៤. បវារណាក្ខន្ធកោ

៤. បវារណាក្ខន្ធកោ

១២០. អផាសុកវិហារោ

២០៩. តេន សមយេន ពុទ្ធោ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តេន ខោ បន សមយេន សម្ពហុលា សន្ទិដ្ឋា សម្ភត្តា ភិក្ខូ កោសលេសុ ជនបទេ អញ្ញតរស្មិំ អាវាសេ វស្សំ ឧបគច្ឆិំសុ។ អថ ខោ តេសំ ភិក្ខូនំ ឯតទហោសិ – ‘‘កេន នុ ខោ មយំ ឧបាយេន សមគ្គា សម្មោទមានា អវិវទមានា ផាសុកំ វស្សំ វសេយ្យាម, ន ច បិណ្ឌកេន កិលមេយ្យាមា’’តិ។ អថ ខោ តេសំ ភិក្ខូនំ ឯតទហោសិ – ‘‘សចេ ខោ មយំ អញ្ញមញ្ញំ នេវ អាលបេយ្យាម ន សល្លបេយ្យាម – យោ បឋមំ គាមតោ បិណ្ឌាយ បដិក្កមេយ្យ សោ អាសនំ បញ្ញបេយ្យ, បាទោទកំ បាទបីឋំ បាទកថលិកំ ឧបនិក្ខិបេយ្យ, អវក្ការបាតិំ ធោវិត្វា ឧបដ្ឋាបេយ្យ, បានីយំ បរិភោជនីយំ ឧបដ្ឋាបេយ្យ; យោ បច្ឆា គាមតោ បិណ្ឌាយ បដិក្កមេយ្យ, សចស្ស ភុត្តាវសេសោ, សចេ អាកង្ខេយ្យ ភុញ្ជេយ្យ, នោ ចេ អាកង្ខេយ្យ អប្បហរិតេ វា ឆឌ្ឌេយ្យ, អប្បាណកេ វា ឧទកេ ឱបិលាបេយ្យ; សោ អាសនំ ឧទ្ធរេយ្យ, បាទោទកំ បាទបីឋំ បាទកថលិកំ បដិសាមេយ្យ, អវក្ការបាតិំ ធោវិត្វា បដិសាមេយ្យ, បានីយំ បរិភោជនីយំ បដិសាមេយ្យ, ភត្តគ្គំ សម្មជ្ជេយ្យ; យោ បស្សេយ្យ បានីយឃដំ វា បរិភោជនីយឃដំ វា វច្ចឃដំ វា រិត្តំ តុច្ឆំ សោ ឧបដ្ឋាបេយ្យ; សចស្ស ហោតិ អវិសយ្ហំ, ហត្ថវិការេន ទុតិយំ អាមន្តេត្វា ហត្ថវិលង្ឃកេន ឧបដ្ឋាបេយ្យ; ន ត្វេវ តប្បច្ចយា វាចំ ភិន្ទេយ្យ – ឯវំ ខោ មយំ សមគ្គា សម្មោទមានា អវិវទមានា ផាសុកំ វស្សំ វសេយ្យាម, ន ច បិណ្ឌកេន កិលមេយ្យាមា’’តិ។ អថ ខោ តេ ភិក្ខូ អញ្ញមញ្ញំ នេវ អាលបិំសុ, ន សល្លបិំសុ។ យោ បឋមំ គាមតោ បិណ្ឌាយ បដិក្កមតិ, សោ អាសនំ បញ្ញបេតិ, បាទោទកំ បាទបីឋំ បាទកថលិកំ ឧបនិក្ខិបតិ, អវក្ការបាតិំ ធោវិត្វា ឧបដ្ឋាបេតិ, បានីយំ បរិភោជនីយំ ឧបដ្ឋាបេតិ ។ យោ បច្ឆា គាមតោ បិណ្ឌាយ បដិក្កមតិ, សចេ ហោតិ ភុត្តាវសេសោ, សចេ អាកង្ខតិ ភុញ្ជតិ, នោ ចេ អាកង្ខតិ អប្បហរិតេ វា ឆឌ្ឌេតិ, អប្បាណកេ វា ឧទកេ ឱបិលាបេតិ; សោ អាសនំ ឧទ្ធរតិ, បាទោទកំ បាទបីឋំ បាទកថលិកំ បដិសាមេតិ, អវក្ការបាតិំ ធោវិត្វា បដិសាមេតិ, បានីយំ បរិភោជនីយំ បដិសាមេតិ, ភត្តគ្គំ សម្មជ្ជតិ។ យោ បស្សតិ បានីយឃដំ វា បរិភោជនីយឃដំ វា វច្ចឃដំ វា រិត្តំ តុច្ឆំ សោ ឧបដ្ឋាបេតិ។ សចស្ស ហោតិ អវិសយ្ហំ, ហត្ថវិការេន ទុតិយំ អាមន្តេត្វា ហត្ថវិលង្ឃកេន ឧបដ្ឋាបេតិ, ន ត្វេវ តប្បច្ចយា វាចំ ភិន្ទតិ។

អាចិណ្ណំ ខោ បនេតំ វស្សំវុដ្ឋានំ ភិក្ខូនំ ភគវន្តំ ទស្សនាយ ឧបសង្កមិតុំ។ អថ ខោ តេ ភិក្ខូ វស្សំវុដ្ឋា តេមាសច្ចយេន សេនាសនំ សំសាមេត្វា បត្តចីវរមាទាយ យេន សាវត្ថិ តេន បក្កមិំសុ។ អនុបុព្ពេន យេន សាវត្ថិ ជេតវនំ អនាថបិណ្ឌិកស្ស អារាមោ យេន ភគវា តេនុបសង្កមិំសុ, ឧបសង្កមិត្វា ភគវន្តំ អភិវាទេត្វា ឯកមន្តំ និសីទិំសុ។ អាចិណ្ណំ ខោ បនេតំ ពុទ្ធានំ ភគវន្តានំ អាគន្តុកេហិ ភិក្ខូហិ សទ្ធិំ បដិសម្មោទិតុំ។ អថ ខោ ភគវា តេ ភិក្ខូ ឯតទវោច – ‘‘កច្ចិ, ភិក្ខវេ, ខមនីយំ, កច្ចិ យាបនីយំ, កច្ចិ សមគ្គា សម្មោទមានា អវិវទមានា ផាសុកំ វស្សំ វសិត្ថ, ន ច បិណ្ឌកេន កិលមិត្ថា’’តិ? ‘‘ខមនីយំ ភគវា, យាបនីយំ ភគវា។ សមគ្គា ច មយំ, ភន្តេ, សម្មោទមានា អវិវទមានា ផាសុកំ វស្សំ វសិម្ហា, ន ច បិណ្ឌកេន កិលមិម្ហា’’តិ។ ជានន្តាបិ តថាគតា បុច្ឆន្តិ, ជានន្តាបិ ន បុច្ឆន្តិ។ កាលំ វិទិត្វា បុច្ឆន្តិ, កាលំ វិទិត្វា ន បុច្ឆន្តិ។ អត្ថសំហិតំ តថាគតា បុច្ឆន្តិ, នោ អនត្ថសំហិតំ។ អនត្ថសំហិតេ សេតុឃាតោ តថាគតានំ។ ទ្វីហាការេហិ ពុទ្ធា ភគវន្តោ ភិក្ខូ បដិបុច្ឆន្តិ – ធម្មំ វា ទេសេស្សាម, សាវកានំ វា សិក្ខាបទំ បញ្ញបេស្សាមាតិ។ អថ ខោ ភគវា តេ ភិក្ខូ ឯតទវោច – ‘‘យថាកថំ បន តុម្ហេ, ភិក្ខវេ, សមគ្គា សម្មោទមានា អវិវទមានា ផាសុកំ វស្សំ វសិត្ថ, ន ច បិណ្ឌកេន កិលមិត្ថា’’តិ។

ឥធ មយំ, ភន្តេ, សម្ពហុលា សន្ទិដ្ឋា សម្ភត្តា ភិក្ខូ កោសលេសុ ជនបទេ អញ្ញតរស្មិំ អាវាសេ វស្សំ ឧបគច្ឆិម្ហា។ តេសំ នោ, ភន្តេ, អម្ហាកំ ឯតទហោសិ – ‘‘កេន នុ ខោ មយំ ឧបាយេន សមគ្គា សម្មោទមានា អវិវទមានា ផាសុកំ វស្សំ វសេយ្យាម, ន ច បិណ្ឌកេន កិលមេយ្យាមា’’តិ។ តេសំ នោ, ភន្តេ, អម្ហាកំ ឯតទហោសិ – ‘‘សចេ ខោ មយំ អញ្ញមញ្ញំ នេវ អាលបេយ្យាម ន សល្លបេយ្យាម – យោ បឋមំ គាមតោ បិណ្ឌាយ បដិក្កមេយ្យ សោ អាសនំ បញ្ញបេយ្យ, បាទោទកំ បាទបីឋំ បាទកថលិកំ ឧបនិក្ខិបេយ្យ, អវក្ការបាតិំ ធោវិត្វា ឧបដ្ឋាបេយ្យ, បានីយំ បរិភោជនីយំ ឧបដ្ឋាបេយ្យ; យោ បច្ឆា គាមតោ បិណ្ឌាយ បដិក្កមេយ្យ, សចស្ស ភុត្តាវសេសោ , សចេ អាកង្ខេយ្យ ភុញ្ជេយ្យ, នោ ចេ អាកង្ខេយ្យ អប្បហរិតេ វា ឆឌ្ឌេយ្យ, អប្បាណកេ វា ឧទកេ ឱបិលាបេយ្យ; សោ អាសនំ ឧទ្ធរេយ្យ, បាទោទកំ បាទបីឋំ បាទកថលិកំ បដិសាមេយ្យ , អវក្ការបាតិំ ធោវិត្វា បដិសាមេយ្យ, បានីយំ បរិភោជនីយំ បដិសាមេយ្យ, ភត្តគ្គំ សម្មជ្ជេយ្យ; យោ បស្សេយ្យ បានីយឃដំ វា បរិភោជនីយឃដំ វា វច្ចឃដំ វា រិត្តំ តុច្ឆំ សោ ឧបដ្ឋាបេយ្យ; សចស្ស ហោតិ អវិសយ្ហំ, ហត្ថវិការេន ទុតិយំ អាមន្តេត្វា ហត្ថវិលង្ឃកេន ឧបដ្ឋាបេយ្យ; ន ត្វេវ តប្បច្ចយា វាចំ ភិន្ទេយ្យ – ឯវំ ខោ មយំ សមគ្គា សម្មោទមានា អវិវទមានា ផាសុកំ វស្សំ វសេយ្យាម, ន ច បិណ្ឌកេន កិលមេយ្យាមា’’តិ។ អថ ខោ មយំ, ភន្តេ, អញ្ញមញ្ញំ នេវ អាលបិម្ហា ន សល្លវិម្ហា។ យោ បឋមំ គាមតោ បិណ្ឌាយ បដិក្កមតិ សោ អាសនំ បញ្ញបេតិ, បាទោទកំ បាទបីឋំ បាទកថលិកំ ឧបនិក្ខិបតិ, អវក្ការបាតិំ ធោវិត្វា ឧបដ្ឋាបេតិ, បានីយំ បរិភោជនីយំ ឧបដ្ឋាបេតិ។ យោ បច្ឆា គាមតោ បិណ្ឌាយ បដិក្កមតិ, សចេ ហោតិ ភុត្តាវសេសោ, សចេ អាកង្ខតិ ភុញ្ជតិ, នោ ចេ អាកង្ខតិ អប្បហរិតេ វា ឆឌ្ឌេតិ, អប្បាណកេ វា ឧទកេ ឱបិលាបេតិ, សោ អាសនំ ឧទ្ធរតិ, បាទោទកំ បាទបីឋំ បាទកថលិកំ បដិសាមេតិ, អវក្ការបាតិំ ធោវិត្វា បដិសាមេតិ, បានីយំ បរិភោជនីយំ បដិសាមេតិ, ភត្តគ្គំ សម្មជ្ជតិ។ យោ បស្សតិ បានីយឃដំ វា បរិភោជនីយឃដំ វា វច្ចឃដំ វា រិត្តំ តុច្ឆំ សោ ឧបដ្ឋាបេតិ។ សចស្ស ហោតិ អវិសយ្ហំ, ហត្ថវិការេន ទុតិយំ អាមន្តេត្វា ហត្ថវិលង្ឃកេន ឧបដ្ឋាបេតិ, ន ត្វេវ តប្បច្ចយា វាចំ ភិន្ទតិ។ ឯវំ ខោ មយំ, ភន្តេ, សមគ្គា សម្មោទមានា អវិវទមានា ផាសុកំ វស្សំ វសិម្ហា, ន ច បិណ្ឌកេន កិលមិម្ហាតិ។

អថ ខោ ភគវា ភិក្ខូ អាមន្តេសិ – ‘‘អផាសុញ្ញេវ អផាសុកញ្ញេវ (សី.) កិរមេ កិរិមេ (ក.), ភិក្ខវេ, មោឃបុរិសា វុដ្ឋា វុត្ថា (ក.) សមានា ផាសុម្ហា ផាសុកម្ហា (សី.) វុដ្ឋាតិ បដិជានន្តិ។ បសុសំវាសញ្ញេវ កិរមេ, ភិក្ខវេ, មោឃបុរិសា វុដ្ឋា សមានា ផាសុម្ហា វុដ្ឋាតិ បដិជានន្តិ។ ឯឡកសំវាសញ្ញេវ កិរមេ, ភិក្ខវេ, មោឃបុរិសា វុដ្ឋា សមានា ផាសុម្ហា វុដ្ឋាតិ បដិជានន្តិ។ សបត្តសំវាសញ្ញេវ កិរមេ, ភិក្ខវេ, មោឃបុរិសា វុដ្ឋា សមានា ផាសុម្ហា វុដ្ឋាតិ បដិជានន្តិ។ កថញ្ហិ នាមិមេ, ភិក្ខវេ, មោឃបុរិសា មូគព្ពតំ តិត្ថិយសមាទានំ សមាទិយិស្ស’’ន្តិ។ នេតំ, ភិក្ខវេ, អប្បសន្នានំ វា បសាទាយ…បេ.… វិគរហិត្វា ធម្មិំ កថំ កត្វា ភិក្ខូ អាមន្តេសិ – ន, ភិក្ខវេ, មូគព្ពតំ តិត្ថិយសមាទានំ សមាទិយិតព្ពំ។ យោ សមាទិយេយ្យ, អាបត្តិ ទុក្កដស្ស។ អនុជានាមិ, ភិក្ខវេ, វស្សំវុដ្ឋានំ ភិក្ខូនំ តីហិ ឋានេហិ បវារេតុំ – ទិដ្ឋេន វា សុតេន វា បរិសង្កាយ វា។ សា វោ ភវិស្សតិ អញ្ញមញ្ញានុលោមតា អាបត្តិវុដ្ឋានតា វិនយបុរេក្ខារតា។ ឯវញ្ច បន, ភិក្ខវេ, បវារេតព្ពំ។ ព្យត្តេន ភិក្ខុនា បដិពលេន សង្ឃោ ញាបេតព្ពោ –

២១០. ‘‘សុណាតុ មេ, ភន្តេ, សង្ឃោ។ អជ្ជ បវារណា។ យទិ សង្ឃស្ស បត្តកល្លំ, សង្ឃោ បវារេយ្យា’’តិ។

ថេរេន ភិក្ខុនា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘សង្ឃំ, អាវុសោ, បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តោ អនុកម្បំ ឧបាទាយ។ បស្សន្តោ បដិករិស្សាមិ។ ទុតិយម្បិ, អាវុសោ, សង្ឃំ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តោ អនុកម្បំ ឧបាទាយ។ បស្សន្តោ បដិករិស្សាមិ។ តតិយម្បិ, អាវុសោ, សង្ឃំ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តោ អនុកម្បំ ឧបាទាយ។ បស្សន្តោ បដិករិស្សាមី’’តិ។

នវកេន ភិក្ខុនា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘សង្ឃំ, ភន្តេ, បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តោ អនុកម្បំ ឧបាទាយ។ បស្សន្តោ បដិករិស្សាមិ។ ទុតិយម្បិ, ភន្តេ, សង្ឃំ…បេ.… តតិយម្បិ, ភន្តេ, សង្ឃំ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តោ អនុកម្បំ ឧបាទាយ។ បស្សន្តោ បដិករិស្សាមី’’តិ។

២១១. តេន ខោ បន សមយេន ឆព្ពគ្គិយា ភិក្ខូ ថេរេសុ ភិក្ខូសុ ឧក្កុដិកំ និសិន្នេសុ បវារយមានេសុ អាសនេសុ អច្ឆន្តិ។ យេ តេ ភិក្ខូ អប្បិច្ឆា…បេ.… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ ថេរេសុ ភិក្ខូសុ ឧក្កុដិកំ និសិន្នេសុ បវារយមានេសុ អាសនេសុ អច្ឆិស្សន្តី’’តិ។ អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ.… ‘‘សច្ចំ កិរ, ភិក្ខវេ, ឆព្ពគ្គិយា ភិក្ខូ ថេរេសុ ភិក្ខូសុ ឧក្កុដិកំ និសិន្នេសុ បវារយមានេសុ អាសនេសុ អច្ឆន្តី’’តិ? ‘‘សច្ចំ, ភគវា’’តិ។ វិគរហិ ពុទ្ធោ ភគវា…បេ.… ‘‘កថញ្ហិ នាម តេ, ភិក្ខវេ, មោឃបុរិសា ថេរេសុ ភិក្ខូសុ ឧក្កុដិកំ និសិន្នេសុ បវារយមានេសុ អាសនេសុ អច្ឆិស្ស’’ន្តិ។ នេតំ, ភិក្ខវេ, អប្បសន្នានំ វា បសាទាយ, បសន្នានំ វា ភិយ្យោភាវាយ…បេ.… វិគរហិត្វា ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, ថេរេសុ ភិក្ខូសុ ឧក្កុដិកំ និសិន្នេសុ បវារយមានេសុ អាសនេសុ អច្ឆិតព្ពំ។ យោ អច្ឆេយ្យ, អាបត្តិ ទុក្កដស្ស។ អនុជានាមិ, ភិក្ខវេ, សព្ពេហេវ ឧក្កុដិកំ និសិន្នេហិ បវារេតុ’’ន្តិ។

តេន ខោ បន សមយេន អញ្ញតរោ ថេរោ ជរាទុព្ពលោ យាវ សព្ពេ បវារេន្តីតិ យាវ សព្ពេ បវារេន្តិ (ស្យា.) ឧក្កុដិកំ និសិន្នោ អាគមយមានោ មុច្ឆិតោ បបតិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, តទមន្តរា ឧក្កុដិកំ និសីទិតុំ យាវ បវារេតិ, បវារេត្វា អាសនេ និសីទិតុន្តិ។

អផាសុកវិហារោ និដ្ឋិតោ។

១២១. បវារណាភេទា

២១២. អថ ខោ ភិក្ខូនំ ឯតទហោសិ – ‘‘កតិ នុ ខោ បវារណា’’តិ? ភគវតោ ឯតមត្ថំ អារោចេសុំ។ ទ្វេមា, ភិក្ខវេ, បវារណា – ចាតុទ្ទសិកា ច បន្នរសិកា ច។ ឥមា ខោ, ភិក្ខវេ, ទ្វេ បវារណាតិ។

អថ ខោ ភិក្ខូនំ ឯតទហោសិ – ‘‘កតិ នុ ខោ បវារណកម្មានី’’តិ? បវារណាកម្មានីតិ (ស្យា.) ភគវតោ ឯតមត្ថំ អារោចេសុំ។ ចត្តារិមានិ, ភិក្ខវេ, បវារណកម្មានិ – អធម្មេន វគ្គំ បវារណកម្មំ, អធម្មេន សមគ្គំ បវារណកម្មំ, ធម្មេន វគ្គំ បវារណកម្មំ, ធម្មេន សមគ្គំ បវារណកម្មំ។ តត្រ, ភិក្ខវេ, យទិទំ អធម្មេន វគ្គំ បវារណកម្មំ, ន, ភិក្ខវេ, ឯវរូបំ បវារណកម្មំ កាតព្ពំ; ន ច មយា ឯវរូបំ បវារណកម្មំ អនុញ្ញាតំ។ តត្រ, ភិក្ខវេ, យទិទំ អធម្មេន សមគ្គំ បវារណកម្មំ, ន, ភិក្ខវេ, ឯវរូបំ បវារណកម្មំ កាតព្ពំ; ន ច មយា ឯវរូបំ បវារណកម្មំ អនុញ្ញាតំ។ តត្រ, ភិក្ខវេ, យទិទំ ធម្មេន វគ្គំ បវារណកម្មំ, ន, ភិក្ខវេ, ឯវរូបំ បវារណកម្មំ កាតព្ពំ; ន ច មយា ឯវរូបំ បវារណកម្មំ អនុញ្ញាតំ។ តត្រ, ភិក្ខវេ, យទិទំ ធម្មេន សមគ្គំ បវារណកម្មំ, ឯវរូបំ, ភិក្ខវេ, បវារណកម្មំ កាតព្ពំ; ឯវរូបញ្ច មយា បវារណកម្មំ អនុញ្ញាតំ។ តស្មាតិហ, ភិក្ខវេ, ឯវរូបំ បវារណកម្មំ ករិស្សាម យទិទំ ធម្មេន សមគ្គន្តិ, ឯវញ្ហិ វោ, ភិក្ខវេ, សិក្ខិតព្ពន្តិ។

បវារណាភេទា និដ្ឋិតា។

១២២. បវារណាទានានុជាននា

២១៣. អថ ខោ ភគវា ភិក្ខូ អាមន្តេសិ – ‘‘សន្និបតថ, ភិក្ខវេ។ សង្ឃោ បវារេស្សតី’’តិ។ ឯវំ វុត្តេ អញ្ញតរោ ភិក្ខុ ភគវន្តំ ឯតទវោច – ‘‘អត្ថិ, ភន្តេ, ភិក្ខុ គិលានោ , សោ អនាគតោ’’តិ។ អនុជានាមិ, ភិក្ខវេ, គិលានេន ភិក្ខុនា បវារណំ ទាតុំ។ ឯវញ្ច បន, ភិក្ខវេ, ទាតព្ពា – តេន គិលានេន ភិក្ខុនា ឯកំ ភិក្ខុំ ឧបសង្កមិត្វា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘បវារណំ ទម្មិ, បវារណំ មេ ហរ, បវារណំ មេ អារោចេហិ, មមត្ថាយ បវារេហី’’តិ កាយេន វិញ្ញាបេតិ, វាចាយ វិញ្ញាបេតិ, កាយេន វាចាយ វិញ្ញាបេតិ, ទិន្នា ហោតិ បវារណា; ន កាយេន វិញ្ញាបេតិ, ន វាចាយ វិញ្ញាបេតិ, ន កាយេន វាចាយ វិញ្ញាបេតិ, ន ទិន្នា ហោតិ បវារណា។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, សោ, ភិក្ខវេ, គិលានោ ភិក្ខុ មញ្ចេន វា បីឋេន វា សង្ឃមជ្ឈេ អានេត្វា បវារេតព្ពំ។ សចេ, ភិក្ខវេ, គិលានុបដ្ឋាកានំ ភិក្ខូនំ ឯតទហោសិ – ‘‘សចេ ខោ មយំ គិលានំ ឋានា ចាវេស្សាម, អាពាធោ វា អភិវឌ្ឍិស្សតិ, កាលំកិរិយា វា ភវិស្សតី’’តិ ន, ភិក្ខវេ, គិលានោ ភិក្ខុ ឋានា ចាវេតព្ពោ។ សង្ឃេន តត្ថ គន្ត្វា បវារេតព្ពំ; ន ត្វេវ វគ្គេន សង្ឃេន បវារេតព្ពំ។ បវារេយ្យ ចេ, អាបត្តិ ទុក្កដស្ស។

បវារណហារកោ បវារណាហារកោ (ស្យា.) ចេ, ភិក្ខវេ, ទិន្នាយ បវារណាយ តត្ថេវ បក្កមតិ, អញ្ញស្ស ទាតព្ពា បវារណា។ បវារណហារកោ ចេ, ភិក្ខវេ, ទិន្នាយ បវារណាយ តត្ថេវ វិព្ភមតិ…បេ.… កាលំករោតិ… សាមណេរោ បដិជានាតិ… សិក្ខំ បច្ចក្ខាតកោ បដិជានាតិ… អន្តិមវត្ថុំ អជ្ឈាបន្នកោ បដិជានាតិ… ឧម្មត្តកោ បដិជានាតិ… ខិត្តចិត្តោ បដិជានាតិ… វេទនាដ្ដោ បដិជានាតិ… អាបត្តិយា អទស្សនេ ឧក្ខិត្តកោ បដិជានាតិ… អាបត្តិយា អប្បដិកម្មេ ឧក្ខិត្តកោ បដិជានាតិ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកោ បដិជានាតិ… បណ្ឌកោ បដិជានាតិ… ថេយ្យសំវាសកោ បដិជានាតិ… តិត្ថិយបក្កន្តកោ បដិជានាតិ… តិរច្ឆានគតោ បដិជានាតិ… មាតុឃាតកោ បដិជានាតិ… បិតុឃាតកោ បដិជានាតិ… អរហន្តឃាតកោ បដិជានាតិ… ភិក្ខុនិទូសកោ បដិជានាតិ… សង្ឃភេទកោ បដិជានាតិ … លោហិតុប្បាទកោ បដិជានាតិ… ឧភតោព្យញ្ជនកោ បដិជានាតិ, អញ្ញស្ស ទាតព្ពា បវារណា។

បវារណហារកោ ចេ, ភិក្ខវេ, ទិន្នាយ បវារណាយ អន្តរាមគ្គេ បក្កមតិ, អនាហដា ហោតិ បវារណា។ បវារណហារកោ ចេ, ភិក្ខវេ, ទិន្នាយ បវារណាយ អន្តរាមគ្គេ វិព្ភមតិ…បេ.… កាលំករោតិ… សាមណេរោ បដិជានាតិ… សិក្ខំ បច្ចក្ខាតកោ បដិជានាតិ… អន្តិមវត្ថុំ អជ្ឈាបន្នកោ បដិជានាតិ… ឧម្មត្តកោ បដិជានាតិ… ខិត្តចិត្តោ បដិជានាតិ… វេទនាដ្ដោ បដិជានាតិ… អាបត្តិយា អទស្សនេ ឧក្ខិត្តកោ បដិជានាតិ… អាបត្តិយា អប្បដិកម្មេ ឧក្ខិត្តកោ បដិជានាតិ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកោ បដិជានាតិ… បណ្ឌកោ បដិជានាតិ… ថេយ្យសំវាសកោ បដិជានាតិ… តិត្ថិយបក្កន្តកោ បដិជានាតិ… តិរច្ឆានគតោ បដិជានាតិ… មាតុឃាតកោ បដិជានាតិ… បិតុឃាតកោ បដិជានាតិ… អរហន្តឃាតកោ បដិជានាតិ… ភិក្ខុនិទូសកោ បដិជានាតិ… សង្ឃភេទកោ បដិជានាតិ… លោហិតុប្បាទកោ បដិជានាតិ… ឧភតោព្យញ្ជនកោ បដិជានាតិ, អនាហដា ហោតិ បវារណា។

បវារណហារកោ ចេ, ភិក្ខវេ, ទិន្នាយ បវារណាយ សង្ឃប្បត្តោ បក្កមតិ, អាហដា ហោតិ បវារណា។ បវារណហារកោ ចេ, ភិក្ខវេ, ទិន្នាយ បវារណាយ សង្ឃប្បត្តោ វិព្ភមតិ…បេ.… កាលំករោតិ… សាមណេរោ បដិជានាតិ… សិក្ខំ បច្ចក្ខាតកោ បដិជានាតិ… អន្តិមវត្ថុំ អជ្ឈាបន្នកោ បដិជានាតិ… ឧម្មត្តកោ បដិជានាតិ… ខិត្តចិត្តោ បដិជានាតិ… វេទនាដ្ដោ បដិជានាតិ… អាបត្តិយា អទស្សនេ ឧក្ខិត្តកោ បដិជានាតិ… អាបត្តិយា អប្បដិកម្មេ ឧក្ខិត្តកោ បដិជានាតិ… បាបិកាយ ទិដ្ឋិយា អប្បដិនិស្សគ្គេ ឧក្ខិត្តកោ បដិជានាតិ… បណ្ឌកោ បដិជានាតិ… ថេយ្យសំវាសកោ បដិជានាតិ… តិត្ថិយបក្កន្តកោ បដិជានាតិ… តិរច្ឆានគតោ បដិជានាតិ… មាតុឃាតកោ បដិជានាតិ… បិតុឃាតកោ បដិជានាតិ… អរហន្តឃាតកោ បដិជានាតិ… ភិក្ខុនិទូសកោ បដិជានាតិ… សង្ឃភេទកោ បដិជានាតិ… លោហិតុប្បាទកោ បដិជានាតិ… ឧភតោព្យញ្ជនកោ បដិជានាតិ, អាហដា ហោតិ បវារណា។

បវារណហារកោ ចេ, ភិក្ខវេ, ទិន្នាយ បវារណាយ សង្ឃប្បត្តោ សុត្តោ នារោចេតិ, អាហដា ហោតិ បវារណា។ បវារណហារកស្ស អនាបត្តិ ។ បវារណហារកោ ចេ, ភិក្ខវេ, ទិន្នាយ បវារណាយ សង្ឃប្បត្តោ បមត្តោ នារោចេតិ…បេ.… សមាបន្នោ នារោចេតិ, អាហដា ហោតិ បវារណា។ បវារណហារកស្ស អនាបត្តិ។

បវារណហារកោ ចេ, ភិក្ខវេ , ទិន្នាយ បវារណាយ សង្ឃប្បត្តោ សញ្ចិច្ច នារោចេតិ, អាហដា ហោតិ បវារណា។ បវារណហារកស្ស អាបត្តិ ទុក្កដស្ស។ អនុជានាមិ, ភិក្ខវេ, តទហុ បវារណាយ បវារណំ ទេន្តេន ឆន្ទម្បិ ទាតុំ, សន្តិ សង្ឃស្ស ករណីយន្តិ។

បវារណាទានានុជាននា និដ្ឋិតា។

១២៣. ញាតកាទិគ្គហណកថា

២១៤. តេន ខោ បន សមយេន អញ្ញតរំ ភិក្ខុំ តទហុ បវារណាយ ញាតកា គណ្ហិំសុ។ ភគវតោ ឯតមត្ថំ អារោចេសុំ។ ឥធ បន, ភិក្ខវេ, ភិក្ខុំ តទហុ បវារណាយ ញាតកា គណ្ហន្តិ។ តេ ញាតកា ភិក្ខូហិ ឯវមស្សុ វចនីយា – ‘‘ឥង្ឃ, តុម្ហេ អាយស្មន្តោ ឥមំ ភិក្ខុំ មុហុត្តំ មុញ្ចថ, យាវាយំ ភិក្ខុ បវារេតី’’តិ។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, តេ ញាតកា ភិក្ខូហិ ឯវមស្សុ វចនីយា – ‘‘ឥង្ឃ, តុម្ហេ អាយស្មន្តោ មុហុត្តំ ឯកមន្តំ ហោថ, យាវាយំ ភិក្ខុ បវារណំ ទេតី’’តិ។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, តេ ញាតកា ភិក្ខូហិ ឯវមស្សុ វចនីយា – ‘‘ឥង្ឃ, តុម្ហេ អាយស្មន្តោ ឥមំ ភិក្ខុំ មុហុត្តំ និស្សីមំ នេថ, យាវ សង្ឃោ បវារេតី’’តិ។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, ន ត្វេវ វគ្គេន សង្ឃេន បវារេតព្ពំ។ បវារេយ្យ ចេ, អាបត្តិ ទុក្កដស្ស។

ឥធ បន, ភិក្ខវេ, ភិក្ខុំ តទហុ បវារណាយ រាជានោ គណ្ហន្តិ…បេ.… ចោរា គណ្ហន្តិ … ធុត្តា គណ្ហន្តិ… ភិក្ខុបច្ចត្ថិកា គណ្ហន្តិ។ តេ ភិក្ខុបច្ចត្ថិកា ភិក្ខូហិ ឯវមស្សុ វចនីយា – ‘‘ឥង្ឃ, តុម្ហេ អាយស្មន្តោ ឥមំ ភិក្ខុំ មុហុត្តំ មុញ្ចថ, យាវាយំ ភិក្ខុ បវារេតី’’តិ ។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, តេ ភិក្ខុបច្ចត្ថិកា ភិក្ខូហិ ឯវមស្សុ វចនីយា – ‘‘ឥង្ឃ, តុម្ហេ អាយស្មន្តោ មុហុត្តំ ឯកមន្តំ ហោថ, យាវាយំ ភិក្ខុ បវារណំ ទេតី’’តិ។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, តេ ភិក្ខុបច្ចត្ថិកា ភិក្ខូហិ ឯវមស្សុ វចនីយា – ‘‘ឥង្ឃ, តុម្ហេ អាយស្មន្តោ ឥមំ ភិក្ខុំ មុហុត្តំ និស្សីមំ នេថ, យាវ សង្ឃោ បវារេតី’’តិ។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, ន ត្វេវ វគ្គេន សង្ឃេន បវារេតព្ពំ។ បវារេយ្យ ចេ, អាបត្តិ ទុក្កដស្សាតិ។

ញាតកាទិគ្គហណកថា និដ្ឋិតា។

១២៤. សង្ឃបវារណាទិប្បភេទា

២១៥. តេន ខោ បន សមយេន អញ្ញតរស្មិំ អាវាសេ តទហុ បវារណាយ បញ្ច ភិក្ខូ វិហរន្តិ។ អថ ខោ តេសំ ភិក្ខូនំ ឯតទហោសិ – ‘‘ភគវតា បញ្ញត្តំ ‘សង្ឃេន បវារេតព្ព’ន្តិ។ មយញ្ចម្ហា បញ្ច ជនា។ កថំ នុ ខោ អម្ហេហិ បវារេតព្ព’’ន្តិ? ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, បញ្ចន្នំ សង្ឃេ បវារេតុន្តិ។

២១៦. តេន ខោ បន សមយេន អញ្ញតរស្មិំ អាវាសេ តទហុ បវារណាយ ចត្តារោ ភិក្ខូ វិហរន្តិ។ អថ ខោ តេសំ ភិក្ខូនំ ឯតទហោសិ – ‘‘ភគវតា អនុញ្ញាតំ បញ្ចន្នំ សង្ឃេ បវារេតុន្តិ។ មយញ្ចម្ហា ចត្តារោ ជនា។ កថំ នុ ខោ អម្ហេហិ បវារេតព្ព’’ន្តិ? ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, ចតុន្នំ អញ្ញមញ្ញំ បវារេតុំ។ ឯវញ្ច បន, ភិក្ខវេ, បវារេតព្ពំ។ ព្យត្តេន ភិក្ខុនា បដិពលេន តេ ភិក្ខូ ញាបេតព្ពា –

‘‘សុណន្តុ មេ អាយស្មន្តោ។ អជ្ជ បវារណា។ យទាយស្មន្តានំ បត្តកល្លំ, មយំ អញ្ញមញ្ញំ បវារេយ្យាមា’’តិ។

ថេរេន ភិក្ខុនា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា តេ ភិក្ខូ ឯវមស្សុ វចនីយា – ‘‘អហំ, អាវុសោ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តោ អនុកម្បំ ឧបាទាយ។ បស្សន្តោ បដិករិស្សាមិ។ ទុតិយម្បិ…បេ.… តតិយម្បិ អហំ, អាវុសោ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តោ អនុកម្បំ ឧបាទាយ។ បស្សន្តោ បដិករិស្សាមី’’តិ។

នវកេន ភិក្ខុនា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា តេ ភិក្ខូ ឯវមស្សុ វចនីយា – ‘‘អហំ, ភន្តេ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តោ អនុកម្បំ ឧបាទាយ។ បស្សន្តោ បដិករិស្សាមិ។ ទុតិយម្បិ…បេ.… តតិយម្បិ អហំ, ភន្តេ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តោ អនុកម្បំ ឧបាទាយ។ បស្សន្តោ បដិករិស្សាមី’’តិ។

តេន ខោ បន សមយេន អញ្ញតរស្មិំ អាវាសេ តទហុ បវារណាយ តយោ ភិក្ខូ វិហរន្តិ។ អថ ខោ តេសំ ភិក្ខូនំ ឯតទហោសិ – ‘‘ភគវតា អនុញ្ញាតំ បញ្ចន្នំ សង្ឃេ បវារេតុំ, ចតុន្នំ អញ្ញមញ្ញំ បវារេតុំ។ មយញ្ចម្ហា តយោ ជនា។ កថំ នុ ខោ អម្ហេហិ បវារេតព្ព’’ន្តិ? ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, តិណ្ណំ អញ្ញមញ្ញំ បវារេតុំ។ ឯវញ្ច បន, ភិក្ខវេ, បវារេតព្ពំ។ ព្យត្តេន ភិក្ខុនា បដិពលេន តេ ភិក្ខូ ញាបេតព្ពា –

‘‘សុណន្តុ មេ អាយស្មន្តា។ អជ្ជ បវារណា។ យទាយស្មន្តានំ បត្តកល្លំ, មយំ អញ្ញមញ្ញំ បវារេយ្យាមា’’តិ។

ថេរេន ភិក្ខុនា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា តេ ភិក្ខូ ឯវមស្សុ វចនីយា – ‘‘អហំ, អាវុសោ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តា អនុកម្បំ ឧបាទាយ។ បស្សន្តោ បដិករិស្សាមិ។ ទុតិយម្បិ…បេ.… តតិយម្បិ អហំ, អាវុសោ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តា អនុកម្បំ ឧបាទាយ។ បស្សន្តោ បដិករិស្សាមី’’តិ។

នវកេន ភិក្ខុនា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា តេ ភិក្ខូ ឯវមស្សុ វចនីយា – ‘‘អហំ, ភន្តេ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តា អនុកម្បំ ឧបាទាយ។ បស្សន្តោ បដិករិស្សាមិ។ ទុតិយម្បិ…បេ.… តតិយម្បិ អហំ, ភន្តេ, អាយស្មន្តេ បវារេមិ ទិដ្ឋេន វា សុតេន វា បរិសង្កាយ វា។ វទន្តុ មំ អាយស្មន្តា អនុកម្បំ ឧបាទាយ។ បស្សន្តោ បដិករិស្សាមី’’តិ ។

២១៧. តេន ខោ បន សមយេន អញ្ញតរស្មិំ អាវាសេ តទហុ បវារណាយ ទ្វេ ភិក្ខូ វិហរន្តិ។ អថ ខោ តេសំ ភិក្ខូនំ ឯតទហោសិ – ‘‘ភគវតា អនុញ្ញាតំ បញ្ចន្នំ សង្ឃេ បវារេតុំ, ចតុន្នំ អញ្ញមញ្ញំ បវារេតុំ, តិណ្ណំ អញ្ញមញ្ញំ បវារេតុំ។ មយញ្ចម្ហា ទ្វេ ជនា។ កថំ នុ ខោ អម្ហេហិ បវារេតព្ព’’ន្តិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, ទ្វិន្នំ អញ្ញមញ្ញំ បវារេតុំ។ ឯវញ្ច បន, ភិក្ខវេ, បវារេតព្ពំ។ ថេរេន ភិក្ខុនា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា នវោ ភិក្ខុ ឯវមស្ស វចនីយោ – ‘‘អហំ, អាវុសោ, អាយស្មន្តំ បវារេមិ ទិដ្ឋេន វា សុតេន វា បរិសង្កាយ វា។ វទតុ មំ អាយស្មា អនុកម្បំ ឧបាទាយ។ បស្សន្តោ បដិករិស្សាមិ។ ទុតិយម្បិ…បេ.… តតិយម្បិ អហំ, អាវុសោ, អាយស្មន្តំ បវារេមិ ទិដ្ឋេន វា សុតេន វា បរិសង្កាយ វា។ វទតុ មំ អាយស្មា អនុកម្បំ ឧបាទាយ។ បស្សន្តោ បដិករិស្សាមី’’តិ។

នវកេន ភិក្ខុនា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា ថេរោ ភិក្ខុ ឯវមស្ស វចនីយោ – ‘‘អហំ, ភន្តេ, អាយស្មន្តំ បវារេមិ ទិដ្ឋេន វា សុតេន វា បរិសង្កាយ វា។ វទតុ មំ អាយស្មា អនុកម្បំ ឧបាទាយ។ បស្សន្តោ បដិករិស្សាមិ។ ទុតិយម្បិ…បេ.… តតិយម្បិ អហំ, ភន្តេ, អាយស្មន្តំ បវារេមិ ទិដ្ឋេន វា សុតេន វា បរិសង្កាយ វា។ វទតុ មំ អាយស្មា អនុកម្បំ ឧបាទាយ។ បស្សន្តោ បដិករិស្សាមី’’តិ។

២១៨. តេន ខោ បន សមយេន អញ្ញតរស្មិំ អាវាសេ តទហុ បវារណាយ ឯកោ ភិក្ខុ វិហរតិ។ អថ ខោ តស្ស ភិក្ខុនោ ឯតទហោសិ – ‘‘ភគវតា អនុញ្ញាតំ បញ្ចន្នំ សង្ឃេ បវារេតុំ, ចតុន្នំ អញ្ញមញ្ញំ បវារេតុំ, តិណ្ណំ អញ្ញមញ្ញំ បវារេតុំ, ទ្វិន្នំ អញ្ញមញ្ញំ បវារេតុំ។ អហញ្ចម្ហិ ឯកកោ។ កថំ នុ ខោ មយា បវារេតព្ព’’ន្តិ? ភគវតោ ឯតមត្ថំ អារោចេសុំ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ ឯកោ ភិក្ខុ វិហរតិ។ តេន, ភិក្ខវេ, ភិក្ខុនា យត្ថ ភិក្ខូ បដិក្កមន្តិ ឧបដ្ឋានសាលាយ វា មណ្ឌបេ វា រុក្ខមូលេ វា, សោ ទេសោ សម្មជ្ជិត្វា បានីយំ បរិភោជនីយំ ឧបដ្ឋាបេត្វា អាសនំ បញ្ញបេត្វា បទីបំ កត្វា និសីទិតព្ពំ។ សចេ អញ្ញេ ភិក្ខូ អាគច្ឆន្តិ, តេហិ សទ្ធិំ បវារេតព្ពំ; នោ ចេ អាគច្ឆន្តិ, ‘អជ្ជ មេ បវារណា’តិ អធិដ្ឋាតព្ពំ។ នោ ចេ អធិដ្ឋេយ្យ, អាបត្តិ ទុក្កដស្ស។

តត្រ , ភិក្ខវេ, យត្ថ បញ្ច ភិក្ខូ វិហរន្តិ, ន ឯកស្ស បវារណំ អាហរិត្វា

ចតូហិ សង្ឃេ បវារេតព្ពំ។ បវារេយ្យុំ ចេ, អាបត្តិ ទុក្កដស្ស។ តត្រ, ភិក្ខវេ, យត្ថ ចត្តារោ ភិក្ខូ វិហរន្តិ, ន ឯកស្ស បវារណំ អាហរិត្វា តីហិ អញ្ញមញ្ញំ បវារេតព្ពំ។ បវារេយ្យុំ ចេ, អាបត្តិ ទុក្កដស្ស។ តត្រ, ភិក្ខវេ, យត្ថ តយោ ភិក្ខូ វិហរន្តិ, ន ឯកស្ស បវារណំ អាហរិត្វា ទ្វីហិ អញ្ញមញ្ញំ បវារេតព្ពំ។ បវារេយ្យុំ ចេ, អាបត្តិ ទុក្កដស្ស។ តត្រ, ភិក្ខវេ, យត្ថ ទ្វេ ភិក្ខូ វិហរន្តិ, ន ឯកស្ស បវារណំ អាហរិត្វា ឯកេន អធិដ្ឋាតព្ពំ។ អធិដ្ឋេយ្យ ចេ, អាបត្តិ ទុក្កដស្សាតិ។

សង្ឃបវារណាទិប្បភេទា និដ្ឋិតា។

១២៥. អាបត្តិបដិកម្មវិធិ

២១៩. តេន ខោ បន សមយេន អញ្ញតរោ ភិក្ខុ តទហុ បវារណាយ អាបត្តិំ អាបន្នោ ហោតិ។ អថ ខោ តស្ស ភិក្ខុនោ ឯតទហោសិ – ‘‘ភគវតា បញ្ញត្តំ ‘ន សាបត្តិកេន បវារេតព្ព’ន្តិ។ អហញ្ចម្ហិ អាបត្តិំ អាបន្នោ។ កថំ នុ ខោ មយា បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ អារោចេសិ (ក.)។

ឥធ បន, ភិក្ខវេ, ភិក្ខុ តទហុ បវារណាយ អាបត្តិំ អាបន្នោ ហោតិ។ តេន, ភិក្ខវេ, ភិក្ខុនា ឯកំ ភិក្ខុំ ឧបសង្កមិត្វា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘អហំ, អាវុសោ, ឥត្ថន្នាមំ អាបត្តិំ អាបន្នោ, តំ បដិទេសេមី’’តិ។ តេន វត្តព្ពោ – ‘‘បស្សសី’’តិ។ អាម បស្សាមីតិ។ អាយតិំ សំវរេយ្យាសីតិ។

ឥធ បន, ភិក្ខវេ, ភិក្ខុ តទហុ បវារណាយ អាបត្តិយា វេមតិកោ ហោតិ។ តេន, ភិក្ខវេ, ភិក្ខុនា ឯកំ ភិក្ខុំ ឧបសង្កមិត្វា ឯកំសំ ឧត្តរាសង្គំ ករិត្វា ឧក្កុដិកំ និសីទិត្វា អញ្ជលិំ បគ្គហេត្វា ឯវមស្ស វចនីយោ – ‘‘អហំ, អាវុសោ, ឥត្ថន្នាមាយ អាបត្តិយា វេមតិកោ; យទា និព្ពេមតិកោ ភវិស្សាមិ តទា តំ អាបត្តិំ បដិករិស្សាមី’’តិ វត្វា បវារេតព្ពំ; ន ត្វេវ តប្បច្ចយា បវារណាយ អន្តរាយោ កាតព្ពោតិ។

អាបត្តិបដិកម្មវិធិ និដ្ឋិតា។

១២៦. អាបត្តិអាវិករណវិធិ

២២០. តេន ខោ បន សមយេន អញ្ញតរោ ភិក្ខុ បវារយមានោ អាបត្តិំ សរតិ។ អថ ខោ តស្ស ភិក្ខុនោ ឯតទហោសិ – ‘‘ភគវតា បញ្ញត្តំ ‘ន សាបត្តិកេន បវារេតព្ព’ន្តិ។ អហញ្ចម្ហិ អាបត្តិំ អាបន្នោ។ កថំ នុ ខោ មយា បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ។

ឥធ បន, ភិក្ខវេ, ភិក្ខុ បវារយមានោ អាបត្តិំ សរតិ។ តេន, ភិក្ខវេ, ភិក្ខុនា សាមន្តោ ភិក្ខុ ឯវមស្ស វចនីយោ – ‘‘អហំ, អាវុសោ, ឥត្ថន្នាមំ អាបត្តិំ អាបន្នោ។ ឥតោ វុដ្ឋហិត្វា តំ អាបត្តិំ បដិករិស្សាមី’’តិ វត្វា បវារេតព្ពំ; ន ត្វេវ តប្បច្ចយា បវារណាយ អន្តរាយោ កាតព្ពោ។

ឥធ បន, ភិក្ខវេ, ភិក្ខុ បវារយមានោ អាបត្តិយា វេមតិកោ ហោតិ។ តេន, ភិក្ខវេ,

ភិក្ខុនា សាមន្តោ ភិក្ខុ ឯវមស្ស វចនីយោ – ‘‘អហំ, អាវុសោ, ឥត្ថន្នាមាយ អាបត្តិយា វេមតិកោ; យទា និព្ពេមតិកោ ភវិស្សាមិ តទា តំ អាបត្តិំ បដិករិស្សាមី’’តិ វត្វា បវារេតព្ពំ; ន ត្វេវ តប្បច្ចយា បវារណាយ អន្តរាយោ កាតព្ពោតិ។

អាបត្តិ អាវិករណវិធិ និដ្ឋិតា។

១២៧. សភាគាបត្តិបដិកម្មវិធិ

២២១. តេន ខោ បន សមយេន អញ្ញតរស្មិំ អាវាសេ តទហុ បវារណាយ សព្ពោ សង្ឃោ សភាគំ អាបត្តិំ អាបន្នោ ហោតិ។ អថ ខោ តេសំ ភិក្ខូនំ ឯតទហោសិ – ‘‘ភគវតា បញ្ញត្តំ ‘ន សភាគា អាបត្តិ ទេសេតព្ពា, ន សភាគា អាបត្តិ បដិគ្គហេតព្ពា’តិ។ អយញ្ច សព្ពោ សង្ឃោ សភាគំ អាបត្តិំ អាបន្នោ។ កថំ នុ ខោ អម្ហេហិ បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សព្ពោ សង្ឃោ សភាគំ អាបត្តិំ អាបន្នោ ហោតិ។ តេហិ, ភិក្ខវេ, ភិក្ខូហិ ឯកោ ភិក្ខុ សាមន្តា អាវាសា សជ្ជុកំ បាហេតព្ពោ – គច្ឆាវុសោ, តំ អាបត្តិំ បដិករិត្វា អាគច្ឆ, មយំ តេ សន្តិកេ តំ អាបត្តិំ បដិករិស្សាមាតិ។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ។ អយំ សព្ពោ សង្ឃោ សភាគំ អាបត្តិំ អាបន្នោ។ យទា អញ្ញំ ភិក្ខុំ សុទ្ធំ អនាបត្តិកំ បស្សិស្សតិ តទា តស្ស សន្តិកេ តំ អាបត្តិំ បដិករិស្សតី’’តិ វត្វា បវារេតព្ពំ; ន ត្វេវ តប្បច្ចយា បវារណាយ អន្តរាយោ កាតព្ពោ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សព្ពោ សង្ឃោ សភាគាយ អាបត្តិយា វេមតិកោ ហោតិ។ ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ។ អយំ សព្ពោ សង្ឃោ សភាគាយ អាបត្តិយា វេមតិកោ។ យទា និព្ពេមតិកោ ភវិស្សតិ តទា តំ អាបត្តិំ បដិករិស្សតី’’តិ វត្វា, បវារេតព្ពំ, ន ត្វេវ តប្បច្ចយា បវារណាយ អន្តរាយោ កាតព្ពោតិ។

សភាគាបត្តិបដិកម្មវិធិ និដ្ឋិតា។

បឋមភាណវារោ និដ្ឋិតោ។

១២៨. អនាបត្តិបន្នរសកំ

២២២. តេន ខោ បន សមយេន អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតិំសុ, បញ្ច វា អតិរេកា វា។ តេ ន ជានិំសុ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេសុំ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆិំសុ ពហុតរា។ ភគវតោ ឯតមត្ថំ អារោចេសុំ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ, អវុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ, អវុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ, អវុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ, ឯកច្ចាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ, ឯកច្ចាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ, ឯកច្ចាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ, សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ, សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អនាបត្តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា សមគ្គសញ្ញិនោ បវារេន្តិ។ តេហិ បវារិតមត្តេ, សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អនាបត្តិ។

អនាបត្តិបន្នរសកំ និដ្ឋិតំ។

១២៩. វគ្គាវគ្គសញ្ញីបន្នរសកំ

២២៣. ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា វគ្គសញ្ញិនោ បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អាបត្តិ ទុក្កដស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា វគ្គសញ្ញិនោ បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អាបត្តិ ទុក្កដស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា វគ្គសញ្ញិនោ បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អាបត្តិ ទុក្កដស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ធម្មសញ្ញិនោ វិនយសញ្ញិនោ វគ្គា វគ្គសញ្ញិនោ បវារេន្តិ។ តេហិ បវារិតមត្តេ,…បេ.… អវុដ្ឋិតាយ បរិសាយ…បេ.… ឯកច្ចាយ វុដ្ឋិតាយ បរិសាយ…បេ.… សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា…បេ.… សមសមា…បេ.… ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ទុក្កដស្ស។

វគ្គាវគ្គសញ្ញីបន្នរសកំ និដ្ឋិតំ។

១៣០. វេមតិកបន្នរសកំ

២២៤. ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតិ នុ ខោ អម្ហាកំ បវារេតុំ, ន នុ ខោ កប្បតី’’តិ វេមតិកា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អាបត្តិ ទុក្កដស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតិ នុ ខោ អម្ហាកំ បវារេតុំ, ន នុ ខោ កប្បតី’’តិ វេមតិកា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អាបត្តិ ទុក្កដស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតិ នុ ខោ អម្ហាកំ បវារេតុំ, ន នុ ខោ កប្បតី’’តិ វេមតិកា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អាបត្តិ ទុក្កដស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតិ នុ ខោ អម្ហាកំ បវារេតុំ, ន នុ ខោ កប្បតី’’តិ វេមតិកា បវារេន្តិ។ តេហិ បវារិតមត្តេ…បេ.… អវុដ្ឋិតាយ បរិសាយ…បេ.… ឯកច្ចាយ វុដ្ឋិតាយ បរិសាយ…បេ.… សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា…បេ.… សមសមា…បេ.… ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ទុក្កដស្ស។

វេមតិកបន្នរសកំ និដ្ឋិតំ។

១៣១. កុក្កុច្ចបកតបន្នរសកំ

២២៥. ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតេវ អម្ហាកំ បវារេតុំ, នាម្ហាកំ ន កប្បតី’’តិ កុក្កុច្ចបកតា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អាបត្តិ ទុក្កដស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតេវ អម្ហាកំ បវារេតុំ, នាម្ហាកំ ន កប្បតី’’តិ កុក្កុច្ចបកតា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អាបត្តិ ទុក្កដស្ស។

ឥធ បន, ភិក្ខវេ, អញ្ញរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតេវ អម្ហាកំ បវារេតុំ, នាម្ហាកំ ន កប្បតី’’តិ កុក្កុច្ចបកតា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, អវសេសេហិ អវសេសេហិ តេសំ សន្តិកេ (ក.) បវារេតព្ពំ។ បវារិតានំ អាបត្តិ ទុក្កដស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘កប្បតេវ អម្ហាកំ បវារេតុំ, នាម្ហាកំ ន កប្បតី’’តិ កុក្កុច្ចបកតា បវារេន្តិ។ តេហិ បវារិតមត្តេ,…បេ.… អវុដ្ឋិតាយ បរិសាយ…បេ.… ឯកច្ចាយ វុដ្ឋិតាយ បរិសាយ…បេ.… សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា…បេ.… សមសមា…បេ.… ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ទុក្កដស្ស។

កុក្កុច្ចបកតបន្នរសកំ និដ្ឋិតំ។

១៣២. ភេទបុរេក្ខារបន្នរសកំ

២២៦. ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ពហុតរា ។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ , កោ តេហិ អត្ថោ’’តិ – ភេទបុរេក្ខារា បវារេន្តិ។ តេហិ បវារិយមានេ អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, អវសេសេហិ បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ – ភេទបុរេក្ខារា បវារេន្តិ។ តេហិ បវារិតមត្តេ អថញ្ញេ អាវាសិកា ភិក្ខូ អាគច្ឆន្តិ ពហុតរា, តេហិ ភិក្ខវេ ភិក្ខូហិ បុន បវារេតព្ពំ, បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ, អវុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ, អវុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ, អវុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ, ឯកច្ចាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ, ឯកច្ចាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ, ឯកច្ចាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ, សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ពហុតរា។ តេហិ, ភិក្ខវេ, ភិក្ខូហិ បុន បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ, សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ សមសមា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ថុល្លច្ចយស្ស។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា

ភិក្ខូ សន្និបតន្តិ, បញ្ច វា អតិរេកា វា។ តេ ជានន្តិ ‘‘អត្ថញ្ញេ អាវាសិកា ភិក្ខូ អនាគតា’’តិ។ តេ ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ តេហិ បវារិតមត្តេ, សព្ពាយ វុដ្ឋិតាយ បរិសាយ, អថញ្ញេ អាវាសិកា ភិក្ខូ អាគច្ឆន្តិ ថោកតរា។ បវារិតា សុប្បវារិតា, តេសំ សន្តិកេ បវារេតព្ពំ។ បវារិតានំ អាបត្តិ ថុល្លច្ចយស្ស។

ភេទបុរេក្ខារបន្នរសកំ និដ្ឋិតំ។

បញ្ចវីសត្តិកា និដ្ឋិតា។

១៣៣. សីមោត្តន្តិកបេយ្យាលំ

២២៧. ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ សម្ពហុលា អាវាសិកា ភិក្ខូ សន្និបតន្តិ, បញ្ច វា អតិរេកា វា។ តេ ន ជានន្តិ ‘‘អញ្ញេ អាវាសិកា ភិក្ខូ អន្តោសីមំ ឱក្កមន្តី’’តិ…បេ.… តេ ន ជានន្តិ ‘‘អញ្ញេ អាវាសិកា ភិក្ខូ អន្តោសីមំ ឱក្កន្តា’’តិ…បេ.… តេ ន បស្សន្តិ អញ្ញេ អាវាសិកេ ភិក្ខូ អន្តោសីមំ ឱក្កមន្តេ…បេ.… តេ ន បស្សន្តិ អញ្ញេ អាវាសិកេ ភិក្ខូ អន្តោសីមំ ឱក្កន្តេ…បេ.… តេ ន សុណន្តិ ‘‘អញ្ញេ អាវាសិកា ភិក្ខូ អន្តោសីមំ ឱក្កមន្តី’’តិ…បេ.… តេ ន សុណន្តិ ‘‘អញ្ញេ អាវាសិកា ភិក្ខូ អន្តោសីមំ ឱក្កន្តា’’តិ…បេ.…។

អាវាសិកេន អាវាសិកា ឯកសតបញ្ចសត្តតិ តិកនយតោ, អាវាសិកេន អាគន្តុកា, អាគន្តុកេន អាវាសិកា, អាគន្តុកេន អាគន្តុកា, បេយ្យាលមុខេន សត្ត តិកសតានិ ហោន្តិ។

សីមោក្កន្តិកបេយ្យាលំ និដ្ឋិតំ។

១៣៤. ទិវសនានត្តំ

២២៨. ឥធ បន, ភិក្ខវេ, អាវាសិកានំ ភិក្ខូនំ ចាតុទ្ទសោ ហោតិ, អាគន្តុកានំ បន្នរសោ។ សចេ អាវាសិកា ពហុតរា ហោន្តិ, អាគន្តុកេហិ អាវាសិកានំ អនុវត្តិតព្ពំ។ សចេ សមសមា ហោន្តិ, អាគន្តុកេហិ អាវាសិកានំ អនុវត្តិតព្ពំ។ សចេ អាគន្តុកា ពហុតរា ហោន្តិ, អាវាសិកេហិ អាគន្តុកានំ អនុវត្តិតព្ពំ។

ឥធ បន, ភិក្ខវេ, អាវាសិកានំ ភិក្ខូនំ បន្នរសោ ហោតិ, អាគន្តុកានំ ចាតុទ្ទសោ។ សចេ អាវាសិកា ពហុតរា ហោន្តិ, អាគន្តុកេហិ អាវាសិកានំ អនុវត្តិតព្ពំ។ សចេ សមសមា ហោន្តិ, អាគន្តុកេហិ អាវាសិកានំ អនុវត្តិតព្ពំ។ សចេ អាគន្តុកា ពហុតរា ហោន្តិ, អាវាសិកេហិ អាគន្តុកានំ អនុវត្តិតព្ពំ។

ឥធ បន, ភិក្ខវេ, អាវាសិកានំ ភិក្ខូនំ បាដិបទោ ហោតិ, អាគន្តុកានំ បន្នរសោ។ សចេ អាវាសិកា ពហុតរា ហោន្តិ, អាវាសិកេហិ អាគន្តុកានំ នាកាមា ទាតព្ពា សាមគ្គី; អាគន្តុកេហិ និស្សីមំ គន្ត្វា បវារេតព្ពំ។ សចេ សមសមា ហោន្តិ, អាវាសិកេហិ អាគន្តុកានំ នាកាមា ទាតព្ពា សាមគ្គី; អាគន្តុកេហិ និស្សីមំ គន្ត្វា បវារេតព្ពំ ។ សចេ អាគន្តុកា ពហុតរា ហោន្តិ, អាវាសិកេហិ អាគន្តុកានំ សាមគ្គី វា ទាតព្ពា, និស្សីមំ វា គន្តព្ពំ។

ឥធ បន, ភិក្ខវេ, អាវាសិកានំ ភិក្ខូនំ បន្នរសោ ហោតិ, អាគន្តុកានំ បាដិបទោ។ សចេ អាវាសិកា ពហុតរា ហោន្តិ, អាគន្តុកេហិ អាវាសិកានំ សាមគ្គី វា ទាតព្ពា, និស្សីមំ វា គន្តព្ពំ។ សចេ សមសមា ហោន្តិ, អាគន្តុកេហិ អាវាសិកានំ សាមគ្គី វា ទាតព្ពា, និស្សីមំ វា គន្តព្ពំ។ សចេ អាគន្តុកា ពហុតរា ហោន្តិ, អាគន្តុកេហិ អាវាសិកានំ នាកាមា ទាតព្ពា សាមគ្គី; អាវាសិកេហិ និស្សីមំ គន្ត្វា បវារេតព្ពំ។

ទិវសនានត្តំ និដ្ឋិតំ។

១៣៥. លិង្គាទិទស្សនំ

២២៩. ឥធ បន, ភិក្ខវេ, អាគន្តុកា ភិក្ខូ បស្សន្តិ អាវាសិកានំ ភិក្ខូនំ អាវាសិកាការំ, អាវាសិកលិង្គំ, អាវាសិកនិមិត្តំ, អាវាសិកុទ្ទេសំ, សុប្បញ្ញត្តំ មញ្ចបីឋំ ភិសិពិព្ពោហនំ, បានីយំ បរិភោជនីយំ សបដ្ឋិតំ, បរិវេណំ សុសម្មដ្ឋំ; បស្សិត្វា វេមតិកា ហោន្តិ – ‘‘អត្ថិ នុ ខោ អាវាសិកា ភិក្ខូ, នត្ថិ នុ ខោ’’តិ។ តេ វេមតិកា ន វិចិនន្តិ, អវិចិនិត្វា បវារេន្តិ។ អាបត្តិ ទុក្កដស្ស…បេ.… តេ វេមតិកា វិចិនន្តិ, វិចិនិត្វា ន បស្សន្តិ, អបស្សិត្វា បវារេន្តិ។ អនាបត្តិ។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា ឯកតោ បវារេន្តិ។ អនាបត្តិ។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា បាដេក្កំ បវារេន្តិ។ អាបត្តិ ទុក្កដស្ស។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា – ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ – ភេទបុរេក្ខារា បវារេន្តិ។ អាបត្តិ ថុល្លច្ចយស្ស។

ឥធ បន, ភិក្ខវេ, អាគន្តុកា ភិក្ខូ សុណន្តិ អាវាសិកានំ ភិក្ខូនំ អាវាសិកាការំ, អាវាសិកលិង្គំ, អាវាសិកនិមិត្តំ, អាវាសិកុទ្ទេសំ, ចង្កមន្តានំ បទសទ្ទំ, សជ្ឈាយសទ្ទំ, ឧក្កាសិតសទ្ទំ, ខិបិតសទ្ទំ; សុត្វា វេមតិកា ហោន្តិ – ‘‘អត្ថិ នុ ខោ អាវាសិកា ភិក្ខូ, នត្ថិ នុ ខោ’’តិ។ តេ វេមតិកា ន វិចិនន្តិ, អវិចិនិត្វា បវារេន្តិ។ អាបត្តិ ទុក្កដស្ស។ តេ វេមតិកា វិចិនន្តិ, វិចិនិត្វា ន បស្សន្តិ, អបស្សិត្វា បវារេន្តិ។ អនាបត្តិ។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា ឯកតោ បវារេន្តិ។ អនាបត្តិ។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា បាដេក្កំ បវារេន្តិ។ អាបត្តិ ទុក្កដស្ស។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា ‘‘នស្សន្តេតេ, វិនស្សន្តេតេ, កោ តេហិ អត្ថោ’’តិ ភេទបុរេក្ខារា បវារេន្តិ។ អាបត្តិ ថុល្លច្ចយស្ស។

ឥធ បន, ភិក្ខវេ, អាវាសិកា ភិក្ខូ បស្សន្តិ អាគន្តុកានំ ភិក្ខូនំ អាគន្តុកាការំ, អាគន្តុកលិង្គំ, អាគន្តុកនិមិត្តំ, អាគន្តុកុទ្ទេសំ, អញ្ញាតកំ បត្តំ, អញ្ញាតកំ ចីវរំ, អញ្ញាតកំ និសីទនំ, បាទានំ ធោតំ, ឧទកនិស្សេកំ; បស្សិត្វា វេមតិកា ហោន្តិ – ‘‘អត្ថិ នុ ខោ អាគន្តុកា ភិក្ខូ, នត្ថិ នុ ខោ’’តិ។ តេ វេមតិកា ន វិចិនន្តិ, អវិចិនិត្វា បវារេន្តិ។ អាបត្តិ ទុក្កដស្ស។ តេ វេមតិកា វិចិនន្តិ, វិចិនិត្វា ន បស្សន្តិ, អបស្សិត្វា បវារេន្តិ។ អនាបត្តិ។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា ឯកតោ បវារេន្តិ។ អនាបត្តិ។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា បាដេក្កំ បវារេន្តិ។ អាបត្តិ ទុក្កដស្ស។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា – នស្សន្តេតេ, វិនស្សន្តេតេ, កោ តេហិ អត្ថោតិ – ភេទបុរេក្ខារា បវារេន្តិ។ អាបត្តិ ថុល្លច្ចយស្ស។

ឥធ បន, ភិក្ខវេ, អាវាសិកា ភិក្ខូ សុណន្តិ អាគន្តុកានំ ភិក្ខូនំ អាគន្តុកាការំ,

អាគន្តុកលិង្គំ, អាគន្តុកនិមិត្តំ, អាគន្តុកុទ្ទេសំ, អាគច្ឆន្តានំ បទសទ្ទំ, ឧបាហនបប្ផោដនសទ្ទំ, ឧក្កាសិតសទ្ទំ, ខិបិតសទ្ទំ; សុត្វា វេមតិកា ហោន្តិ – ‘‘អត្ថិ នុ ខោ អាគន្តុកា ភិក្ខូ, នត្ថិ នុ ខោ’’តិ។ តេ វេមតិកា ន វិចិនន្តិ, អវិចិនិត្វា បវារេន្តិ។ អាបត្តិ ទុក្កដស្ស។ តេ វេមតិកា វិចិនន្តិ, វិចិនិត្វា ន បស្សន្តិ, អបស្សិត្វា បវារេន្តិ។ អនាបត្តិ។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា ឯកតោ បវារេន្តិ។ អនាបត្តិ។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា បាដេក្កំ បវារេន្តិ។ អាបត្តិ ទុក្កដស្ស។ តេ វេមតិកា វិចិនន្តិ, វិចិនិត្វា បស្សន្តិ, បស្សិត្វា – នស្សន្តេតេ, វិនស្សន្តេតេ, កោ តេហិ អត្ថោតិ – ភេទបុរេក្ខារា បវារេន្តិ។ អាបត្តិ ថុល្លច្ចយស្ស។

លិង្គាទិទស្សនំ និដ្ឋិតំ។

១៣៦. នានាសំវាសកាទីហិ បវារណា

២៣០. ឥធ បន, ភិក្ខវេ, អាគន្តុកា ភិក្ខូ បស្សន្តិ អាវាសិកេ ភិក្ខូ នានាសំវាសកេ។ តេ សមានសំវាសកទិដ្ឋិំ បដិលភន្តិ, សមានសំវាសកទិដ្ឋិំ បដិលភិត្វា ន បុច្ឆន្តិ, អបុច្ឆិត្វា ឯកតោ បវារេន្តិ។ អនាបត្តិ។ តេ បុច្ឆន្តិ, បុច្ឆិត្វា នាភិវិតរន្តិ, អនភិវិតរិត្វា ឯកតោ បវារេន្តិ។ អាបត្តិ ទុក្កដស្ស។ តេ បុច្ឆន្តិ, បុច្ឆិត្វា នាភិវិតរន្តិ, អនភិវិតរិត្វា បាដេក្កំ បវារេន្តិ។ អនាបត្តិ។

ឥធ បន, ភិក្ខវេ, អាគន្តុកា ភិក្ខូ បស្សន្តិ អាវាសិកេ ភិក្ខូ សមានសំវាសកេ។ តេ នានាសំវាសកទិដ្ឋិំ បដិលភន្តិ, នានាសំវាសកទិដ្ឋិំ បដិលភិត្វា ន បុច្ឆន្តិ, អបុច្ឆិត្វា ឯកតោ បវារេន្តិ។ អាបត្តិ ទុក្កដស្ស។ តេ បុច្ឆន្តិ, បុច្ឆិត្វា អភិវិតរន្តិ, អភិវិតរិត្វា បាដេក្កំ បវារេន្តិ។ អាបត្តិ ទុក្កដស្ស។ តេ បុច្ឆន្តិ, បុច្ឆិត្វា អភិវិតរន្តិ, អភិវិតរិត្វា ឯកតោ បវារេន្តិ។ អនាបត្តិ។

ឥធ បន, ភិក្ខវេ, អាវាសិកា ភិក្ខូ បស្សន្តិ អាគន្តុកេ ភិក្ខូ នានាសំវាសកេ។ តេ សមានសំវាសកទិដ្ឋិំ បដិលភន្តិ, សមានសំវាសកទិដ្ឋិំ បដិលភិត្វា ន បុច្ឆន្តិ, អបុច្ឆិត្វា ឯកតោ បវារេន្តិ។ អនាបត្តិ។ តេ បុច្ឆន្តិ, បុច្ឆិត្វា នាភិវិតរន្តិ, អនភិវិតរិត្វា ឯកតោ បវារេន្តិ។ អាបត្តិ ទុក្កដស្ស។ តេ បុច្ឆន្តិ, បុច្ឆិត្វា នាភិវិតរន្តិ, អនភិវិតរិត្វា បាដេក្កំ បវារេន្តិ។ អនាបត្តិ។

ឥធ បន, ភិក្ខវេ, អាវាសិកា ភិក្ខូ បស្សន្តិ អាគន្តុកេ ភិក្ខូ សមានសំវាសកេ។ តេ នានាសំវាសកទិដ្ឋិំ បដិលភន្តិ, នានាសំវាសកទិដ្ឋិំ បដិលភិត្វា ន បុច្ឆន្តិ, អបុច្ឆិត្វា ឯកតោ បវារេន្តិ។ អាបត្តិ ទុក្កដស្ស។ តេ បុច្ឆន្តិ, បុច្ឆិត្វា អភិវិតរន្តិ, អភិវិតរិត្វា បាដេក្កំ បវារេន្តិ។ អាបត្តិ ទុក្កដស្ស។ តេ បុច្ឆន្តិ, បុច្ឆិត្វា អភិវិតរន្តិ, អភិវិតរិត្វា ឯកតោ បវារេន្តិ។ អនាបត្តិ។

នានាសំវាសកាទីហិ បវារណា និដ្ឋិតា។

១៣៧. ន គន្តព្ពវារោ

២៣១. ន, ភិក្ខវេ, តទហុ បវារណាយ សភិក្ខុកា អាវាសា អភិក្ខុកោ អាវាសោ គន្តព្ពោ, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អាវាសា អភិក្ខុកោ អនាវាសោ គន្តព្ពោ, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អាវាសា អភិក្ខុកោ អាវាសោ វា អនាវាសោ វា គន្តព្ពោ, អញ្ញត្រ សង្ឃេន, អញ្ញត្រ អន្តរាយា។

ន , ភិក្ខវេ, តទហុ បវារណាយ សភិក្ខុកា អនាវាសា អភិក្ខុកោ អាវាសោ គន្តព្ពោ, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អនាវាសា អភិក្ខុកោ អនាវាសោ គន្តព្ពោ, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អនាវាសា អភិក្ខុកោ អាវាសោ វា អនាវាសោ វា គន្តព្ពោ, អញ្ញត្រ សង្ឃេន, អញ្ញត្រ អន្តរាយា។

ន, ភិក្ខវេ, តទហុ បវារណាយ សភិក្ខុកា អាវាសា វា អនាវាសា វា អភិក្ខុកោ អាវាសោ គន្តព្ពោ, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អាវាសា វា អនាវាសា វា អភិក្ខុកោ អនាវាសោ គន្តព្ពោ, អញ្ញត្រ សង្ឃេន, អញ្ញត្រ អន្តរាយា ។ ន, ភិក្ខវេ, តទហុ បវារណាយ សភិក្ខុកា អាវាសា វា អនាវាសា វា អភិក្ខុកោ អាវាសោ វា អនាវាសោ វា គន្តព្ពោ, អញ្ញត្រ សង្ឃេន, អញ្ញត្រ អន្តរាយា។

ន, ភិក្ខវេ, តទហុ បវារណាយ សភិក្ខុកា អាវាសា សភិក្ខុកោ អាវាសោ គន្តព្ពោ, យត្ថស្សុ ភិក្ខូ នានាសំវាសកា, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អាវាសា សភិក្ខុកោ អនាវាសោ គន្តព្ពោ, យត្ថស្សុ ភិក្ខូ នានាសំវាសកា, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អាវាសា សភិក្ខុកោ អាវាសោ វា អនាវាសោ វា គន្តព្ពោ, យត្ថស្សុ ភិក្ខូ នានាសំវាសកា, អញ្ញត្រ សង្ឃេន, អញ្ញត្រ អន្តរាយា។

ន, ភិក្ខវេ, តទហុ បវារណាយ សភិក្ខុកា អនាវាសា សភិក្ខុកោ អាវាសោ គន្តព្ពោ, យត្ថស្សុ ភិក្ខូ នានាសំវាសកា, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អនាវាសា សភិក្ខុកោ អនាវាសោ គន្តព្ពោ, យត្ថស្សុ ភិក្ខូ នានាសំវាសកា, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អនាវាសា សភិក្ខុកោ អាវាសោ វា អនាវាសោ វា គន្តព្ពោ, យត្ថស្សុ ភិក្ខូ នានាសំវាសកា, អញ្ញត្រ សង្ឃេន, អញ្ញត្រ អន្តរាយា។

ន , ភិក្ខវេ, តទហុ បវារណាយ សភិក្ខុកា អាវាសា វា អនាវាសា

វា សភិក្ខុកោ អាវាសោ គន្តព្ពោ, យត្ថស្សុ ភិក្ខូ នានាសំវាសកា, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អាវាសា វា អនាវាសា វា សភិក្ខុកោ អនាវាសោ គន្តព្ពោ, យត្ថស្សុ ភិក្ខូ នានាសំវាសកា, អញ្ញត្រ សង្ឃេន, អញ្ញត្រ អន្តរាយា។ ន, ភិក្ខវេ, តទហុ បវារណាយ សភិក្ខុកា អាវាសា វា អនាវាសា វា សភិក្ខុកោ អាវាសោ វា អនាវាសោ វា គន្តព្ពោ, យត្ថស្សុ ភិក្ខូ នានាសំវាសកា, អញ្ញត្រ សង្ឃេន, អញ្ញត្រ អន្តរាយា។

ន គន្តព្ពវារោ និដ្ឋិតោ។

១៣៨. គន្តព្ពវារោ

២៣២. គន្តព្ពោ, ភិក្ខវេ, តទហុ បវារណាយ សភិក្ខុកា អាវាសា សភិក្ខុកោ អាវាសោ , យត្ថស្សុ ភិក្ខូ សមានសំវាសកា, យំ ជញ្ញា ‘‘សក្កោមិ អជ្ជេវ គន្តុ’’ន្តិ។ គន្តព្ពោ, ភិក្ខវេ, តទហុ បវារណាយ សភិក្ខុកា អាវាសា សភិក្ខុកោ អនាវាសោ…បេ.… សភិក្ខុកោ អាវាសោ វា អនាវាសោ វា, យត្ថស្សុ ភិក្ខូ សមានសំវាសកា, យំ ជញ្ញា ‘‘សក្កោមិ អជ្ជេវ គន្តុ’’ន្តិ។

គន្តព្ពោ , ភិក្ខវេ, តទហុ បវារណាយ សភិក្ខុកា អនាវាសា សភិក្ខុកោ អាវាសោ…បេ.… សភិក្ខុកោ អនាវាសោ…បេ.… សភិក្ខុកោ អាវាសោ វា អនាវាសោ វា, យត្ថស្សុ ភិក្ខូ សមានសំវាសកា, យំ ជញ្ញា ‘‘សក្កោមិ អជ្ជេវ គន្តុ’’ន្តិ។

គន្តព្ពោ, ភិក្ខវេ, តទហុ បវារណាយ សភិក្ខុកា អាវាសា វា អនាវាសា វា សភិក្ខុកោ

អាវាសោ…បេ.… សភិក្ខុកោ អនាវាសោ…បេ.… សភិក្ខុកោ អាវាសោ វា អនាវាសោ វា, យត្ថស្សុ ភិក្ខូ សមានសំវាសកា, យំ ជញ្ញា ‘‘សក្កោមិ អជ្ជេវ គន្តុ’’ន្តិ។

គន្តព្ពវារោ និដ្ឋិតោ។

១៣៩. វជ្ជនីយបុគ្គលសន្ទស្សនា

២៣៣. ន, ភិក្ខវេ, ភិក្ខុនិយា និសិន្នបរិសាយ បវារេតព្ពំ។ យោ បវារេយ្យ, អាបត្តិ ទុក្កដស្ស។ ន, ភិក្ខវេ, សិក្ខមានាយ…បេ.… ន សាមណេរស្ស…បេ.… ន សាមណេរិយា…បេ.… ន សិក្ខំ បច្ចក្ខាតកស្ស…បេ.… ន អន្តិមវត្ថុំ អជ្ឈាបន្នកស្ស និសិន្នបរិសាយ បវារេតព្ពំ។ យោ បវារេយ្យ, អាបត្តិ ទុក្កដស្ស ។

ន អាបត្តិយា អទស្សនេ ឧក្ខិត្តកស្ស និសិន្នបរិសាយ បវារេតព្ពំ។ យោ បវារេយ្យ, យថាធម្មោ ការេតព្ពោ។ ន អាបត្តិយា អប្បដិកម្មេ ឧក្ខិត្តកស្ស…បេ.… ន បាបិកាយ ទិដ្ឋិយា អប្បដិនិស្សគ្គេ ឧក្ខិត្តកស្ស និសិន្នបរិសាយ បវារេតព្ពំ។ យោ បវារេយ្យ, យថាធម្មោ ការេតព្ពោ។

ន បណ្ឌកស្ស និសិន្នបរិសាយ បវារេតព្ពំ។ យោ បវារេយ្យ, អាបត្តិ ទុក្កដស្ស។ ន ថេយ្យសំវាសកស្ស…បេ.… ន តិត្ថិយបក្កន្តកស្ស…បេ.… ន តិរច្ឆានគតស្ស…បេ.… ន មាតុឃាតកស្ស…បេ.… ន បិតុឃាតកស្ស…បេ.… ន អរហន្តឃាតកស្ស…បេ.… ន ភិក្ខុនិទូសកស្ស …បេ.… ន សង្ឃភេទកស្ស…បេ.… ន លោហិតុប្បាទកស្ស …បេ.… ន ឧភតោព្យញ្ជនកស្ស និសិន្នបរិសាយ បវារេតព្ពំ។ យោ បវារេយ្យ, អាបត្តិ ទុក្កដស្ស។

ន, ភិក្ខវេ, បារិវាសិកបវារណាទានេន បវារេតព្ពំ, អញ្ញត្រ អវុដ្ឋិតាយ បរិសាយ។ ន ច, ភិក្ខវេ, អប្បវារណាយ បវារេតព្ពំ, អញ្ញត្រ សង្ឃសាមគ្គិយាតិ។

វជ្ជនីយបុគ្គលសន្ទស្សនា និដ្ឋិតា។

ទុតិយភាណវារោ និដ្ឋិតោ។

១៤០. ទ្វេវាចិកាទិបវារណា

២៣៤. តេន ខោ បន សមយេន កោសលេសុ ជនបទេ អញ្ញតរស្មិំ អាវាសេ តទហុ បវារណាយ សវរភយំ អហោសិ។ ភិក្ខូ នាសក្ខិំសុ តេវាចិកំ បវារេតុំ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, ទ្វេវាចិកំ បវារេតុន្តិ។

ពាឡ្ហតរំ សវរភយំ អហោសិ។ ភិក្ខូ នាសក្ខិំសុ ទ្វេវាចិកំ បវារេតុំ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, ឯកវាចិកំ បវារេតុន្តិ។

ពាឡ្ហតរំ សវរភយំ អហោសិ។ ភិក្ខូ នាសក្ខិំសុ ឯកវាចិកំ បវារេតុំ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, សមានវស្សិកំ បវារេតុន្តិ។

តេន ខោ បន សមយេន អញ្ញតរស្មិំ អាវាសេ តទហុ បវារណាយ មនុស្សេហិ ទានំ ទេន្តេហិ យេភុយ្យេន រត្តិ ខេបិតា ហោតិ។ អថ ខោ តេសំ ភិក្ខូនំ ឯតទហោសិ – ‘‘មនុស្សេហិ ទានំ ទេន្តេហិ យេភុយ្យេន រត្តិ ខេបិតា។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតិ។ កថំ នុ ខោ អម្ហេហិ បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ។ ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ មនុស្សេហិ ទានំ ទេន្តេហិ យេភុយ្យេន រត្តិ ខេបិតា ហោតិ។ តត្រ ចេ, ភិក្ខវេ, ភិក្ខូនំ ឯវំ ហោតិ – ‘‘មនុស្សេហិ ទានំ ទេន្តេហិ យេភុយ្យេន រត្តិ ខេបិតា។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតី’’តិ, ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ។ មនុស្សេហិ ទានំ ទេន្តេហិ យេភុយ្យេន រត្តិ ខេបិតា។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតិ។ យទិ សង្ឃស្ស បត្តកល្លំ, សង្ឃោ ទ្វេវាចិកំ, ឯកវាចិកំ, សមានវស្សិកំ បវារេយ្យា’’តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ ភិក្ខូហិ ធម្មំ ភណន្តេហិ…បេ.… សុត្តន្តិកេហិ សុត្តន្តំ សង្គាយន្តេហិ… វិនយធរេហិ វិនយំ វិនិច្ឆិនន្តេហិ… ធម្មកថិកេហិ ធម្មំ សាកច្ឆន្តេហិ… ភិក្ខូហិ កលហំ ករោន្តេហិ យេភុយ្យេន រត្តិ ខេបិតា ហោតិ។ តត្រ ចេ ភិក្ខូនំ ឯវំ ហោតិ – ‘‘ភិក្ខូហិ កលហំ ករោន្តេហិ យេភុយ្យេន រត្តិ ខេបិតា។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតី’’តិ, ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ។ ភិក្ខូហិ កលហំ ករោន្តេហិ យេភុយ្យេន រត្តិ ខេបិតា។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ រត្តិ វិភាយិស្សតិ។ យទិ សង្ឃស្ស បត្តកល្លំ, សង្ឃោ ទ្វេវាចិកំ, ឯកវាចិកំ, សមានវស្សិកំ បវារេយ្យា’’តិ។

តេន ខោ បន សមយេន កោសលេសុ ជនបទេ អញ្ញតរស្មិំ អាវាសេ តទហុ បវារណាយ មហាភិក្ខុសង្ឃោ សន្និបតិតោ ហោតិ , បរិត្តញ្ច អនោវស្សិកំ អនោវស្សកំ (ក.) ហោតិ, មហា ច មេឃោ ឧគ្គតោ ហោតិ។ អថ ខោ តេសំ ភិក្ខូនំ ឯតទហោសិ – ‘‘អយំ ខោ មហាភិក្ខុសង្ឃោ សន្និបតិតោ, បរិត្តញ្ច អនោវស្សិកំ, មហា ច មេឃោ ឧគ្គតោ។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ មេឃោ បវស្សិស្សតិ។ កថំ នុ ខោ អម្ហេហិ បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ។ ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ មហាភិក្ខុសង្ឃោ សន្និបតិតោ ហោតិ, បរិត្តញ្ច អនោវស្សិកំ ហោតិ, មហា ច មេឃោ ឧគ្គតោ ហោតិ។ តត្រ ចេ ភិក្ខូនំ ឯវំ ហោតិ – ‘‘អយំ ខោ មហាភិក្ខុសង្ឃោ សន្និបតិតោ, បរិត្តញ្ច អនោវស្សិកំ, មហា ច មេឃោ ឧគ្គតោ។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ មេឃោ បវស្សិស្សតី’’តិ។ ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ។ អយំ មហាភិក្ខុសង្ឃោ សន្និបតិតោ, បរិត្តញ្ច អនោវស្សិកំ, មហា ច មេឃោ ឧគ្គតោ។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ មេឃោ បវស្សិស្សតិ។ យទិ សង្ឃស្ស បត្តកល្លំ, សង្ឃោ ទ្វេវាចិកំ, ឯកវាចិកំ, សមានវស្សិកំ បវារេយ្យា’’តិ។

ឥធ បន, ភិក្ខវេ, អញ្ញតរស្មិំ អាវាសេ តទហុ បវារណាយ រាជន្តរាយោ ហោតិ…បេ.… ចោរន្តរាយោ ហោតិ… អគ្យន្តរាយោ ហោតិ… ឧទកន្តរាយោ ហោតិ… មនុស្សន្តរាយោ ហោតិ… អមនុស្សន្តរាយោ ហោតិ… វាឡន្តរាយោ ហោតិ… សរីសបន្តរាយោ ហោតិ… ជីវិតន្តរាយោ ហោតិ… ព្រហ្មចរិយន្តរាយោ ហោតិ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, ព្រហ្មចរិយន្តរាយោ ។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ ព្រហ្មចរិយន្តរាយោ ភវិស្សតី’’តិ, ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ។ អយំ ព្រហ្មចរិយន្តរាយោ។ សចេ សង្ឃោ តេវាចិកំ បវារេស្សតិ, អប្បវារិតោវ សង្ឃោ ភវិស្សតិ, អថាយំ ព្រហ្មចរិយន្តរាយោ ភវិស្សតិ។ យទិ សង្ឃស្ស បត្តកល្លំ, សង្ឃោ ទ្វេវាចិកំ, ឯកវាចិកំ, សមានវស្សិកំ បវារេយ្យា’’តិ។

ទ្វេវាចិកាទិបវារណា និដ្ឋិតា។

១៤១. បវារណាឋបនំ

២៣៥. តេន ខោ បន សមយេន ឆព្ពគ្គិយា ភិក្ខូ សាបត្តិកា បវារេន្តិ។ ភគវតោ ឯតមត្ថំ អារោចេសុំ។ ន, ភិក្ខវេ, សាបត្តិកេន បវារេតព្ពំ។ យោ បវារេយ្យ, អាបត្តិ ទុក្កដស្ស។ អនុជានាមិ, ភិក្ខវេ, យោ សាបត្តិកោ បវារេតិ, តស្ស ឱកាសំ ការាបេត្វា អាបត្តិយា ចោទេតុន្តិ។

តេន ខោ បន សមយេន ឆព្ពគ្គិយា ភិក្ខូ ឱកាសំ ការាបិយមានា ន ឥច្ឆន្តិ ឱកាសំ កាតុំ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, ឱកាសំ អករោន្តស្ស បវារណំ ឋបេតុំ។ ឯវញ្ច បន, ភិក្ខវេ, ឋបេតព្ពា។ តទហុ បវារណាយ ចាតុទ្ទសេ វា បន្នរសេ វា តស្មិំ បុគ្គលេ សម្មុខីភូតេ សង្ឃមជ្ឈេ ឧទាហរិតព្ពំ – ‘‘សុណាតុ មេ, ភន្តេ, សង្ឃោ។ ឥត្ថន្នាមោ បុគ្គលោ សាបត្តិកោ ។ តស្ស បវារណំ ឋបេមិ។ ន តស្មិំ សម្មុខីភូតេ បវារេតព្ព’’ន្តិ។ ឋបិតា ហោតិ បវារណាតិ។

តេន ខោ បន សមយេន ឆព្ពគ្គិយា ភិក្ខូ – បុរម្ហាកំ បេសលា ភិក្ខូ បវារណំ ឋបេន្តីតិ – បដិកច្ចេវ សុទ្ធានំ ភិក្ខូនំ អនាបត្តិកានំ អវត្ថុស្មិំ អការណេ បវារណំ ឋបេន្តិ, បវារិតានម្បិ បវារណំ ឋបេន្តិ។ ភគវតោ ឯតមត្ថំ អារោចេសុំ។ ន, ភិក្ខវេ, សុទ្ធានំ ភិក្ខូនំ អនាបត្តិកានំ អវត្ថុស្មិំ អការណេ បវារណា ឋបេតព្ពា។ យោ ឋបេយ្យ, អាបត្តិ ទុក្កដស្ស។ ន, ភិក្ខវេ, បវារិតានម្បិ បវារណា ឋបេតព្ពា។ យោ ឋបេយ្យ, អាបត្តិ ទុក្កដស្ស។

២៣៦. ឯវំ ខោ, ភិក្ខវេ, ឋបិតា ហោតិ បវារណា, ឯវំ អដ្ឋបិតា។ កថញ្ច, ភិក្ខវេ, អដ្ឋបិតា ហោតិ បវារណា? តេវាចិកាយ ចេ, ភិក្ខវេ, បវារណាយ ភាសិតាយ លបិតាយ បរិយោសិតាយ បវារណំ ឋបេតិ, អដ្ឋបិតា ហោតិ បវារណា។ ទ្វេវាចិកាយ ចេ, ភិក្ខវេ,… ឯកវាចិកាយ ចេ, ភិក្ខវេ,… សមានវស្សិកាយ ចេ, ភិក្ខវេ, បវារណាយ ភាសិតាយ លបិតាយ បរិយោសិតាយ បវារណំ ឋបេតិ , អដ្ឋបិតា ហោតិ បវារណា។ ឯវំ ខោ, ភិក្ខវេ, អដ្ឋបិតា ហោតិ បវារណា។

កថញ្ច, ភិក្ខវេ, ឋបិតា ហោតិ បវារណា? តេវាចិកាយ, ចេ, ភិក្ខវេ, បវារណាយ ភាសិតាយ លបិតាយ អបរិយោសិតាយ បវារណំ ឋបេតិ, ឋបិតា ហោតិ បវារណា។ ទ្វេវាចិកាយ ចេ, ភិក្ខវេ,… ឯកវាចិកាយ ចេ, ភិក្ខវេ,… សមានវស្សិកាយ ចេ, ភិក្ខវេ, បវារណាយ ភាសិតាយ លបិតាយ អបរិយោសិតាយ បវារណំ ឋបេតិ, ឋបិតា ហោតិ បវារណា។ ឯវំ ខោ, ភិក្ខវេ, ឋបិតា ហោតិ បវារណា។

២៣៧. ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ។ តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា អបរិសុទ្ធកាយសមាចារោ, អបរិសុទ្ធវចីសមាចារោ, អបរិសុទ្ធាជីវោ, ពាលោ, អព្យត្តោ, ន បដិពលោ អនុយុញ្ជីយមានោ អនុយោគំ ទាតុ’’ន្តិ, ‘អលំ, ភិក្ខុ, មា ភណ្ឌនំ, មា កលហំ, មា វិគ្គហំ, មា វិវាទ’ន្តិ ឱមទ្ទិត្វា សង្ឃេន បវារេតព្ពំ។

ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ។ តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា បរិសុទ្ធកាយសមាចារោ, អបរិសុទ្ធវចីសមាចារោ, អបរិសុទ្ធាជីវោ, ពាលោ, អព្យត្តោ, ន បដិពលោ អនុយុញ្ជីយមានោ អនុយោគំ ទាតុ’’ន្តិ, ‘អលំ, ភិក្ខុ, មា ភណ្ឌនំ, មា កលហំ, មា វិគ្គហំ, មា វិវាទ’ន្តិ ឱមទ្ទិត្វា សង្ឃេន បវារេតព្ពំ។

ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ។ តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា បរិសុទ្ធកាយសមាចារោ, បរិសុទ្ធវចីសមាចារោ, អបរិសុទ្ធាជីវោ, ពាលោ, អព្យត្តោ, ន បដិពលោ អនុយុញ្ជីយមានោ អនុយោគំ ទាតុ’’ន្តិ, ‘អលំ, ភិក្ខុ, មា ភណ្ឌនំ, មា កលហំ, មា វិគ្គហំ, មា វិវាទ’ន្តិ ឱមទ្ទិត្វា សង្ឃេន បវារេតព្ពំ។

ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ។ តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា បរិសុទ្ធកាយសមាចារោ , បរិសុទ្ធវចីសមាចារោ, បរិសុទ្ធាជីវោ, ពាលោ, អព្យត្តោ , ន បដិពលោ អនុយុញ្ជីយមានោ អនុយោគំ ទាតុ’’ន្តិ, ‘អលំ, ភិក្ខុ, មា ភណ្ឌនំ, មា កលហំ, មា វិគ្គហំ, មា វិវាទ’ន្តិ ឱមទ្ទិត្វា សង្ឃេន បវារេតព្ពំ។

ឥធ បន, ភិក្ខវេ, តទហុ បវារណាយ ភិក្ខុ ភិក្ខុស្ស បវារណំ ឋបេតិ។ តំ ចេ ភិក្ខុំ អញ្ញេ ភិក្ខូ ជានន្តិ, ‘‘អយំ ខោ អាយស្មា បរិសុទ្ធកាយសមាចារោ, បរិសុទ្ធវចីសមាចារោ, បរិសុទ្ធាជីវោ, បណ្ឌិតោ, ព្យត្តោ, បដិពលោ អនុយុញ្ជីយមានោ អនុយោគំ ទាតុ’’ន្តិ, សោ ឯវមស្ស វចនីយោ, ‘‘យំ ខោ ត្វំ, អាវុសោ, ឥមស្ស ភិក្ខុនោ បវារណំ ឋបេសិ, កិម្ហិ នំ ឋបេសិ, សីលវិបត្តិយា វា ឋបេសិ, អាចារវិបត្តិយា វា ឋបេសិ, ទិដ្ឋិវិបត្តិយា វា ឋបេសី’’តិ? សោ ចេ ឯវំ វទេយ្យ – ‘‘សីលវិបត្តិយា វា ឋបេមិ, អាចារវិបត្តិយា វា ឋបេមិ, ទិដ្ឋិវិបត្តិយា វា ឋបេមី’’តិ, សោ ឯវមស្ស វចនីយោ – ‘‘ជានាសិ បនាយស្មា សីលវិបត្តិំ, ជានាសិ អាចារវិបត្តិំ, ជានាសិ ទិដ្ឋិវិបត្តិ’’ន្តិ? សោ ចេ ឯវំ វទេយ្យ – ‘‘ជានាមិ ខោ អហំ, អាវុសោ, សីលវិបត្តិំ, ជានាមិ អាចារវិបត្តិំ, ជានាមិ ទិដ្ឋិវិបត្តិ’’ន្តិ, សោ ឯវមស្ស វចនីយោ – ‘‘កតមា បនាវុសោ, សីលវិបត្តិ, កតមា អាចារវិបត្តិ, កតមា ទិដ្ឋិវិបត្តី’’តិ? សោ ចេ ឯវំ វទេយ្យ – ‘‘ចត្តារិ បារាជិកានិ, តេរស សង្ឃាទិសេសា, អយំ សីលវិបត្តិ; ថុល្លច្ចយំ, បាចិត្តិយំ, បាដិទេសនីយំ, ទុក្កដំ, ទុព្ភាសិតំ, អយំ អាចារវិបត្តិ; មិច្ឆាទិដ្ឋិ, អន្តគ្គាហិកាទិដ្ឋិ, អយំ ទិដ្ឋិវិបត្តី’’តិ, សោ ឯវមស្ស វចនីយោ – ‘‘យំ ខោ ត្វំ , អាវុសោ, ឥមស្ស ភិក្ខុនោ បវារណំ ឋបេសិ, ទិដ្ឋេន វា ឋបេសិ, សុតេន វា ឋបេសិ, បរិសង្កាយ វា ឋបេសី’’តិ? សោ ចេ ឯវំ វទេយ្យ – ‘‘ទិដ្ឋេន វា ឋបេមិ, សុតេន វា ឋបេមិ, បរិសង្កាយ វា ឋបេមី’’តិ, សោ ឯវមស្ស វចនីយោ – ‘‘យំ ខោ ត្វំ, អាវុសោ, ឥមស្ស ភិក្ខុនោ ទិដ្ឋេន បវារណំ ឋបេសិ, កិំ តេ ទិដ្ឋំ, កិន្តិ តេ ទិដ្ឋំ, កទា តេ ទិដ្ឋំ, កត្ថ តេ ទិដ្ឋំ, បារាជិកំ អជ្ឈាបជ្ជន្តោ ទិដ្ឋោ, សង្ឃាទិសេសំ អជ្ឈាបជ្ជន្តោ ទិដ្ឋោ, ថុល្លច្ចយំ… បាចិត្តិយំ… បាដិទេសនីយំ… ទុក្កដំ… ទុព្ភាសិតំ អជ្ឈាបជ្ជន្តោ ទិដ្ឋោ, កត្ថ ច ត្វំ អហោសិ, កត្ថ ចាយំ ភិក្ខុ អហោសិ, កិញ្ច ត្វំ ករោសិ, កិញ្ចាយំ ភិក្ខុ ករោតី’’តិ? សោ ចេ ឯវំ វទេយ្យ – ‘‘ន ខោ អហំ, អាវុសោ, ឥមស្ស ភិក្ខុនោ ទិដ្ឋេន បវារណំ ឋបេមិ, អបិច សុតេន បវារណំ ឋបេមី’’តិ, សោ ឯវមស្ស វចនីយោ – ‘‘យំ ខោ ត្វំ, អាវុសោ, ឥមស្ស ភិក្ខុនោ សុតេន បវារណំ ឋបេសិ, កិំ តេ សុតំ, កិន្តិ តេ សុតំ, កទា តេ សុតំ, កត្ថ តេ សុតំ, បារាជិកំ អជ្ឈាបន្នោតិ សុតំ, សង្ឃាទិសេសំ អជ្ឈាបន្នោតិ សុតំ, ថុល្លច្ចយំ… បាចិត្តិយំ… បាដិទេសនីយំ… ទុក្កដំ… ទុព្ភាសិតំ អជ្ឈាបន្នោតិ សុតំ, ភិក្ខុស្ស សុតំ, ភិក្ខុនិយា សុតំ, សិក្ខមានាយ សុតំ, សាមណេរស្ស សុតំ, សាមណេរិយា សុតំ, ឧបាសកស្ស សុតំ, ឧបាសិកាយ សុតំ, រាជូនំ សុតំ, រាជមហាមត្តានំ សុតំ, តិត្ថិយានំ សុតំ, តិត្ថិយសាវកានំ សុត’’ន្តិ? សោ ចេ ឯវំ វទេយ្យ – ‘‘ន ខោ អហំ, អាវុសោ, ឥមស្ស ភិក្ខុនោ សុតេន បវារណំ ឋបេមិ , អបិច បរិសង្កាយ បវារណំ ឋបេមី’’តិ, សោ ឯវមស្ស វចនីយោ – ‘‘យំ ខោ ត្វំ, អាវុសោ, ឥមស្ស ភិក្ខុនោ បរិសង្កាយ បវារណំ ឋបេសិ, កិំ បរិសង្កសិ, កិន្តិ បរិសង្កសិ, កទា បរិសង្កសិ, កត្ថ បរិសង្កសិ, បារាជិកំ អជ្ឈាបន្នោតិ បរិសង្កសិ, សង្ឃាទិសេសំ អជ្ឈាបន្នោតិ បរិសង្កសិ, ថុល្លច្ចយំ… បាចិត្តិយំ… បាដិទេសនីយំ… ទុក្កដំ… ទុព្ភាសិតំ អជ្ឈាបន្នោតិ បរិសង្កសិ, ភិក្ខុស្ស សុត្វា បរិសង្កសិ, ភិក្ខុនិយា សុត្វា បរិសង្កសិ, សិក្ខមានាយ សុត្វា បរិសង្កសិ, សាមណេរស្ស សុត្វា បរិសង្កសិ, សាមណេរិយា សុត្វា បរិសង្កសិ, ឧបាសកស្ស សុត្វា បរិសង្កសិ, ឧបាសិកាយ សុត្វា បរិសង្កសិ, រាជូនំ សុត្វា បរិសង្កសិ, រាជមហាមត្តានំ សុត្វា បរិសង្កសិ, តិត្ថិយានំ សុត្វា បរិសង្កសិ, តិត្ថិយសាវកានំ សុត្វា បរិសង្កសី’’តិ? សោ ចេ ឯវំ វទេយ្យ – ‘‘ន ខោ អហំ, អាវុសោ, ឥមស្ស ភិក្ខុនោ បរិសង្កាយ បវារណំ ឋបេមិ, អបិ ច អហម្បិ ន ជានាមិ កេន បនាហំ ឥមស្ស ភិក្ខុនោ បវារណំ ឋបេមី’’តិ។ សោ ចេ, ភិក្ខវេ, ចោទកោ ភិក្ខុ អនុយោគេន វិញ្ញូនំ សព្រហ្មចារីនំ ចិត្តំ ន អារាធេតិ, អននុវាទោ ចុទិតោ ភិក្ខូតិ អលំ វចនាយ។ សោ ចេ, ភិក្ខវេ, ចោទកោ ភិក្ខុ អនុយោគេន វិញ្ញូនំ សព្រហ្មចារីនំ ចិត្តំ អារាធេតិ, សានុវាទោ ចុទិតោ ភិក្ខូតិ អលំ វចនាយ។ សោ ចេ, ភិក្ខវេ, ចោទកោ ភិក្ខុ អមូលកេន បារាជិកេន អនុទ្ធំសិតំ បដិជានាតិ, សង្ឃាទិសេសំ អារោបេត្វា សង្ឃេន បវារេតព្ពំ។ សោ ចេ, ភិក្ខវេ, ចោទកោ ភិក្ខុ អមូលកេន សង្ឃាទិសេសេន អនុទ្ធំសិតំ បដិជានាតិ, យថាធម្មំ ការាបេត្វា សង្ឃេន បវារេតព្ពំ។ សោ ចេ, ភិក្ខវេ, ចោទកោ, ភិក្ខុ អមូលកេន ថុល្លច្ចយេន… បាចិត្តិយេន… បាដិទេសនីយេន… ទុក្កដេន… ទុព្ភាសិតេន អនុទ្ធំសិតំ បដិជានាតិ, យថាធម្មំ ការាបេត្វា សង្ឃេន បវារេតព្ពំ។ សោ ចេ, ភិក្ខវេ, ចុទិតោ ភិក្ខុ បារាជិកំ អជ្ឈាបន្នោតិ បដិជានាតិ, នាសេត្វា សង្ឃេន បវារេតព្ពំ។ សោ ចេ, ភិក្ខវេ, ចុទិតោ ភិក្ខុ សង្ឃាទិសេសំ អជ្ឈាបន្នោតិ បដិជានាតិ, សង្ឃាទិសេសំ អារោបេត្វា សង្ឃេន បវារេតព្ពំ។ សោ ចេ, ភិក្ខវេ, ចុទិតោ ភិក្ខុ ថុល្លច្ចយំ… បាចិត្តិយំ… បាដិទេសនីយំ… ទុក្កដំ… ទុព្ភាសិតំ អជ្ឈាបន្នោតិ បដិជានាតិ, យថាធម្មំ ការាបេត្វា សង្ឃេន បវារេតព្ពំ។

បវារណាឋបនំ និដ្ឋិតំ។

១៤២. ថុល្លច្ចយវត្ថុកាទិ

២៣៨. ឥធ បន, ភិក្ខវេ, ភិក្ខុ តទហុ បវារណាយ ថុល្លច្ចយំ អជ្ឈាបន្នោ ហោតិ។ ឯកច្ចេ ភិក្ខូ ថុល្លច្ចយទិដ្ឋិនោ ហោន្តិ, ឯកច្ចេ ភិក្ខូ សង្ឃាទិសេសទិដ្ឋិនោ ហោន្តិ។ យេ តេ, ភិក្ខវេ, ភិក្ខូ ថុល្លច្ចយទិដ្ឋិនោ, តេហិ សោ, ភិក្ខវេ, ភិក្ខុ ឯកមន្តំ អបនេត្វា យថាធម្មំ ការាបេត្វា សង្ឃំ ឧបសង្កមិត្វា ឯវមស្ស វចនីយោ – ‘‘យំ ខោ សោ, អាវុសោ, ភិក្ខុ អាបត្តិំ អាបន្នោ, សាស្ស យថាធម្មំ បដិកតា។ យទិ សង្ឃស្ស បត្តកល្លំ, សង្ឃោ បវារេយ្យា’’តិ។

ឥធ បន, ភិក្ខវេ, ភិក្ខុ តទហុ បវារណាយ ថុល្លច្ចយំ អជ្ឈាបន្នោ ហោតិ។ ឯកច្ចេ ភិក្ខូ ថុល្លច្ចយទិដ្ឋិនោ ហោន្តិ, ឯកច្ចេ ភិក្ខូ បាចិត្តិយទិដ្ឋិនោ ហោន្តិ…បេ.… ឯកច្ចេ ភិក្ខូ ថុល្លច្ចយទិដ្ឋិនោ ហោន្តិ, ឯកច្ចេ ភិក្ខូ បាដិទេសនីយទិដ្ឋិនោ ហោន្តិ… ឯកច្ចេ ភិក្ខូ ថុល្លច្ចយទិដ្ឋិនោ ហោន្តិ, ឯកច្ចេ ភិក្ខូ ទុក្កដទិដ្ឋិនោ ហោន្តិ… ឯកច្ចេ ភិក្ខូ ថុល្លច្ចយទិដ្ឋិនោ ហោន្តិ, ឯកច្ចេ ភិក្ខូ ទុព្ភាសិតទិដ្ឋិនោ ហោន្តិ។ យេ តេ, ភិក្ខវេ, ភិក្ខូ ថុល្លច្ចយទិដ្ឋិនោ, តេហិ សោ, ភិក្ខវេ, ភិក្ខុ ឯកមន្តំ អបនេត្វា យថាធម្មំ ការាបេត្វា សង្ឃំ ឧបសង្កមិត្វា ឯវមស្ស វចនីយោ – ‘‘យំ ខោ សោ, អាវុសោ, ភិក្ខុ អាបត្តិំ អាបន្នោ, សាស្ស យថាធម្មំ បដិកតា។ យទិ សង្ឃស្ស បត្តកល្លំ, សង្ឃោ បវារេយ្យា’’តិ។

ឥធ បន, ភិក្ខវេ, ភិក្ខុ តទហុ បវារណាយ បាចិត្តិយំ អជ្ឈាបន្នោ ហោតិ…បេ.… បាដិទេសនីយំ អជ្ឈាបន្នោ ហោតិ… ទុក្កដំ អជ្ឈាបន្នោ ហោតិ… ទុព្ភាសិតំ អជ្ឈាបន្នោ ហោតិ។ ឯកច្ចេ ភិក្ខូ ទុព្ភាសិតទិដ្ឋិនោ ហោន្តិ, ឯកច្ចេ ភិក្ខូ សង្ឃាទិសេសទិដ្ឋិនោ ហោន្តិ។ យេ តេ, ភិក្ខវេ, ភិក្ខូ ទុព្ភាសិតទិដ្ឋិនោ, តេហិ សោ, ភិក្ខវេ, ភិក្ខុ ឯកមន្តំ អបនេត្វា យថាធម្មំ ការាបេត្វា សង្ឃំ ឧបសង្កមិត្វា ឯវមស្ស វចនីយោ – ‘‘យំ ខោ សោ, អាវុសោ, ភិក្ខុ អាបត្តិំ អាបន្នោ, សាស្ស យថាធម្មំ បដិកតា។ យទិ សង្ឃស្ស បត្តកល្លំ, សង្ឃោ បវារេយ្យា’’តិ។

ឥធ បន, ភិក្ខវេ, ភិក្ខុ តទហុ បវារណាយ ទុព្ភាសិតំ អជ្ឈាបន្នោ ហោតិ។ ឯកច្ចេ ភិក្ខូ ទុព្ភាសិតទិដ្ឋិនោ ហោន្តិ, ឯកច្ចេ ភិក្ខូ ថុល្លច្ចយទិដ្ឋិនោ ហោន្តិ…បេ.… ឯកច្ចេ ភិក្ខូ ទុព្ភាសិតទិដ្ឋិនោ ហោន្តិ, ឯកច្ចេ ភិក្ខូ បាចិត្តិយទិដ្ឋិនោ ហោន្តិ… ឯកច្ចេ ភិក្ខូ ទុព្ភាសិតទិដ្ឋិនោ ហោន្តិ, ឯកច្ចេ ភិក្ខូ បាដិទេសនីយទិដ្ឋិនោ ហោន្តិ… ឯកច្ចេ ភិក្ខូ ទុព្ភាសិតទិដ្ឋិនោ ហោន្តិ, ឯកច្ចេ ភិក្ខូ ទុក្កដទិដ្ឋិនោ ហោន្តិ។ យេ តេ, ភិក្ខវេ, ភិក្ខូ ទុព្ភាសិតទិដ្ឋិនោ, តេហិ សោ, ភិក្ខវេ, ភិក្ខុ ឯកមន្តំ អបនេត្វា យថាធម្មំ ការាបេត្វា សង្ឃំ ឧបសង្កមិត្វា ឯវមស្ស វចនីយោ – ‘‘យំ ខោ សោ, អាវុសោ, ភិក្ខុ អាបត្តិំ អាបន្នោ, សាស្ស យថាធម្មំ បដិកតា។ យទិ សង្ឃស្ស បត្តកល្លំ, សង្ឃោ បវារេយ្យា’’តិ។

ថុល្លច្ចយវត្ថុកាទិ និដ្ឋិតា។

១៤៣. វត្ថុឋបនាទិ

២៣៩. ឥធ បន, ភិក្ខវេ, ភិក្ខុ តទហុ បវារណាយ សង្ឃមជ្ឈេ ឧទាហរេយ្យ – ‘‘សុណាតុ មេ, ភន្តេ, សង្ឃោ។ ឥទំ វត្ថុ បញ្ញាយតិ, ន បុគ្គលោ។ យទិ សង្ឃស្ស បត្តកល្លំ, វត្ថុំ ឋបេត្វា សង្ឃោ បវារេយ្យា’’តិ។ សោ ឯវមស្ស វចនីយោ – ‘‘ភគវតា ខោ, អាវុសោ, វិសុទ្ធានំ បវារណា បញ្ញត្តា។ សចេ វត្ថុ បញ្ញាយតិ, ន បុគ្គលោ, ឥទានេវ នំ វទេហី’’តិ។

ឥធ បន, ភិក្ខវេ, ភិក្ខុ តទហុ បវារណាយ សង្ឃមជ្ឈេ ឧទាហរេយ្យ – ‘‘សុណាតុ មេ, ភន្តេ, សង្ឃោ។ អយំ បុគ្គលោ បញ្ញាយតិ, ន វត្ថុ។ យទិ សង្ឃស្ស បត្តកល្លំ, បុគ្គលំ ឋបេត្វា សង្ឃោ បវារេយ្យា’’តិ។ សោ ឯវមស្ស វចនីយោ – ‘‘ភគវតា ខោ, អាវុសោ, សមគ្គានំ បវារណា បញ្ញត្តា។ សចេ បុគ្គលោ បញ្ញាយតិ, ន វត្ថុ, ឥទានេវ នំ វទេហី’’តិ។

ឥធ បន, ភិក្ខវេ, ភិក្ខុ តទហុ បវារណាយ សង្ឃមជ្ឈេ ឧទាហរេយ្យ – ‘‘សុណាតុ មេ, ភន្តេ, សង្ឃោ។ ឥទំ វត្ថុ ច បុគ្គលោ ច បញ្ញាយតិ។ យទិ សង្ឃស្ស បត្តកល្លំ, វត្ថុញ្ច បុគ្គលញ្ច ឋបេត្វា សង្ឃោ បវារេយ្យា’’តិ។ សោ ឯវមស្ស វចនីយោ – ‘‘ភគវតា ខោ, អាវុសោ, វិសុទ្ធានញ្ច សមគ្គានញ្ច បវារណា បញ្ញត្តា។ សចេ វត្ថុ ច បុគ្គលោ ច បញ្ញាយតិ, ឥទានេវ នំ វទេហី’’តិ។

បុព្ពេ ចេ, ភិក្ខវេ, បវារណាយ វត្ថុ បញ្ញាយតិ, បច្ឆា បុគ្គលោ, កល្លំ វចនាយ។ បុព្ពេ ចេ, ភិក្ខវេ, បវារណាយ បុគ្គលោ បញ្ញាយតិ, បច្ឆា វត្ថុ, កល្លំ វចនាយ។ បុព្ពេ ចេ, ភិក្ខវេ, បវារណាយ វត្ថុ ច បុគ្គលោ ច បញ្ញាយតិ, តំ ចេ កតាយ បវារណាយ ឧក្កោដេតិ, ឧក្កោដនកំ បាចិត្តិយន្តិ។

វត្ថុឋបនាទិ និដ្ឋិតា។

១៤៤. ភណ្ឌនការកវត្ថុ

២៤០. តេន ខោ បន សមយេន សម្ពហុលា សន្ទិដ្ឋា សម្ភត្តា ភិក្ខូ កោសលេសុ ជនបទេ អញ្ញតរស្មិំ អាវាសេ វស្សំ ឧបគច្ឆិំសុ។ តេសំ សាមន្តា អញ្ញេ ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា វស្សំ ឧបគច្ឆិំសុ – មយំ តេសំ ភិក្ខូនំ វស្សំវុដ្ឋានំ បវារណាយ បវារណំ ឋបេស្សាមាតិ។ អស្សោសុំ ខោ តេ ភិក្ខូ – ‘‘អម្ហាកំ កិរ សាមន្តា អញ្ញេ ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា វស្សំ ឧបគតា – មយំ តេសំ ភិក្ខូនំ វស្សំវុដ្ឋានំ បវារណាយ បវារណំ ឋបេស្សាមា’’តិ។ កថំ នុ ខោ អម្ហេហិ បដិបជ្ជិតព្ពន្តិ? ភគវតោ ឯតមត្ថំ អារោចេសុំ។

ឥធ បន, ភិក្ខវេ, សម្ពហុលា សន្ទិដ្ឋា សម្ភត្តា ភិក្ខូ អញ្ញតរស្មិំ អាវាសេ វស្សំ ឧបគច្ឆន្តិ។ តេសំ សាមន្តា អញ្ញេ ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា វស្សំ ឧបគច្ឆន្តិ – មយំ តេសំ ភិក្ខូនំ វស្សំវុដ្ឋានំ បវារណាយ បវារណំ ឋបេស្សាមាតិ។ អនុជានាមិ, ភិក្ខវេ, តេហិ ភិក្ខូហិ ទ្វេ តយោ ឧបោសថេ ចាតុទ្ទសិកេ កាតុំ – កថំ មយំ តេហិ ភិក្ខូហិ បឋមតរំ បវារេយ្យាមាតិ។ តេ ចេ, ភិក្ខវេ, ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា តំ អាវាសំ អាគច្ឆន្តិ, តេហិ, ភិក្ខវេ, អាវាសិកេហិ ភិក្ខូហិ លហុំ លហុំ សន្និបតិត្វា បវារេតព្ពំ, បវារេត្វា វត្តព្ពា – ‘‘បវារិតា ខោ មយំ, អាវុសោ; យថាយស្មន្តា មញ្ញន្តិ តថា ករោន្តូ’’តិ។ តេ ចេ, ភិក្ខវេ, ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា អសំវិហិតា តំ អាវាសំ អាគច្ឆន្តិ, តេហិ, ភិក្ខវេ, អាវាសិកេហិ ភិក្ខូហិ អាសនំ បញ្ញបេតព្ពំ, បាទោទកំ បាទបីឋំ បាទកថលិកំ ឧបនិក្ខិបិតព្ពំ, បច្ចុគ្គន្ត្វា បត្តចីវរំ បដិគ្គហេតព្ពំ, បានីយេន បរិបុច្ឆិតព្ពា; តេសំ វិក្ខិត្វា វិក្ខិបាបេត្វា (បដិវិសោធកានំ មតិ), អាចិក្ខិត្វា (ក.) និស្សីមំ គន្ត្វា បវារេតព្ពំ, បវារេត្វា វត្តព្ពា – ‘‘បវារិតា ខោ មយំ, អាវុសោ; យថាយស្មន្តា មញ្ញន្តិ តថា ករោន្តូ’’តិ។ ឯវញ្ចេតំ លភេថ, ឥច្ចេតំ កុសលំ។ នោ ចេ លភេថ, អាវាសិកេន ភិក្ខុនា ព្យត្តេន បដិពលេន អាវាសិកា ភិក្ខូ ញាបេតព្ពា –

‘‘សុណន្តុ មេ, អាយស្មន្តោ អាយស្មន្តា (ក.), អាវាសិកា។ យទាយស្មន្តានំ បត្តកល្លំ, ឥទានិ ឧបោសថំ ករេយ្យាម, បាតិមោក្ខំ ឧទ្ទិសេយ្យាម , អាគមេ កាឡេ បវារេយ្យាមា’’តិ។ តេ ចេ, ភិក្ខវេ, ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា តេ ភិក្ខូ ឯវំ វទេយ្យុំ – ‘‘សាធាវុសោ, ឥទានេវ នោ បវារេថា’’តិ, តេ ឯវមស្សុ វចនីយា – ‘‘អនិស្សរា ខោ តុម្ហេ, អាវុសោ, អម្ហាកំ បវារណាយ; ន តាវ មយំ បវារេយ្យាមា’’តិ។ តេ ចេ, ភិក្ខវេ, ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា តំ កាឡំ អនុវសេយ្យុំ, អាវាសិកេន, ភិក្ខវេ, ភិក្ខុនា ព្យត្តេន បដិពលេន អាវាសិកា ភិក្ខូ ញាបេតព្ពា –

‘‘សុណន្តុ មេ, អាយស្មន្តោ, អាវាសិកា។ យទាយស្មន្តានំ បត្តកល្លំ, ឥទានិ ឧបោសថំ ករេយ្យាម, បាតិមោក្ខំ ឧទ្ទិសេយ្យាម, អាគមេ ជុណ្ហេ បវារេយ្យាមា’’តិ។ តេ ចេ, ភិក្ខវេ, ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា តេ ភិក្ខូ ឯវំ វទេយ្យុំ – ‘‘សាធាវុសោ, ឥទានេវ នោ បវារេយ្យាថា’’តិ, តេ ឯវមស្សុ វចនីយា – ‘‘អនិស្សរា ខោ តុម្ហេ, អាវុសោ, អម្ហាកំ បវារណាយ, ន តាវ មយំ បវារេយ្យាមា’’តិ។ តេ ចេ, ភិក្ខវេ, ភិក្ខូ ភណ្ឌនការកា កលហការកា វិវាទការកា ភស្សការកា សង្ឃេ អធិករណការកា តម្បិ ជុណ្ហំ អនុវសេយ្យុំ, តេហិ, ភិក្ខវេ, ភិក្ខូហិ សព្ពេហេវ អាគមេ ជុណ្ហេ កោមុទិយា ចាតុមាសិនិយា អកាមា បវារេតព្ពំ។

តេហិ ចេ, ភិក្ខវេ, ភិក្ខូហិ បវារិយមានេ គិលានោ អគិលានស្ស បវារណំ ឋបេតិ, សោ ឯវមស្ស វចនីយោ – ‘‘អាយស្មា ខោ គិលានោ។ គិលានោ ច អននុយោគក្ខមោ វុត្តោ ភគវតា។ អាគមេហិ, អាវុសោ, យាវ អរោគោ ហោសិ។ អរោគោ អាកង្ខមានោ ចោទេស្សសី’’តិ។ ឯវញ្ចេ វុច្ចមានោ ចោទេតិ, អនាទរិយេ បាចិត្តិយំ។ តេហិ ចេ, ភិក្ខវេ, ភិក្ខូហិ បវារិយមានេ អគិលានោ គិលានស្ស បវារណំ ឋបេតិ, សោ ឯវមស្ស វចនីយោ – ‘‘អយំ ខោ, អាវុសោ, ភិក្ខុ គិលានោ។ គិលានោ ច អននុយោគក្ខមោ វុត្តោ ភគវតា។ អាគមេហិ, អាវុសោ, យាវាយំ ភិក្ខុ អរោគោ ហោតិ។ អរោគំ អាកង្ខមានោ ចោទេស្សសី’’តិ។ ឯវញ្ចេ វុច្ចមានោ ចោទេតិ, អនាទរិយេ បាចិត្តិយំ។ តេហិ ចេ, ភិក្ខវេ, ភិក្ខូហិ បវារិយមានេ គិលានោ គិលានស្ស បវារណំ ឋបេតិ, សោ ឯវមស្ស វចនីយោ – ‘‘អាយស្មន្តា ខោ គិលានា។ គិលានោ ច អននុយោគក្ខមោ វុត្តោ ភគវតា។ អាគមេហិ, អាវុសោ, យាវ អរោគា ហោថ។ អរោគោ អរោគំ អាកង្ខមានោ ចោទេស្សសី’’តិ យាវ អរោគោ ហោតិ, អរោគំ អាកង្ខមានោ ចោទេស្សសីតិ (ក.)។ ឯវញ្ចេ វុច្ចមានោ ចោទេតិ, អនាទរិយេ បាចិត្តិយំ។ តេហិ ចេ, ភិក្ខវេ, ភិក្ខូហិ បវារិយមានេ អគិលានោ អគិលានស្ស បវារណំ ឋបេតិ, ឧភោ សង្ឃេន សមនុយុញ្ជិត្វា សមនុគាហិត្វា សមនុភាសិត្វា (សី.) យថាធម្មំ ការាបេត្វា សង្ឃេន បវារេតព្ពន្តិ។

ភណ្ឌនការកវត្ថុ និដ្ឋិតំ។

១៤៥. បវារណាសង្គហោ

២៤១. តេន ខោ បន សមយេន សម្ពហុលា សន្ទិដ្ឋា សម្ភត្តា ភិក្ខូ កោសលេសុ ជនបទេ អញ្ញតរស្មិំ អាវាសេ វស្សំ ឧបគច្ឆិំសុ។ តេសំ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ ហោតិ។ អថ ខោ តេសំ ភិក្ខូនំ ឯតទហោសិ – ‘‘អម្ហាកំ ខោ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ។ សចេ មយំ ឥទានិ បវារេស្សាម , សិយាបិ ភិក្ខូ បវារេត្វា ចារិកំ បក្កមេយ្យុំ។ ឯវំ មយំ ឥមម្ហា ផាសុវិហារា បរិពាហិរា ភវិស្សាម។ កថំ នុ ខោ អម្ហេហិ បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ។

ឥធ បន, ភិក្ខវេ, សម្ពហុលា សន្ទិដ្ឋា សម្ភត្តា ភិក្ខូ អញ្ញតរស្មិំ អាវាសេ វស្សំ ឧបគច្ឆន្តិ។ តេសំ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ ហោតិ។ តត្រ ចេ ភិក្ខូនំ ឯវំ ហោតិ – ‘‘អម្ហាកំ ខោ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ។ សចេ មយំ ឥទានិ បវារេស្សាម, សិយាបិ ភិក្ខូ បវារេត្វា ចារិកំ បក្កមេយ្យុំ។ ឯវំ មយំ ឥមម្ហា ផាសុវិហារា បរិពាហិរា ភវិស្សាមា’’តិ, អនុជានាមិ, ភិក្ខវេ, តេហិ ភិក្ខូហិ បវារណាសង្គហំ កាតុំ។ ឯវញ្ច បន, ភិក្ខវេ, កាតព្ពោ។ សព្ពេហេវ ឯកជ្ឈំ សន្និបតិតព្ពំ – សន្និបតិត្វា ព្យត្តេន ភិក្ខុនា បដិពលេន សង្ឃោ ញាបេតព្ពោ –

‘‘សុណាតុ មេ, ភន្តេ, សង្ឃោ។ អម្ហាកំ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ។ សចេ មយំ ឥទានិ បវារេស្សាម, សិយាបិ ភិក្ខូ បវារេត្វា ចារិកំ បក្កមេយ្យុំ។ ឯវំ មយំ ឥមម្ហា ផាសុវិហារា បរិពាហិរា ភវិស្សាម។ យទិ សង្ឃស្ស បត្តកល្លំ, សង្ឃោ បវារណាសង្គហំ ករេយ្យ, ឥទានិ ឧបោសថំ ករេយ្យ, បាតិមោក្ខំ ឧទ្ទិសេយ្យ, អាគមេ ជុណ្ហេ កោមុទិយា ចាតុមាសិនិយា បវារេយ្យ។ ឯសា ញត្តិ។

‘‘សុណាតុ មេ, ភន្តេ, សង្ឃោ។ អម្ហាកំ សមគ្គានំ សម្មោទមានានំ អវិវទមានានំ វិហរតំ អញ្ញតរោ ផាសុវិហារោ អធិគតោ។ សចេ មយំ ឥទានិ បវារេស្សាម, សិយាបិ ភិក្ខូ បវារេត្វា ចារិកំ បក្កមេយ្យុំ។ ឯវំ មយំ ឥមម្ហា ផាសុវិហារា បរិពាហិរា ភវិស្សាម។ សង្ឃោ បវារណាសង្គហំ ករោតិ, ឥទានិ ឧបោសថំ ករិស្សតិ, បាតិមោក្ខំ ឧទ្ទិសិស្សតិ, អាគមេ ជុណ្ហេ កោមុទិយា ចាតុមាសិនិយា បវារេស្សតិ។ យស្សាយស្មតោ ខមតិ បវារណាសង្គហស្ស ករណំ, ឥទានិ ឧបោសថំ ករិស្សតិ, បាតិមោក្ខំ ឧទ្ទិសិស្សតិ, អាគមេ ជុណ្ហេ កោមុទិយា ចាតុមាសិនិយា បវារេស្សតិ, សោ តុណ្ហស្ស; យស្ស នក្ខមតិ, សោ ភាសេយ្យ។

‘‘កតោ សង្ឃេន បវារណាសង្គហោ, ឥទានិ ឧបោសថំ ករិស្សតិ, បាតិមោក្ខំ ឧទ្ទិសិស្សតិ, អាគមេ ជុណ្ហេ កោមុទិយា ចាតុមាសិនិយា បវារេស្សតិ។ ខមតិ សង្ឃស្ស, តស្មា តុណ្ហី, ឯវមេតំ ធារយាមី’’តិ។

តេហិ ចេ, ភិក្ខវេ, ភិក្ខូហិ កតេ បវារណាសង្គហេ អញ្ញតរោ ភិក្ខុ ឯវំ វទេយ្យ – ‘‘ឥច្ឆាមហំ, អាវុសោ, ជនបទចារិកំ បក្កមិតុំ; អត្ថិ មេ ជនបទេ ករណីយ’’ន្តិ, សោ ឯវមស្ស វចនីយោ – ‘‘សាធាវុសោ, បវារេត្វា គច្ឆាហី’’តិ។ សោ ចេ , ភិក្ខវេ, ភិក្ខុ បវារយមានោ អញ្ញតរស្ស ភិក្ខុនោ បវារណំ ឋបេតិ, សោ ឯវមស្ស វចនីយោ – ‘‘អនិស្សរោ ខោ មេ ត្វំ, អាវុសោ, បវារណាយ, ន តាវាហំ បវារេស្សាមី’’តិ។ តស្ស ចេ, ភិក្ខវេ, ភិក្ខុនោ បវារយមានស្ស អញ្ញតរោ ភិក្ខុ តស្ស ភិក្ខុនោ បវារណំ ឋបេតិ, ឧភោ សង្ឃេន សមនុយុញ្ជិត្វា សមនុគាហិត្វា យថាធម្មំ ការាបេតព្ពា។ សោ ចេ, ភិក្ខវេ, ភិក្ខុ ជនបទេ តំ ករណីយំ តីរេត្វា បុនទេវ អន្តោ កោមុទិយា ចាតុមាសិនិយា តំ អាវាសំ អាគច្ឆតិ, តេហិ ចេ, ភិក្ខវេ, ភិក្ខូហិ បវារិយមានេ អញ្ញតរោ ភិក្ខុ តស្ស ភិក្ខុនោ បវារណំ ឋបេតិ, សោ ឯវមស្ស វចនីយោ – ‘‘អនិស្សរោ ខោ មេ ត្វំ, អាវុសោ, បវារណាយ; បវារិតោ អហ’’ន្តិ។ តេហិ ចេ, ភិក្ខវេ, ភិក្ខូហិ បវារិយមានេ សោ ភិក្ខុ អញ្ញតរស្ស ភិក្ខុនោ បវារណំ ឋបេតិ, ឧភោ សង្ឃេន សមនុយុញ្ជិត្វា សមនុគាហិត្វា យថាធម្មំ ការាបេត្វា សង្ឃេន បវារេតព្ពន្តិ។

បវារណាសង្គហោ និដ្ឋិតោ។

បវារណាក្ខន្ធកោ ចតុត្ថោ។

១៤៦. តស្សុទ្ទានំ

វស្សំវុដ្ឋា កោសលេសុ, អគមុំ សត្ថុ ទស្សនំ;

អផាសុំ បសុសំវាសំ, អញ្ញមញ្ញានុលោមតា។

បវារេន្តា បណាមញ្ច បវារេន្តាសនេ ទ្វេ ច (សី. ស្យា.), កម្មំ គិលានញាតកា;

រាជា ចោរា ច ធុត្តា ច, ភិក្ខុបច្ចត្ថិកា តថា។

បញ្ច ចតុតយោ ទ្វេកោ, អាបន្នោ វេមតី សរិ;

សព្ពោ សង្ឃោ វេមតិកោ, ពហូ សមា ច ថោកិកា។

អាវាសិកា ចាតុទ្ទស, លិង្គសំវាសកា ឧភោ;

គន្តព្ពំ ន និសិន្នាយ, ឆន្ទទានេ បវារណា ឆន្ទទានបវារណា (ក.)។

សវរេហិ ខេបិតា មេឃោ, អន្តរា ច បវារណា;

ន ឥច្ឆន្តិ បុរម្ហាកំ, អដ្ឋបិតា ច ភិក្ខុនោ។

កិម្ហិ វាតិ កតមញ្ច, ទិដ្ឋេន សុតសង្កាយ;

ចោទកោ ចុទិតកោ ច, ថុល្លច្ចយំ វត្ថុ ភណ្ឌនំ;

បវារណាសង្គហោ ច, អនិស្សរោ បវារយេតិ។

ឥមម្ហិ ខន្ធកេ វត្ថូនិ ឆចត្តារីសាតិ។

បវារណាក្ខន្ធកោ និដ្ឋិតោ។