ឥមេ ខោ បនាយស្មន្តោ សត្ត អធិករណសមថា
ធម្មា ឧទ្ទេសំ អាគច្ឆន្តិ។
៦៥៥. ឧប្បន្នុប្បន្នានំ អធិករណានំ សមថាយ វូបសមាយ សម្មុខាវិនយោ ទាតព្ពោ, សតិវិនយោ ទាតព្ពោ, អមូឡ្ហវិនយោ ទាតព្ពោ, បដិញ្ញាយ ការេតព្ពំ, យេភុយ្យសិកា, តស្សបាបិយសិកា, តិណវត្ថារកោតិ។
ឧទ្ទិដ្ឋា ខោ, អាយស្មន្តោ, សត្ត អធិករណសមថា ធម្មា។ តត្ថាយស្មន្តេ បុច្ឆាមិ – ‘‘កច្ចិត្ថ បរិសុទ្ធា’’? ទុតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? តតិយម្បិ បុច្ឆាមិ – ‘‘កច្ចិត្ថ បរិសុទ្ធា’’? បរិសុទ្ធេត្ថាយស្មន្តោ, តស្មា តុណ្ហី, ឯវមេតំ ធារយាមីតិ។
អធិករណសមថា និដ្ឋិតា។
ឧទ្ទិដ្ឋំ ខោ, អាយស្មន្តោ, និទានំ; ឧទ្ទិដ្ឋា ចត្តារោ បារាជិកា ធម្មា; ឧទ្ទិដ្ឋា តេរស សង្ឃាទិសេសា ធម្មា; ឧទ្ទិដ្ឋា ទ្វេ អនិយតា ធម្មា; ឧទ្ទិដ្ឋា តិំស និស្សគ្គិយា បាចិត្តិយា ធម្មា; ឧទ្ទិដ្ឋា ទ្វេនវុតិ បាចិត្តិយា ធម្មា; ឧទ្ទិដ្ឋា ចត្តារោ បាដិទេសនីយា ធម្មា; ឧទ្ទិដ្ឋា សេខិយា ធម្មា; ឧទ្ទិដ្ឋា សត្ត អធិករណសមថា ធម្មា។ ឯត្តកំ តស្ស ភគវតោ សុត្តាគតំ សុត្តបរិយាបន្នំ អន្វទ្ធមាសំ ឧទ្ទេសំ អាគច្ឆតិ។ តត្ថ សព្ពេហេវ សមគ្គេហិ សម្មោទមានេហិ អវិវទមានេហិ សិក្ខិតព្ពន្តិ។
មហាវិភង្គោ និដ្ឋិតោ។
។ នមោ តស្ស ភគវតោ អរហតោ សម្មាសម្ពុទ្ធស្ស។
ភិក្ខុនីវិភង្គោ