ ឧប្បលវណ្ណា ភិក្ខុនី បុព្ពណ្ហសមយំ និវាសេត្វា…បេ.… អញ្ញតរស្មិំ សុបុប្ផិតសាលរុក្ខមូលេ អដ្ឋាសិ។ អថ ខោ មារោ បាបិមា ឧប្បលវណ្ណាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ យេន ឧប្បលវណ្ណា ភិក្ខុនី តេនុបសង្កមិ; ឧបសង្កមិត្វា ឧប្បលវណ្ណំ ភិក្ខុនិំ គាថាយ អជ្ឈភាសិ –

‘‘សុបុប្ផិតគ្គំ ឧបគម្ម ភិក្ខុនិ,

ឯកា តុវំ តិដ្ឋសិ សាលមូលេ;

ន ចត្ថិ តេ ទុតិយា វណ្ណធាតុ,

ពាលេ ន ត្វំ ភាយសិ ធុត្តកាន’’ន្តិ។

អថ ខោ ឧប្បលវណ្ណាយ ភិក្ខុនិយា ឯតទហោសិ – ‘‘កោ នុ ខ្វាយំ មនុស្សោ វា អមនុស្សោ វា គាថំ ភាសតី’’តិ? អថ ខោ ឧប្បលវណ្ណាយ ភិក្ខុនិយា ឯតទហោសិ – ‘‘មារោ ខោ អយំ បាបិមា មម ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ គាថំ ភាសតី’’តិ។ អថ ខោ ឧប្បលវណ្ណា ភិក្ខុនី ‘‘មារោ អយំ បាបិមា’’ ឥតិ វិទិត្វា មារំ បាបិមន្តំ គាថាហិ បច្ចភាសិ –

‘‘សតំ សហស្សានិបិ ធុត្តកានំ,

ឥធាគតា តាទិសកា ភវេយ្យុំ;

លោមំ ន ឥញ្ជាមិ ន សន្តសាមិ,

ន មារ ភាយាមិ តមេកិកាបិ។

‘‘ឯសា អន្តរធាយាមិ, កុច្ឆិំ វា បវិសាមិ តេ;

បខុមន្តរិកាយម្បិ, តិដ្ឋន្តិំ មំ ន ទក្ខសិ។

‘‘ចិត្តស្មិំ វសីភូតាម្ហិ, ឥទ្ធិបាទា សុភាវិតា;

សព្ពពន្ធនមុត្តាម្ហិ, ន តំ ភាយាមិ អាវុសោ’’តិ។

អថ ខោ មារោ បាបិមា ‘‘ជានាតិ មំ ឧប្បលវណ្ណា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

៦. ចាលាសុត្តំ

១៦៧. សាវត្ថិនិទានំ។ អថ ខោ ចាលា ភិក្ខុនី បុព្ពណ្ហសមយំ និវាសេត្វា…បេ.… អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា យេន ចាលា ភិក្ខុនី តេនុបសង្កមិ; ឧបសង្កមិត្វា ចាលំ ភិក្ខុនិំ ឯតទវោច – ‘‘កិំ នុ ត្វំ, ភិក្ខុនិ, ន រោចេសី’’តិ? ‘‘ជាតិំ ខ្វាហំ, អាវុសោ, ន រោចេមី’’តិ។

‘‘កិំ នុ ជាតិំ ន រោចេសិ, ជាតោ កាមានិ ភុញ្ជតិ;

កោ នុ តំ ឥទមាទបយិ, ជាតិំ មា រោច [មា រោចេសិ (សី. បី.)] ភិក្ខុនី’’តិ។

‘‘ជាតស្ស មរណំ ហោតិ, ជាតោ ទុក្ខានិ ផុស្សតិ [បស្សតិ (សី. បី.)];

ពន្ធំ វធំ បរិក្លេសំ, តស្មា ជាតិំ ន រោចយេ។

‘‘ពុទ្ធោ ធម្មមទេសេសិ, ជាតិយា សមតិក្កមំ;

សព្ពទុក្ខប្បហានាយ, សោ មំ សច្ចេ និវេសយិ។

‘‘យេ ច រូបូបគា សត្តា, យេ ច អរូបដ្ឋាយិនោ;

និរោធំ អប្បជានន្តា, អាគន្តារោ បុនព្ភវ’’ន្តិ។

អថ ខោ មារោ បាបិមា ‘‘ជានាតិ មំ ចាលា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

៧. ឧបចាលាសុត្តំ

១៦៨. សាវត្ថិនិទានំ ។ អថ ខោ ឧបចាលា ភិក្ខុនី បុព្ពណ្ហសមយំ និវាសេត្វា…បេ.… អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា យេន ឧបចាលា ភិក្ខុនី តេនុបសង្កមិ; ឧបសង្កមិត្វា ឧបចាលំ ភិក្ខុនិំ ឯតទវោច – ‘‘កត្ថ នុ ត្វំ, ភិក្ខុនិ, ឧប្បជ្ជិតុកាមា’’តិ? ‘‘ន ខ្វាហំ, អាវុសោ, កត្ថចិ ឧប្បជ្ជិតុកាមា’’តិ។

‘‘តាវតិំសា ច យាមា ច, តុសិតា ចាបិ ទេវតា;

និម្មានរតិនោ ទេវា, យេ ទេវា វសវត្តិនោ;

តត្ថ ចិត្តំ បណិធេហិ, រតិំ បច្ចនុភោស្សសី’’តិ។

‘‘តាវតិំសា ច យាមា ច, តុសិតា ចាបិ ទេវតា;

និម្មានរតិនោ ទេវា, យេ ទេវា វសវត្តិនោ;

កាមពន្ធនពទ្ធា តេ, ឯន្តិ មារវសំ បុន។

‘‘សព្ពោ អាទីបិតោ [សព្ពោវ អាទិត្តោ (ស្យា. កំ.)] លោកោ, សព្ពោ លោកោ បធូបិតោ;

សព្ពោ បជ្ជលិតោ [បជ្ជលិតោ (សព្ពត្ថ)] លោកោ, សព្ពោ លោកោ បកម្បិតោ។

‘‘អកម្បិតំ អបជ្ជលិតំ [អចលិតំ (សី. ស្យា. កំ. បី.)], អបុថុជ្ជនសេវិតំ;

អគតិ យត្ថ មារស្ស, តត្ថ មេ និរតោ មនោ’’តិ។

អថ ខោ មារោ បាបិមា ‘‘ជានាតិ មំ ឧបចាលា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

៨. សីសុបចាលាសុត្តំ

១៦៩. សាវត្ថិនិទានំ ។ អថ ខោ សីសុបចាលា [សីសូបចាលា (សី.)] ភិក្ខុនី បុព្ពណ្ហសមយំ និវាសេត្វា …បេ.… អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា យេន សីសុបចាលា ភិក្ខុនី តេនុបសង្កមិ; ឧបសង្កមិត្វា សីសុបចាលំ ភិក្ខុនិំ ឯតទវោច – ‘‘កស្ស នុ ត្វំ, ភិក្ខុនិ, បាសណ្ឌំ រោចេសី’’តិ? ‘‘ន ខ្វាហំ, អាវុសោ, កស្សចិ បាសណ្ឌំ រោចេមី’’តិ។

‘‘កំ នុ ឧទ្ទិស្ស មុណ្ឌាសិ, សមណី វិយ ទិស្សសិ;

ន ច រោចេសិ បាសណ្ឌំ, កិមិវ ចរសិ មោមូហា’’តិ។

‘‘ឥតោ ពហិទ្ធា បាសណ្ឌា, ទិដ្ឋីសុ បសីទន្តិ តេ;

ន តេសំ ធម្មំ រោចេមិ, តេ ធម្មស្ស អកោវិទា។

‘‘អត្ថិ សក្យកុលេ ជាតោ, ពុទ្ធោ អប្បដិបុគ្គលោ;

សព្ពាភិភូ មារនុទោ, សព្ពត្ថមបរាជិតោ។

‘‘សព្ពត្ថ មុត្តោ អសិតោ, សព្ពំ បស្សតិ ចក្ខុមា;

សព្ពកម្មក្ខយំ បត្តោ, វិមុត្តោ ឧបធិសង្ខយេ;

សោ មយ្ហំ ភគវា សត្ថា, តស្ស រោចេមិ សាសន’’ន្តិ។

អថ ខោ មារោ បាបិមា ‘‘ជានាតិ មំ សីសុបចាលា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

៩. សេលាសុត្តំ

១៧០. សាវត្ថិនិទានំ ។ អថ ខោ សេលា ភិក្ខុនី បុព្ពណ្ហសមយំ និវាសេត្វា…បេ.… អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា សេលាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ…បេ.… សេលំ ភិក្ខុនិំ គាថាយ អជ្ឈភាសិ –

‘‘កេនិទំ បកតំ ពិម្ពំ, ក្វនុ [ក្វន្នុ (សី. បី.), ក្វចិ (ស្យា. កំ. ក.)] ពិម្ពស្ស ការកោ;

ក្វនុ ពិម្ពំ សមុប្បន្នំ, ក្វនុ ពិម្ពំ និរុជ្ឈតី’’តិ។

អថ ខោ សេលាយ ភិក្ខុនិយា ឯតទហោសិ – ‘‘កោ នុ ខ្វាយំ មនុស្សោ វា អមនុស្សោ វា គាថំ ភាសតី’’តិ? អថ ខោ សេលាយ ភិក្ខុនិយា ឯតទហោសិ – ‘‘មារោ ខោ អយំ បាបិមា មម ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ គាថំ ភាសតី’’តិ។ អថ ខោ សេលា ភិក្ខុនី ‘‘មារោ អយំ បាបិមា’’ ឥតិ វិទិត្វា មារំ បាបិមន្តំ គាថាហិ បច្ចភាសិ –

‘‘នយិទំ អត្តកតំ [នយិទំ បកតំ (ស្យា. កំ.)] ពិម្ពំ, នយិទំ បរកតំ [នយិទំ បកតំ (ស្យា. កំ.)] អឃំ;

ហេតុំ បដិច្ច សម្ភូតំ, ហេតុភង្គា និរុជ្ឈតិ។

‘‘យថា អញ្ញតរំ ពីជំ, ខេត្តេ វុត្តំ វិរូហតិ;

បថវីរសញ្ចាគម្ម, សិនេហញ្ច តទូភយំ។

‘‘ឯវំ ខន្ធា ច ធាតុយោ, ឆ ច អាយតនា ឥមេ;

ហេតុំ បដិច្ច សម្ភូតា, ហេតុភង្គា និរុជ្ឈរេ’’តិ។

អថ ខោ មារោ បាបិមា ‘‘ជានាតិ មំ សេលា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

១០. វជិរាសុត្តំ

១៧១. សាវត្ថិនិទានំ ។ អថ ខោ វជិរា ភិក្ខុនី បុព្ពណ្ហសមយំ និវាសេត្វា បត្តចីវរមាទាយ សាវត្ថិំ បិណ្ឌាយ បាវិសិ។ សាវត្ថិយំ បិណ្ឌាយ ចរិត្វា បច្ឆាភត្តំ បិណ្ឌបាតបដិក្កន្តា យេន អន្ធវនំ តេនុបសង្កមិ ទិវាវិហារាយ។ អន្ធវនំ អជ្ឈោគាហេត្វា អញ្ញតរស្មិំ រុក្ខមូលេ ទិវាវិហារំ និសីទិ។ អថ ខោ មារោ បាបិមា វជិរាយ ភិក្ខុនិយា ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ យេន វជិរា ភិក្ខុនី តេនុបសង្កមិ; ឧបសង្កមិត្វា វជិរំ ភិក្ខុនិំ គាថាយ អជ្ឈភាសិ –

‘‘កេនាយំ បកតោ សត្តោ, កុវំ សត្តស្ស ការកោ;

កុវំ សត្តោ សមុប្បន្នោ, កុវំ សត្តោ និរុជ្ឈតី’’តិ។

អថ ខោ វជិរាយ ភិក្ខុនិយា ឯតទហោសិ – ‘‘កោ នុ ខ្វាយំ មនុស្សោ វា អមនុស្សោ វា គាថំ ភាសតី’’តិ? អថ ខោ វជិរាយ ភិក្ខុនិយា ឯតទហោសិ – ‘‘មារោ ខោ អយំ បាបិមា មម ភយំ ឆម្ភិតត្តំ លោមហំសំ ឧប្បាទេតុកាមោ សមាធិម្ហា ចាវេតុកាមោ គាថំ ភាសតី’’តិ។ អថ ខោ វជិរា ភិក្ខុនី ‘‘មារោ អយំ បាបិមា’’ ឥតិ វិទិត្វា, មារំ បាបិមន្តំ គាថាហិ បច្ចភាសិ –

‘‘កិំ នុ សត្តោតិ បច្ចេសិ, មារ ទិដ្ឋិគតំ នុ តេ;

សុទ្ធសង្ខារបុញ្ជោយំ, នយិធ សត្តុបលព្ភតិ។

‘‘យថា ហិ អង្គសម្ភារា, ហោតិ សទ្ទោ រថោ ឥតិ;

ឯវំ ខន្ធេសុ សន្តេសុ, ហោតិ សត្តោតិ សម្មុតិ [សម្មតិ (ស្យា. កំ.)]។

‘‘ទុក្ខមេវ ហិ សម្ភោតិ, ទុក្ខំ តិដ្ឋតិ វេតិ ច;

នាញ្ញត្រ ទុក្ខា សម្ភោតិ, នាញ្ញំ ទុក្ខា និរុជ្ឈតី’’តិ។

អថ ខោ មារោ បាបិមា ‘‘ជានាតិ មំ វជិរា ភិក្ខុនី’’តិ ទុក្ខី ទុម្មនោ តត្ថេវន្តរធាយីតិ។

ភិក្ខុនីសំយុត្តំ សមត្តំ។

តស្សុទ្ទានំ –

អាឡវិកា ច សោមា ច, គោតមី វិជយា សហ;

ឧប្បលវណ្ណា ច ចាលា, ឧបចាលា សីសុបចាលា ច;

សេលា វជិរាយ តេ ទសាតិ។