៣. វស្សូបនាយិកក្ខន្ធកោ

៣. វស្សូបនាយិកក្ខន្ធកោ

១០៧. វស្សូបនាយិកានុជាននា

១៨៤. តេន សមយេន ពុទ្ធោ ភគវា រាជគហេ វិហរតិ វេឡុវនេ កលន្ទកនិវាបេ។ តេន ខោ បន សមយេន ភគវតា ភិក្ខូនំ វស្សាវាសោ អបញ្ញត្តោ ហោតិ។ តេឥធ ភិក្ខូ ហេមន្តម្បិ គិម្ហម្បិ វស្សម្បិ ចារិកំ ចរន្តិ។ មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម សមណា សក្យបុត្តិយា ហេមន្តម្បិ គិម្ហម្បិ វស្សម្បិ ចារិកំ ចរិស្សន្តិ, ហរិតានិ តិណានិ សម្មទ្ទន្តា, ឯកិន្ទ្រិយំ ជីវំ វិហេឋេន្តា, ពហូ ខុទ្ទកេ បាណេ សង្ឃាតំ អាបាទេន្តា។ ឥមេ ហិ នាម អញ្ញតិត្ថិយា ទុរក្ខាតធម្មា វស្សាវាសំ អល្លីយិស្សន្តិ សង្កសាយិស្សន្តិ។ ឥមេ ហិ នាម សកុន្តកា រុក្ខគ្គេសុ កុលាវកានិ ករិត្វា វស្សាវាសំ អល្លីយិស្សន្តិ សង្កសាយិស្សន្តិ សង្កាសយិស្សន្តិ (សី. ស្យា.)។ ឥមេ បន សមណា សក្យបុត្តិយា ហេមន្តម្បិ គិម្ហម្បិ វស្សម្បិ ចារិកំ ចរន្តិ, ហរិតានិ តិណានិ សម្មទ្ទន្តា, ឯកិន្ទ្រិយំ ជីវំ វិហេឋេន្តា, ពហូ ខុទ្ទកេ បាណេ សង្ឃាតំ អាបាទេន្តា’’តិ។ អស្សោសុំ ខោ ភិក្ខូ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ។ អថ ខោ តេ ភិក្ខូ ភគវតោ ឯតមត្ថំ អារោចេសុំ។ អថ ខោ ភគវា ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ – ‘‘អនុជានាមិ, ភិក្ខវេ, វស្សំ ឧបគន្តុ’’ន្តិ។ អថ ខោ ភិក្ខូនំ ឯតទហោសិ – ‘‘កទា នុ ខោ វស្សំ ឧបគន្តព្ព’’ន្តិ? ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, វស្សានេ វស្សំ ឧបគន្តុន្តិ។

អថ ខោ ភិក្ខូនំ ឯតទហោសិ – ‘‘កតិ នុ ខោ វស្សូបនាយិកា’’តិ? ភគវតោ ឯតមត្ថំ

អារោចេសុំ។ ទ្វេមា, ភិក្ខវេ, វស្សូបនាយិកា – បុរិមិកា, បច្ឆិមិកា។ អបរជ្ជុគតាយ អាសាឡ្ហិយា បុរិមិកា ឧបគន្តព្ពា, មាសគតាយ អាសាឡ្ហិយា បច្ឆិមិកា ឧបគន្តព្ពា – ឥមា ខោ, ភិក្ខវេ, ទ្វេ វស្សូបនាយិកាតិ។

វស្សូបនាយិកានុជាននា និដ្ឋិតា។

១០៨. វស្សានេ ចារិកាបដិក្ខេបាទិ

១៨៥. តេន ខោ បន សមយេន ឆព្ពគ្គិយា ភិក្ខូ វស្សំ ឧបគន្ត្វា អន្តរាវស្សំ ចារិកំ ចរន្តិ។ មនុស្សា តថេវ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម សមណា សក្យបុត្តិយា ហេមន្តម្បិ គិម្ហម្បិ វស្សម្បិ ចារិកំ ចរិស្សន្តិ, ហរិតានិ តិណានិ សម្មទ្ទន្តា, ឯកិន្ទ្រិយំ ជីវំ វិហេឋេន្តា, ពហូ ខុទ្ទកេ បាណេ សង្ឃាតំ អាបាទេន្តា។ ឥមេ ហិ នាម អញ្ញតិត្ថិយា ទុរក្ខាតធម្មា វស្សាវាសំ អល្លីយិស្សន្តិ សង្កសាយិស្សន្តិ។ ឥមេ ហិ នាម សកុន្តកា រុក្ខគ្គេសុ កុលាវកានិ ករិត្វា វស្សាវាសំ អល្លីយិស្សន្តិ សង្កសាយិស្សន្តិ។ ឥមេ បន សមណា សក្យបុត្តិយា ហេមន្តម្បិ គិម្ហម្បិ វស្សម្បិ ចារិកំ ចរន្តិ, ហរិតានិ តិណានិ សម្មទ្ទន្តា, ឯកិន្ទ្រិយំ ជីវំ វិហេឋេន្តា, ពហូ ខុទ្ទកេ បាណេ សង្ឃាតំ អាបាទេន្តា’’តិ។ អស្សោសុំ ខោ ភិក្ខូ តេសំ មនុស្សានំ ឧជ្ឈាយន្តានំ ខិយ្យន្តានំ វិបាចេន្តានំ។ យេ តេ ភិក្ខូ អប្បិច្ឆា…បេ.… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម ឆព្ពគ្គិយា ភិក្ខូ វស្សំ ឧបគន្ត្វា អន្តរាវស្សំ ចារិកំ ចរិស្សន្តី’’តិ? អថ ខោ តេ ភិក្ខូ ភគវតោ ឯតមត្ថំ អារោចេសុំ។ អថ ខោ ភគវា ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ – ‘‘ន, ភិក្ខវេ, វស្សំ ឧបគន្ត្វា បុរិមំ វា តេមាសំ បច្ឆិមំ វា តេមាសំ អវសិត្វា ចារិកា បក្កមិតព្ពា។ យោ បក្កមេយ្យ, អាបត្តិ ទុក្កដស្សា’’តិ។

១៨៦. តេន ខោ បន សមយេន ឆព្ពគ្គិយា ភិក្ខូ ន ឥច្ឆន្តិ វស្សំ ឧបគន្តុំ។ ភគវតោ ឯតមត្ថំ អារោចេសុំ។ ន, ភិក្ខវេ, វស្សំ ន ឧបគន្តព្ពំ។ យោ ន ឧបគច្ឆេយ្យ, អាបត្តិ ទុក្កដស្សាតិ។

តេន ខោ បន សមយេន ឆព្ពគ្គិយា ភិក្ខូ តទហុ វស្សូបនាយិកាយ វស្សំ អនុបគន្តុកាមា សញ្ចិច្ច អាវាសំ អតិក្កមន្តិ។ ភគវតោ ឯតមត្ថំ អារោចេសុំ។ ន, ភិក្ខវេ, តទហុ វស្សូបនាយិកាយ វស្សំ អនុបគន្តុកាមេន សញ្ចិច្ច អាវាសោ អតិក្កមិតព្ពោ។ យោ អតិក្កមេយ្យ, អាបត្តិ ទុក្កដស្សាតិ។

តេន ខោ បន សមយេន រាជា មាគធោ សេនិយោ ពិម្ពិសារោ វស្សំ ឧក្កឌ្ឍិតុកាមោ

ភិក្ខូនំ សន្តិកេ ទូតំ បាហេសិ – យទិ បនាយ្យា អាគមេ ជុណ្ហេ វស្សំ ឧបគច្ឆេយ្យុន្តិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, រាជូនំ អនុវត្តិតុន្តិ។

វស្សានេ ចារិកាបដិក្ខេបាទិ និដ្ឋិតា។

១០៩. សត្តាហករណីយានុជាននា

១៨៧. អថ ខោ ភគវា រាជគហេ យថាភិរន្តំ វិហរិត្វា យេន សាវត្ថិ តេន ចារិកំ បក្កាមិ។ អនុបុព្ពេន ចារិកំ ចរមានោ យេន សាវត្ថិ តទវសរិ។ តត្រ សុទំ ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ។ តេន ខោ បន សមយេន កោសលេសុ ជនបទេ ឧទេនេន ឧបាសកេន សង្ឃំ ឧទ្ទិស្ស វិហារោ ការាបិតោ ហោតិ។ សោ ភិក្ខូនំ សន្តិកេ ទូតំ បាហេសិ – ‘‘អាគច្ឆន្តុ ភទន្តា, ឥច្ឆាមិ ទានញ្ច ទាតុំ, ធម្មញ្ច សោតុំ, ភិក្ខូ ច បស្សិតុ’’ន្តិ។ ភិក្ខូ ឯវមាហំសុ – ‘‘ភគវតា, អាវុសោ, បញ្ញត្តំ ‘ន វស្សំ ឧបគន្ត្វា បុរិមំ វា តេមាសំ បច្ឆិមំ វា តេមាសំ អវសិត្វា ចារិកា បក្កមិតព្ពា’តិ។ អាគមេតុ ឧទេនោ ឧបាសកោ, យាវ ភិក្ខូ វស្សំ វសន្តិ។ វស្សំវុដ្ឋា អាគមិស្សន្តិ។ សចេ បនស្ស អច្ចាយិកំ ករណីយំ, តត្ថេវ អាវាសិកានំ ភិក្ខូនំ សន្តិកេ វិហារំ បតិដ្ឋាបេតូ’’តិ។ ឧទេនោ ឧបាសកោ ឧជ្ឈាយតិ ខិយ្យតិ វិបាចេតិ – ‘‘កថញ្ហិ នាម ភទន្តា មយា បហិតេ ន អាគច្ឆិស្សន្តិ។ អហញ្ហិ ទាយកោ ការកោ សង្ឃុបដ្ឋាកោ’’តិ។ អស្សោសុំ ខោ ភិក្ខូ ឧទេនស្ស ឧបាសកស្ស ឧជ្ឈាយន្តស្ស ខិយ្យន្តស្ស វិបាចេន្តស្ស។ អថ ខោ តេ ភិក្ខូ ភគវតោ ឯតមត្ថំ អារោចេសុំ។ អថ ខោ ភគវា ឯតស្មិំ និទានេ ឯតស្មិំ បករណេ ធម្មិំ កថំ កត្វា ភិក្ខូ អាមន្តេសិ – ‘‘អនុជានាមិ, ភិក្ខវេ, សត្តន្នំ សត្តាហករណីយេន បហិតេ គន្តុំ, ន ត្វេវ អប្បហិតេ។ ភិក្ខុស្ស, ភិក្ខុនិយា, សិក្ខមានាយ, សាមណេរស្ស, សាមណេរិយា, ឧបាសកស្ស, ឧបាសិកាយ – អនុជានាមិ, ភិក្ខវេ, ឥមេសំ សត្តន្នំ សត្តាហករណីយេន បហិតេ គន្តុំ, ន ត្វេវ អប្បហិតេ។ សត្តាហំ សន្និវត្តោ កាតព្ពោ’’។

១៨៨. ឥធ បន, ភិក្ខវេ, ឧបាសកេន សង្ឃំ ឧទ្ទិស្ស វិហារោ ការាបិតោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អាគច្ឆន្តុ ភទន្តា, ឥច្ឆាមិ ទានញ្ច ទាតុំ, ធម្មញ្ច សោតុំ, ភិក្ខូ ច បស្សិតុ’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ឧបាសកេន សង្ឃំ ឧទ្ទិស្ស អឌ្ឍយោគោ ការាបិតោ ហោតិ…បេ.… បាសាទោ ការាបិតោ ហោតិ… ហម្មិយំ ការាបិតំ ហោតិ… គុហា ការាបិតា ហោតិ… បរិវេណំ ការាបិតំ ហោតិ… កោដ្ឋកោ ការាបិតោ ហោតិ… ឧបដ្ឋានសាលា ការាបិតា ហោតិ… អគ្គិសាលា ការាបិតា ហោតិ… កប្បិយកុដិ ការាបិតា ហោតិ… វច្ចកុដិ ការាបិតា ហោតិ… ចង្កមោ ការាបិតោ ហោតិ … ចង្កមនសាលា ការាបិតា ហោតិ… ឧទបានោ ការាបិតោ ហោតិ … ឧទបានសាលា ការាបិតា ហោតិ… ជន្តាឃរំ ការាបិតំ ហោតិ… ជន្តាឃរសាលា ការាបិតា ហោតិ… បោក្ខរណី ការាបិតា ហោតិ… មណ្ឌបោ ការាបិតោ ហោតិ… អារាមោ ការាបិតោ ហោតិ… អារាមវត្ថុ ការាបិតំ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អាគច្ឆន្តុ ភទន្តា, ឥច្ឆាមិ ទានញ្ច ទាតុំ, ធម្មញ្ច សោតុំ, ភិក្ខូ ច បស្សិតុ’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ឧបាសកេន សម្ពហុលេ ភិក្ខូ ឧទ្ទិស្ស…បេ.… ឯកំ ភិក្ខុំ ឧទ្ទិស្ស វិហារោ ការាបិតោ ហោតិ… អឌ្ឍយោគោ ការាបិតោ ហោតិ… បាសាទោ ការាបិតោ ហោតិ … ហម្មិយំ ការាបិតំ ហោតិ… គុហា ការាបិតា ហោតិ… បរិវេណំ ការាបិតំ ហោតិ… កោដ្ឋកោ ការាបិតោ ហោតិ… ឧបដ្ឋានសាលា ការាបិតា ហោតិ… អគ្គិសាលា ការាបិតា ហោតិ… កប្បិយកុដិ ការាបិតា ហោតិ… វច្ចកុដិ ការាបិតា ហោតិ… ចង្កមោ ការាបិតោ ហោតិ… ចង្កមនសាលា ការាបិតា ហោតិ… ឧទបានោ ការាបិតោ ហោតិ… ឧទបានសាលា ការាបិតា ហោតិ… ជន្តាឃរំ ការាបិតំ ហោតិ… ជន្តាឃរសាលា ការាបិតា ហោតិ… បោក្ខរណី ការាបិតា ហោតិ… មណ្ឌបោ ការាបិតោ ហោតិ… អារាមោ ការាបិតោ ហោតិ… អារាមវត្ថុ ការាបិតំ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អាគច្ឆន្តុ ភទន្តា, ឥច្ឆាមិ ទានញ្ច ទាតុំ, ធម្មញ្ច សោតុំ, ភិក្ខូ ច បស្សិតុ’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ឧបាសកេន ភិក្ខុនិសង្ឃំ ឧទ្ទិស្ស…បេ.… សម្ពហុលា ភិក្ខុនិយោ ឧទ្ទិស្ស…បេ.… ឯកំ ភិក្ខុនិំ ឧទ្ទិស្ស…បេ.… សម្ពហុលា សិក្ខមានាយោ ឧទ្ទិស្ស…បេ.… ឯកំ សិក្ខមានំ ឧទ្ទិស្ស…បេ.… សម្ពហុលេ សាមណេរេ ឧទ្ទិស្ស…បេ.… ឯកំ សាមណេរំ ឧទ្ទិស្ស…បេ.… សម្ពហុលា សាមណេរិយោ ឧទ្ទិស្ស…បេ.… ឯកំ សាមណេរិំ ឧទ្ទិស្ស វិហារោ ការាបិតោ ហោតិ…បេ.… អឌ្ឍយោគោ ការាបិតោ ហោតិ… បាសាទោ ការាបិតោ ហោតិ… ហម្មិយំ ការាបិតំ ហោតិ… គុហា ការាបិតា ហោតិ… បរិវេណំ ការាបិតំ ហោតិ… កោដ្ឋកោ ការាបិតោ ហោតិ… ឧបដ្ឋានសាលា ការាបិតា ហោតិ… អគ្គិសាលា ការាបិតា ហោតិ … កប្បិយកុដិ ការាបិតា ហោតិ… ចង្កមោ ការាបិតោ ហោតិ… ចង្កមនសាលា ការាបិតា ហោតិ… ឧទបានោ ការាបិតោ ហោតិ… ឧទបានសាលា ការាបិតា ហោតិ… បោក្ខរណី ការាបិតា ហោតិ… មណ្ឌបោ ការាបិតោ ហោតិ… អារាមោ ការាបិតោ ហោតិ… អារាមវត្ថុ ការាបិតំ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អាគច្ឆន្តុ ភទន្តា, ឥច្ឆាមិ ទានញ្ច ទាតុំ , ធម្មញ្ច សោតុំ, ភិក្ខូ ច បស្សិតុ’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

១៨៩. ឥធ បន, ភិក្ខវេ, ឧបាសកេន អត្តនោ អត្ថាយ និវេសនំ ការាបិតំ ហោតិ…បេ.… សយនិឃរំ ការាបិតំ ហោតិ… ឧទោសិតោ ការាបិតោ ហោតិ… អដ្ដោ ការាបិតោ ហោតិ… មាឡោ ការាបិតោ ហោតិ… អាបណោ ការាបិតោ ហោតិ… អាបណសាលា ការាបិតា ហោតិ… បាសាទោ ការាបិតោ ហោតិ… ហម្មិយំ ការាបិតំ ហោតិ… គុហា ការាបិតា ហោតិ… បរិវេណំ ការាបិតំ ហោតិ… កោដ្ឋកោ ការាបិតោ ហោតិ… ឧបដ្ឋានសាលា ការាបិតា ហោតិ… អគ្គិសាលា ការាបិតា ហោតិ… រសវតី ការាបិតា ហោតិ… ចង្កមោ ការាបិតោ ហោតិ… ចង្កមនសាលា ការាបិតា ហោតិ… ឧទបានោ ការាបិតោ ហោតិ… ឧទបានសាលា ការាបិតា ហោតិ… បោក្ខរណី ការាបិតា ហោតិ… មណ្ឌបោ ការាបិតោ ហោតិ… អារាមោ ការាបិតោ ហោតិ … អារាមវត្ថុ ការាបិតំ ហោតិ… បុត្តស្ស វា វារេយ្យំ ហោតិ… ធីតុយា វា វារេយ្យំ ហោតិ… គិលានោ វា ហោតិ… អភិញ្ញាតំ វា សុត្តន្តំ ភណតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘អាគច្ឆន្តុ ភទន្តា, ឥមំ សុត្តន្តំ បរិយាបុណិស្សន្តិ, បុរាយំ សុត្តន្តោ ន បលុជ្ជតី’តិ។ អញ្ញតរំ វា បនស្ស កិច្ចំ ហោតិ – ករណីយំ វា, សោ ចេ ភិក្ខូនំ សន្តិកេ ទូតំ បហិណេយ្យ – ‘‘អាគច្ឆន្តុ ភទន្តា, ឥច្ឆាមិ ទានញ្ច ទាតុំ, ធម្មញ្ច សោតុំ, ភិក្ខូ ច បស្សិតុ’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

១៩០. ឥធ បន, ភិក្ខវេ, ឧបាសិកាយ សង្ឃំ ឧទ្ទិស្ស វិហារោ ការាបិតោ ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អាគច្ឆន្តុ អយ្យា, ឥច្ឆាមិ ទានញ្ច ទាតុំ, ធម្មញ្ច សោតុំ, ភិក្ខូ ច បស្សិតុ’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ឧបាសិកាយ សង្ឃំ ឧទ្ទិស្ស អឌ្ឍយោគោ ការាបិតោ ហោតិ…បេ.… បាសាទោ ការាបិតោ ហោតិ… ហម្មិយំ ការាបិតំ ហោតិ… គុហា ការាបិតា ហោតិ… បរិវេណំ ការាបិតំ ហោតិ… កោដ្ឋកោ ការាបិតោ ហោតិ… ឧបដ្ឋានសាលា ការាបិតា ហោតិ… អគ្គិសាលា ការាបិតា ហោតិ… កប្បិយកុដិ ការាបិតា ហោតិ… វច្ចកុដិ ការាបិតា ហោតិ… ចង្កមោ ការាបិតោ ហោតិ… ចង្កមនសាលា ការាបិតា ហោតិ… ឧទបានោ ការាបិតោ ហោតិ… ឧទបានសាលា ការាបិតា ហោតិ… ជន្តាឃរំ ការាបិតំ ហោតិ… ជន្តាឃរសាលា ការាបិតា ហោតិ… បោក្ខរណី ការាបិតា ហោតិ… មណ្ឌបោ ការាបិតោ ហោតិ… អារាមោ ការាបិតោ ហោតិ… អារាមវត្ថុ ការាបិតំ ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អាគច្ឆន្តុ អយ្យា, ឥច្ឆាមិ ទានញ្ច ទាតុំ, ធម្មញ្ច សោតុំ, ភិក្ខូ ច បស្សិតុ’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ឧបាសិកាយ សម្ពហុលេ ភិក្ខូ ឧទ្ទិស្ស…បេ.… ឯកំ ភិក្ខុំ ឧទ្ទិស្ស…បេ.… ភិក្ខុនិសង្ឃំ ឧទ្ទិស្ស…បេ.… សម្ពហុលា ភិក្ខុនិយោ ឧទ្ទិស្ស…បេ.… ឯកំ ភិក្ខុនិំ ឧទ្ទិស្ស…បេ.… សម្ពហុលា សិក្ខមានាយោ ឧទ្ទិស្ស…បេ.… ឯកំ សិក្ខមានំ ឧទ្ទិស្ស…បេ.… សម្ពហុលេ សាមណេរេ ឧទ្ទិស្ស…បេ.… ឯកំ សាមណេរំ ឧទ្ទិស្ស…បេ.… សម្ពហុលា សាមណេរិយោ ឧទ្ទិស្ស…បេ.… ឯកំ សាមណេរិំ ឧទ្ទិស្ស…បេ.…។

១៩១. ឥធ បន, ភិក្ខវេ, ឧបាសិកាយ អត្តនោ អត្ថាយ និវេសនំ ការាបិតំ ហោតិ…បេ.… សយនិឃរំ ការាបិតំ ហោតិ… ឧទោសិតោ ការាបិតោ ហោតិ… អដ្ដោ ការាបិតោ ហោតិ… មាឡោ ការាបិតោ ហោតិ… អាបណោ ការាបិតោ ហោតិ… អាបណសាលា ការាបិតា ហោតិ… បាសាទោ ការាបិតោ ហោតិ… ហម្មិយំ ការាបិតំ ហោតិ… គុហា ការាបិតា ហោតិ… បរិវេណំ ការាបិតំ ហោតិ… កោដ្ឋកោ ការាបិតោ ហោតិ… ឧបដ្ឋានសាលា ការាបិតា ហោតិ… អគ្គិសាលា ការាបិតា ហោតិ… រសវតី ការាបិតា ហោតិ… ចង្កមោ ការាបិតោ ហោតិ… ចង្កមនសាលា ការាបិតា ហោតិ… ឧទបានោ ការាបិតោ ហោតិ … ឧទបានសាលា ការាបិតា ហោតិ… បោក្ខរណី ការាបិតា ហោតិ… មណ្ឌបោ ការាបិតោ ហោតិ… អារាមោ ការាបិតោ ហោតិ… អារាមវត្ថុ ការាបិតំ ហោតិ… បុត្តស្ស វា វារេយ្យំ ហោតិ… ធីតុយា វា វារេយ្យំ ហោតិ… គិលានា វា ហោតិ… អភិញ្ញាតំ វា សុត្តន្តំ ភណតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អាគច្ឆន្តុ អយ្យា, ឥមំ សុត្តន្តំ បរិយាបុណិស្សន្តិ, បុរាយំ សុត្តន្តោ បលុជ្ជតី’’តិ។ អញ្ញតរំ វា បនស្សា កិច្ចំ ហោតិ ករណីយំ វា, សា ចេ ភិក្ខូនំ សន្តិកេ ទូតំ បហិណេយ្យ – ‘‘អាគច្ឆន្តុ អយ្យា, ឥច្ឆាមិ ទានញ្ច ទាតុំ, ធម្មញ្ច សោតុំ, ភិក្ខូ ច បស្សិតុ’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

១៩២. ឥធ បន, ភិក្ខវេ, ភិក្ខុនា សង្ឃំ ឧទ្ទិស្ស…បេ.… ភិក្ខុនិយា សង្ឃំ ឧទ្ទិស្ស… សិក្ខមានាយ សង្ឃំ ឧទ្ទិស្ស… សាមណេរេន សង្ឃំ ឧទ្ទិស្ស… សាមណេរិយា សង្ឃំ ឧទ្ទិស្ស … សម្ពហុលេ ភិក្ខូ ឧទ្ទិស្ស… ឯកំ ភិក្ខុំ ឧទ្ទិស្ស… ភិក្ខុនិសង្ឃំ ឧទ្ទិស្ស… សម្ពហុលា ភិក្ខុនិយោ ឧទ្ទិស្ស… ឯកំ ភិក្ខុនិំ ឧទ្ទិស្ស… សម្ពហុលា សិក្ខមានាយោ ឧទ្ទិស្ស… ឯកំ សិក្ខមានំ ឧទ្ទិស្ស… សម្ពហុលេ សាមណេរេ ឧទ្ទិស្ស… ឯកំ សាមណេរំ ឧទ្ទិស្ស… សម្ពហុលា សាមណេរិយោ ឧទ្ទិស្ស… ឯកំ សាមណេរិំ ឧទ្ទិស្ស… អត្តនោ អត្ថាយ វិហារោ ការាបិតោ ហោតិ…បេ.… អឌ្ឍយោគោ ការាបិតោ ហោតិ… បាសាទោ ការាបិតោ ហោតិ… ហម្មិយំ ការាបិតំ ហោតិ… គុហា ការាបិតា ហោតិ… បរិវេណំ ការាបិតំ ហោតិ … កោដ្ឋកោ ការាបិតោ ហោតិ… ឧបដ្ឋានសាលា ការាបិតា ហោតិ… អគ្គិសាលា ការាបិតា ហោតិ… កប្បិយកុដិ ការាបិតា ហោតិ… ចង្កមោ ការាបិតោ ហោតិ… ចង្កមនសាលា ការាបិតា ហោតិ… ឧទបានោ ការាបិតោ ហោតិ… ឧទបានសាលា ការាបិតា ហោតិ… បោក្ខរណី ការាបិតា ហោតិ… មណ្ឌបោ ការាបិតោ ហោតិ… អារាមោ ការាបិតោ ហោតិ… អារាមវត្ថុ ការាបិតំ ហោតិ។ សា ចេ ភិក្ខូនំ សន្តិកេ ទូតំ បហិណេយ្យ… ‘‘អាគច្ឆន្តុ អយ្យា, ឥច្ឆាមិ ទានញ្ច ទាតុំ, ធម្មញ្ច សោតុំ, ភិក្ខូ ច បស្សិតុ’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោតិ។

សត្តាហករណីយានុជានតា និដ្ឋិតា។

១១០. បញ្ចន្នំ អប្បហិតេបិ អនុជាននា

១៩៣. តេន ខោ បន សមយេន អញ្ញតរោ ភិក្ខុ គិលានោ ហោតិ។ សោ ភិក្ខូនំ សន្តិកេ ទូតំ បាហេសិ – ‘‘អហញ្ហិ គិលានោ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, បញ្ចន្នំ សត្តាហករណីយេន អប្បហិតេបិ គន្តុំ, បគេវ បហិតេ។ ភិក្ខុស្ស, ភិក្ខុនិយា, សិក្ខមានាយ, សាមណេរស្ស, សាមណេរិយា – អនុជានាមិ, ភិក្ខវេ, ឥមេសំ បញ្ចន្នំ សត្តាហករណីយេន អប្បហិតេបិ គន្តុំ, បគេវ បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុ គិលានោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘គិលានភត្តំ វា បរិយេសិស្សាមិ, គិលានុបដ្ឋាកភត្តំ វា បរិយេសិស្សាមិ, គិលានភេសជ្ជំ វា បរិយេសិស្សាមិ, បុច្ឆិស្សាមិ វា, ឧបដ្ឋហិស្សាមិ វា’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុស្ស អនភិរតិ ឧប្បន្នា ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អនភិរតិ មេ ឧប្បន្នា, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘អនភិរតំ វូបកាសេស្សាមិ វា, វូបកាសាបេស្សាមិ វា, ធម្មកថំ វាស្ស ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុស្ស កុក្កុច្ចំ ឧប្បន្នំ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘កុក្កុច្ចំ មេ ឧប្បន្នំ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘កុក្កុច្ចំ វិនោទេស្សាមិ វា, វិនោទាបេស្សាមិ វា, ធម្មកថំ វាស្ស ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុស្ស ទិដ្ឋិគតំ ឧប្បន្នំ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘ទិដ្ឋិគតំ មេ ឧប្បន្នំ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘ទិដ្ឋិគតំ វិវេចេស្សាមិ វា, វិវេចាបេស្សាមិ វា, ធម្មកថំ វាស្ស ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុ គរុធម្មំ អជ្ឈាបន្នោ ហោតិ បរិវាសារហោ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ គរុធម្មំ អជ្ឈាបន្នោ បរិវាសារហោ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘បរិវាសទានំ ឧស្សុក្កំ ករិស្សាមិ វា, អនុស្សាវេស្សាមិ វា, គណបូរកោ វា ភវិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុ មូលាយ បដិកស្សនារហោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ មូលាយ បដិកស្សនារហោ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘មូលាយ បដិកស្សនំ ឧស្សុក្កំ ករិស្សាមិ វា, អនុស្សាវេស្សាមិ វា, គណបូរកោ វា ភវិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុ មានត្តារហោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ មានត្តារហោ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘មានត្តទានំ ឧស្សុក្កំ ករិស្សាមិ វា, អនុស្សាវេស្សាមិ វា, គណបូរកោ វា ភវិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុ អព្ភានារហោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ អព្ភានារហោ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘អព្ភានំ ឧស្សុក្កំ ករិស្សាមិ វា, អនុស្សាវេស្សាមិ វា, គណបូរកោ វា ភវិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុស្ស សង្ឃោ កម្មំ កត្តុកាមោ ហោតិ តជ្ជនីយំ វា, និយស្សំ វា, បព្ពាជនីយំ វា, បដិសារណីយំ វា, ឧក្ខេបនីយំ វា។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘សង្ឃោ មេ កម្មំ កត្តុកាមោ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘កិន្តិ នុ ខោ សង្ឃោ កម្មំ ន ករេយ្យ, លហុកាយ វា បរិណាមេយ្យា’’តិ។ សត្តាហំ សន្និវត្តោ កាតព្ពោ។

កតំ វា បនស្ស ហោតិ សង្ឃេន កម្មំ តជ្ជនីយំ វា និយស្សំ វា បព្ពាជនីយំ វា បដិសារណីយំ វា ឧក្ខេបនីយំ វា។ សោ ចេ ភិក្ខូនំ សន្តិកេ ទូតំ បហិណេយ្យ ‘‘សង្ឃោ មេ កម្មំ អកាសិ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘កិន្តិ នុ ខោ សម្មា វត្តេយ្យ, លោមំ បាតេយ្យ, នេត្ថារំ វត្តេយ្យ, សង្ឃោ តំ កម្មំ បដិប្បស្សម្ភេយ្យា’’តិ។ សត្តាហំ សន្និវត្តោ កាតព្ពោ។

១៩៤. ឥធ បន, ភិក្ខវេ, ភិក្ខុនី គិលានា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ គិលានា, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘គិលានភត្តំ វា បរិយេសិស្សាមិ, គិលានុបដ្ឋាកភត្តំ វា បរិយេសិស្សាមិ, គិលានភេសជ្ជំ វា បរិយេសិស្សាមិ, បុច្ឆិស្សាមិ វា, ឧបដ្ឋហិស្សាមិ វា’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុនិយា អនភិរតិ ឧប្បន្នា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អនភិរតិ មេ ឧប្បន្នា, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘អនភិរតំ វូបកាសេស្សាមិ វា, វូបកាសាបេស្សាមិ វា, ធម្មកថំ វាស្សា ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុនិយា កុក្កុច្ចំ ឧប្បន្នំ ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘កុក្កុច្ចំ មេ ឧប្បន្នំ, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘កុក្កុច្ចំ វិនោទេស្សាមិ វា, វិនោទាបេស្សាមិ វា, ធម្មកថំ វាស្សា ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុនិយា ទិដ្ឋិគតំ ឧប្បន្នំ ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘ទិដ្ឋិគតំ មេ ឧប្បន្នំ, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘ទិដ្ឋិគតំ វិវេចេស្សាមិ វា, វិវេចាបេស្សាមិ វា, ធម្មកថំ វាស្សា ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុនី គរុធម្មំ អជ្ឈាបន្នា ហោតិ មានត្តារហា។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ គរុធម្មំ អជ្ឈាបន្នា មានត្តារហា , អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘មានត្តទានំ ឧស្សុក្កំ ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុនី មូលាយ បដិកស្សនារហា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ មូលាយ បដិកស្សនារហា, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘មូលាយ បដិកស្សនំ ឧស្សុក្កំ ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុនី អព្ភានារហា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ អព្ភានារហា, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ , ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘អព្ភានំ ឧស្សុក្កំ ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុនិយា សង្ឃោ កម្មំ កត្តុកាមោ ហោតិ – តជ្ជនីយំ វា, និយស្សំ វា, បព្ពាជនីយំ វា, បដិសារណីយំ វា, ឧក្ខេបនីយំ វា។ សា ចេ ភិក្ខូនំ សន្តិកេ ទូតំ បហិណេយ្យ – ‘‘សង្ឃោ មេ កម្មំ កត្តុកាមោ, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘កិន្តិ នុ ខោ សង្ឃោ កម្មំ ន ករេយ្យ, លហុកាយ វា បរិណាមេយ្យា’’តិ។ សត្តាហំ សន្និវត្តោ កាតព្ពោ។

កតំ វា បនស្សា ហោតិ សង្ឃេន កម្មំ – តជ្ជនីយំ វា , និយស្សំ វា, បព្ពាជនីយំ វា, បដិសារណីយំ វា, ឧក្ខេបនីយំ វា។ សា ចេ ភិក្ខូនំ សន្តិកេ ទូតំ បហិណេយ្យ – ‘‘សង្ឃោ មេ កម្មំ អកាសិ, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘កិន្តិ នុ ខោ សម្មា វត្តេយ្យ, លោមំ បាតេយ្យ, នេត្ថារំ វត្តេយ្យ, សង្ឃោ តំ កម្មំ បដិប្បស្សម្ភេយ្យា’’តិ។ សត្តាហំ សន្និវត្តោ កាតព្ពោ។

១៩៥. ឥធ បន, ភិក្ខវេ, សិក្ខមានា គិលានា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ គិលានា, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ – គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘គិលានភត្តំ វា បរិយេសិស្សាមិ, គិលានុបដ្ឋាកភត្តំ វា បរិយេសិស្សាមិ, គិលានភេសជ្ជំ វា បរិយេសិស្សាមិ, បុច្ឆិស្សាមិ វា, ឧបដ្ឋហិស្សាមិ វា’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, សិក្ខមានាយ អនភិរតិ ឧប្បន្នា ហោតិ…បេ.… សិក្ខមានាយ កុក្កុច្ចំ ឧប្បន្នំ ហោតិ… សិក្ខមានាយ ទិដ្ឋិគតំ ឧប្បន្នំ ហោតិ… សិក្ខមានាយ សិក្ខា កុបិតា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘សិក្ខា មេ កុបិតា, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘សិក្ខាសមាទានំ ឧស្សុក្កំ ករិស្សាមី’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, សិក្ខមានា ឧបសម្បជ្ជិតុកាមា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ ឧបសម្បជ្ជិតុកាមា, អាគច្ឆន្តុ អយ្យា , ឥច្ឆាមិ អយ្យានំ អាគត’’ន្តិ គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ឧបសម្បទំ ឧស្សុក្កំ ករិស្សាមិ វា, អនុស្សាវេស្សាមិ វា, គណបូរកោ វា ភវិស្សាមីតិ។ សត្តាហំ សន្និវត្តោ កាតព្ពោ។

១៩៦. ឥធ បន, ភិក្ខវេ, សាមណេរោ គិលានោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆន្តុ ភិក្ខូ , ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘គិលានភត្តំ វា បរិយេសិស្សាមិ, គិលានុបដ្ឋាកភត្តំ វា បរិយេសិស្សាមិ, គិលានភេសជ្ជំ វា បរិយេសិស្សាមិ, បុច្ឆិស្សាមិ វា, ឧបដ្ឋហិស្សាមិ វា’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, សាមណេរស្ស អនភិរតិ ឧប្បន្នា ហោតិ…បេ.… សាមណេរស្ស កុក្កុច្ចំ ឧប្បន្នំ ហោតិ… សាមណេរស្ស ទិដ្ឋិគតំ ឧប្បន្នំ ហោតិ… សាមណេរោ វស្សំ បុច្ឆិតុកាមោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ វស្សំ បុច្ឆិតុកាមោ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘បុច្ឆិស្សាមិ វា, អាចិក្ខិស្សាមិ វា’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, សាមណេរោ ឧបសម្បជ្ជិតុកាមោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ ឧបសម្បជ្ជិតុកាមោ, អាគច្ឆន្តុ ភិក្ខូ, ឥច្ឆាមិ ភិក្ខូនំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘ឧបសម្បទំ ឧស្សុក្កំ ករិស្សាមិ វា, អនុស្សាវេស្សាមិ វា, គណបូរកោ វា ភវិស្សាមី’’តិ។ សត្តាហំ សន្និវត្តោ កាតព្ពោ។

១៩៧. ឥធ បន, ភិក្ខវេ, សាមណេរី គិលានា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ គិលានា, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ , គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘គិលានភត្តំ វា បរិយេសិស្សាមិ, គិលានុបដ្ឋាកភត្តំ វា បរិយេសិស្សាមិ, គិលានភេសជ្ជំ វា បរិយេសិស្សាមិ, បុច្ឆិស្សាមិ វា, ឧបដ្ឋហិស្សាមិ វា’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, សាមណេរិយា អនភិរតិ ឧប្បន្នា ហោតិ…បេ.… សាមណេរិយា កុក្កុច្ចំ ឧប្បន្នំ ហោតិ… សាមណេរិយា ទិដ្ឋិគតំ ឧប្បន្នំ ហោតិ… សាមណេរី វស្សំ បុច្ឆិតុកាមា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ វស្សំ បុច្ឆិតុកាមា, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘បុច្ឆិស្សាមិ វា, អាចិក្ខិស្សាមិ វា’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, សាមណេរី សិក្ខំ សមាទិយិតុកាមា ហោតិ។ សា ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ សិក្ខំ សមាទិយិតុកាមា, អាគច្ឆន្តុ អយ្យា, ឥច្ឆាមិ អយ្យានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘សិក្ខាសមាទានំ ឧស្សុក្កំ ករិស្សាមី’’តិ។ សត្តាហំ សន្និវត្តោ កាតព្ពោតិ។

បញ្ចន្នំ អប្បហិតេបិ អនុជាននា និដ្ឋិតា។

១១១. សត្តន្នំ អប្បហិតេបិ អនុជាននា

១៩៨. តេន ខោ បន សមយេន អញ្ញតរស្ស ភិក្ខុនោ មាតា គិលានា ហោតិ។ សា បុត្តស្ស សន្តិកេ ទូតំ បាហេសិ – ‘‘អហញ្ហិ គិលានា, អាគច្ឆតុ មេ បុត្តោ, ឥច្ឆាមិ បុត្តស្ស អាគត’’ន្តិ។ អថ ខោ តស្ស ភិក្ខុនោ ឯតទហោសិ – ‘‘ភគវតា បញ្ញត្តំ សត្តន្នំ សត្តាហករណីយេន បហិតេ គន្តុំ, ន ត្វេវ អប្បហិតេ; បញ្ចន្នំ សត្តាហករណីយេន អប្បហិតេបិ គន្តុំ, បគេវ បហិតេតិ។ អយញ្ច មេ មាតា គិលានា, សា ច អនុបាសិកា, កថំ នុ ខោ មយា បដិបជ្ជិតព្ព’’ន្តិ? ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, សត្តន្នំ សត្តាហករណីយេន អប្បហិតេបិ គន្តុំ, បគេវ បហិតេ។ ភិក្ខុស្ស, ភិក្ខុនិយា, សិក្ខមានាយ, សាមណេរស្ស, សាមណេរិយា, មាតុយា ច បិតុស្ស ច – អនុជានាមិ, ភិក្ខវេ, ឥមេសំ សត្តន្នំ សត្តាហករណីយេន អប្បហិតេបិ គន្តុំ, បគេវ បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុស្ស មាតា គិលានា ហោតិ។ សា ចេ បុត្តស្ស សន្តិកេ ទូតំ បហិណេយ្យ – ‘‘អហញ្ហិ គិលានា, អាគច្ឆតុ មេ បុត្តោ, ឥច្ឆាមិ បុត្តស្ស អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘គិលានភត្តំ វា បរិយេសិស្សាមិ, គិលានុបដ្ឋាកភត្តំ វា បរិយេសិស្សាមិ, គិលានភេសជ្ជំ វា បរិយេសិស្សាមិ, បុច្ឆិស្សាមិ វា, ឧបដ្ឋហិស្សាមិ វា’’តិ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុស្ស បិតា គិលានោ ហោតិ។ សោ ចេ បុត្តស្ស សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆតុ មេ បុត្តោ, ឥច្ឆាមិ បុត្តស្ស អាគត’’ន្តិ, គន្តព្ពំ, ភិក្ខវេ, សត្តាហករណីយេន, អប្បហិតេបិ, បគេវ បហិតេ – ‘‘គិលានភត្តំ វា បរិយេសិស្សាមិ, គិលានុបដ្ឋាកភត្តំ វា បរិយេសិស្សាមិ, គិលានភេសជ្ជំ វា បរិយេសិស្សាមិ, បុច្ឆិស្សាមិ វា, ឧបដ្ឋហិស្សាមិ វា’’តិ។ សត្តាហំ សន្និវត្តោ កាតព្ពោ។

សត្តន្នំ អប្បហិតេបិ អនុជាននា និដ្ឋិតា។

១១២. បហិតេយេវ អនុជាននា

១៩៩ . ឥធ បន, ភិក្ខវេ, ភិក្ខុស្ស ភាតា គិលានោ ហោតិ។ សោ ចេ ភាតុនោ សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆតុ មេ ភាតា, ឥច្ឆាមិ ភាតុនោ អាគត’’ន្តិ, គន្តព្ពំ, ភិក្ខវេ , សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុស្ស ភគិនី គិលានា ហោតិ។ សា ចេ ភាតុនោ សន្តិកេ ទូតំ បហិណេយ្យ – ‘‘អហញ្ហិ គិលានា, អាគច្ឆតុ មេ ភាតា, ឥច្ឆាមិ ភាតុនោ អាគត’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុស្ស ញាតកោ គិលានោ ហោតិ។ សោ ចេ ភិក្ខុស្ស សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆតុ ភទន្តោ, ឥច្ឆាមិ ភទន្តស្ស អាគត’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

ឥធ បន, ភិក្ខវេ, ភិក្ខុគតិកោ គិលានោ ហោតិ។ សោ ចេ ភិក្ខូនំ សន្តិកេ ទូតំ បហិណេយ្យ – ‘‘អហញ្ហិ គិលានោ, អាគច្ឆន្តុ ភទន្តា, ឥច្ឆាមិ ភទន្តានំ អាគត’’ន្តិ, គន្តព្ពំ, ភិក្ខវេ, សត្តាហករណីយេន, បហិតេ, ន ត្វេវ អប្បហិតេ។ សត្តាហំ សន្និវត្តោ កាតព្ពោ។

តេន ខោ បន សមយេន សង្ឃស្ស វិហារោ ឧន្ទ្រិយតិ។ អញ្ញតរេន ឧបាសកេន អរញ្ញេ ភណ្ឌំ ឆេទាបិតំ ហោតិ។ សោ ភិក្ខូនំ សន្តិកេ ទូតំ បាហេសិ – ‘‘សចេ ភទន្តា តំ ភណ្ឌំ អាវហាបេយ្យុំ, ទជ្ជាហំ តំ ភណ្ឌ’’ន្តិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, សង្ឃករណីយេន គន្តុំ។ សត្តាហំ សន្និវត្តោ កាតព្ពោតិ។

បហិតេយេវ អនុជាននា និដ្ឋិតា។

វស្សាវាសភាណវារោ និដ្ឋិតោ។

១១៣. អន្តរាយេ អនាបត្តិវស្សច្ឆេទវារោ

២០០. តេន ខោ បន សមយេន កោសលេសុ ជនបទេ អញ្ញតរស្មិំ អាវាសេ វស្សូបគតា ភិក្ខូ វាឡេហិ ឧព្ពាឡ្ហា ហោន្តិ។ គណ្ហិំសុបិ បរិបាតិំសុបិ។ ភគវតោ ឯតមត្ថំ អារោចេសុំ។

ឥធ បន, ភិក្ខវេ, វស្សូបគតា ភិក្ខូ វាឡេហិ ឧព្ពាឡ្ហា ហោន្តិ។ គណ្ហន្តិបិ បរិបាតេន្តិបិ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតា ភិក្ខូ សរីសបេហិ ឧព្ពាឡ្ហា ហោន្តិ។ ឌំសន្តិបិ បរិបាតេន្តិបិ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស ។

ឥធ បន, ភិក្ខវេ, វស្សូបគតា ភិក្ខូ ចោរេហិ ឧព្ពាឡ្ហា ហោន្តិ។ វិលុម្បន្តិបិ អាកោដេន្តិបិ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតា ភិក្ខូ បិសាចេហិ ឧព្ពាឡ្ហា ហោន្តិ។ អាវិសន្តិបិ ហនន្តិបិ ឱជម្បិ ហរន្តិ (សី.), ហរន្តិបិ (ស្យា.)។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតានំ ភិក្ខូនំ គាមោ អគ្គិនា ទឌ្ឍោ ហោតិ។ ភិក្ខូ បិណ្ឌកេន កិលមន្តិ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតានំ ភិក្ខូនំ សេនាសនំ អគ្គិនា ទឌ្ឍំ ហោតិ។ ភិក្ខូ សេនាសនេន កិលមន្តិ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតានំ ភិក្ខូនំ គាមោ ឧទកេន វូឡ្ហោ ហោតិ។ ភិក្ខូ បិណ្ឌកេន កិលមន្តិ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតានំ ភិក្ខូនំ សេនាសនំ ឧទកេន វូឡ្ហំ ហោតិ។ ភិក្ខូ សេនាសនេន កិលមន្តិ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្សាតិ។

២០១. តេន ខោ បន សមយេន អញ្ញតរស្មិំ អាវាសេ វស្សូបគតានំ ភិក្ខូនំ គាមោ ចោរេហិ វុដ្ឋាសិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, យេន គាមោ តេន គន្តុន្តិ។

គាមោ ទ្វេធា ភិជ្ជិត្ថ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, យេន ពហុតរា តេន គន្តុន្តិ។

ពហុតរា អស្សទ្ធា ហោន្តិ អប្បសន្នា។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, យេន សទ្ធា បសន្នា តេន គន្តុន្តិ។

តេន ខោ បន សមយេន កោសលេសុ ជនបទេ អញ្ញតរស្មិំ អាវាសេ វស្សូបគតា ភិក្ខូ ន លភិំសុ លូខស្ស វា បណីតស្ស វា ភោជនស្ស យាវទត្ថំ បារិបូរិំ។ ភគវតោ ឯតមត្ថំ អារោចេសុំ។

ឥធ បន, ភិក្ខវេ, វស្សូបគតា ភិក្ខូ ន លភន្តិ លូខស្ស វា បណីតស្ស វា ភោជនស្ស យាវទត្ថំ បារិបូរិំ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតា ភិក្ខូ លភន្តិ លូខស្ស វា បណីតស្ស វា ភោជនស្ស យាវទត្ថំ បារិបូរិំ, ន លភន្តិ សប្បាយានិ ភោជនានិ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតា ភិក្ខូ លភន្តិ លូខស្ស វា បណីតស្ស វា ភោជនស្ស យាវទត្ថំ បារិបូរិំ, លភន្តិ សប្បាយានិ ភោជនានិ , ន លភន្តិ សប្បាយានិ ភេសជ្ជានិ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតា ភិក្ខូ លភន្តិ លូខស្ស វា បណីតស្ស វា ភោជនស្ស យាវទត្ថំ បារិបូរិំ, លភន្តិ សប្បាយានិ ភោជនានិ, លភន្តិ សប្បាយានិ ភេសជ្ជានិ, ន លភន្តិ បតិរូបំ ឧបដ្ឋាកំ។ ឯសេវ អន្តរាយោតិ បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតំ ភិក្ខុំ ឥត្ថី និមន្តេតិ – ‘‘ឯហិ, ភន្តេ, ហិរញ្ញំ វា តេ ទេមិ, សុវណ្ណំ វា តេ ទេមិ, ខេត្តំ វា តេ ទេមិ, វត្ថុំ វា តេ ទេមិ, គាវុំ វា តេ ទេមិ, គាវិំ វា តេ ទេមិ, ទាសំ វា តេ ទេមិ, ទាសិំ វា តេ ទេមិ, ធីតរំ វា តេ ទេមិ ភរិយត្ថាយ, អហំ វា តេ ភរិយា ហោមិ, អញ្ញំ វា តេ ភរិយំ អានេមី’’តិ។ តត្រ ចេ ភិក្ខុនោ ឯវំ ហោតិ, ‘លហុបរិវត្តំ ខោ ចិត្តំ វុត្តំ ភគវតា, សិយាបិ មេ ព្រហ្មចរិយស្ស អន្តរាយោ’តិ, បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតំ ភិក្ខុំ វេសី និមន្តេតិ…បេ.… ថុល្លកុមារី និមន្តេតិ… បណ្ឌកោ និមន្តេតិ… ញាតកា និមន្តេន្តិ… រាជានោ និមន្តេន្តិ… ចោរា និមន្តេន្តិ… ធុត្តា និមន្តេន្តិ – ‘‘ឯហិ, ភន្តេ, ហិរញ្ញំ វា តេ ទេម, សុវណ្ណំ វា តេ ទេម, ខេត្តំ វា តេ ទេម, វត្ថុំ វា តេ ទេម , គាវុំ វា តេ ទេម, គាវិំ វា តេ ទេម, ទាសំ វា តេ ទេម, ទាសិំ វា តេ ទេម, ធីតរំ វា តេ ទេម ភរិយត្ថាយ, អញ្ញំ វា តេ ភរិយំ អានេមា’’តិ។ តត្រ ចេ ភិក្ខុនោ ឯវំ ហោតិ, ‘លហុបរិវត្តំ ខោ ចិត្តំ វុត្តំ ភគវតា, សិយាបិ មេ ព្រហ្មចរិយស្ស អន្តរាយោ’តិ, បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតោ ភិក្ខុ អស្សាមិកំ និធិំ បស្សតិ។ តត្រ ចេ ភិក្ខុនោ ឯវំ ហោតិ, ‘លហុបរិវត្តំ ខោ ចិត្តំ វុត្តំ ភគវតា, សិយាបិ មេ ព្រហ្មចរិយស្ស អន្តរាយោ’តិ, បក្កមិតព្ពំ។ អនាបត្តិ វស្សច្ឆេទស្ស។

អន្តរាយេ អនាបត្តិវស្សច្ឆេទវារោ និដ្ឋិតោ។

១១៤. សង្ឃភេទេ អនាបត្តិវស្សច្ឆេទវារោ

២០២. ឥធ បន, ភិក្ខវេ, វស្សូបគតោ ភិក្ខុ បស្សតិ សម្ពហុលេ ភិក្ខូ សង្ឃភេទាយ បរក្កមន្តេ។ តត្រ ចេ ភិក្ខុនោ ឯវំ ហោតិ, ‘គរុកោ ខោ សង្ឃភេទោ វុត្តោ ភគវតា; មា មយិ សម្មុខីភូតេ សង្ឃោ ភិជ្ជី’តិ, បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតោ ភិក្ខុ សុណាតិ – ‘‘អសុកស្មិំ កិរ អាវាសេ សម្ពហុលា ភិក្ខូ សង្ឃភេទាយ បរក្កមន្តី’’តិ។ តត្រ ចេ ភិក្ខុនោ ឯវំ ហោតិ, ‘គរុកោ ខោ សង្ឃភេទោ វុត្តោ ភគវតា; មា មយិ សម្មុខីភូតេ សង្ឃោ ភិជ្ជី’តិ, បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតោ ភិក្ខុ សុណាតិ – ‘‘អសុកស្មិំ កិរ អាវាសេ សម្ពហុលា ភិក្ខូ សង្ឃភេទាយ បរក្កមន្តី’’តិ។ តត្រ ចេ ភិក្ខុនោ ឯវំ ហោតិ – ‘‘តេ ខោ មេ ភិក្ខូ មិត្តា។ ត្យាហំ វក្ខាមិ ‘គរុកោ ខោ, អាវុសោ, សង្ឃភេទោ វុត្តោ ភគវតា; មាយស្មន្តានំ សង្ឃភេទោ រុច្ចិត្ថា’តិ។ ករិស្សន្តិ មេ វចនំ, សុស្សូសិស្សន្តិ, សោតំ ឱទហិស្សន្តី’’តិ, បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតោ ភិក្ខុ សុណាតិ – ‘‘អសុកស្មិំ កិរ អាវាសេ សម្ពហុលា ភិក្ខូ សង្ឃភេទាយ បរក្កមន្តី’’តិ។ តត្រ ចេ ភិក្ខុនោ ឯវំ ហោតិ – ‘‘តេ ខោ មេ ភិក្ខូ ន មិត្តា; អបិ ច យេ តេសំ មិត្តា, តេ មេ មិត្តា។ ត្យាហំ វក្ខាមិ។ តេ វុត្តា តេ វក្ខន្តិ ‘គរុកោ ខោ, អាវុសោ, សង្ឃភេទោ វុត្តោ ភគវតា; មាយស្មន្តានំ សង្ឃភេទោ រុច្ចិត្ថា’តិ។ ករិស្សន្តិ តេសំ វចនំ, សុស្សូសិស្សន្តិ, សោតំ ឱទហិស្សន្តី’’តិ, បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតោ ភិក្ខុ សុណាតិ – ‘‘អសុកស្មិំ កិរ អាវាសេ សម្ពហុលេហិ ភិក្ខូហិ សង្ឃោ ភិន្នោ’’តិ។ តត្រ ចេ ភិក្ខុនោ ឯវំ ហោតិ – ‘‘តេ ខោ មេ ភិក្ខូ មិត្តា។ ត្យាហំ វក្ខាមិ ‘គរុកោ ខោ, អាវុសោ, សង្ឃភេទោ វុត្តោ ភគវតា; មាយស្មន្តានំ សង្ឃភេទោ រុច្ចិត្ថា’តិ។ ករិស្សន្តិ មេ វចនំ, សុស្សូសិស្សន្តិ, សោតំ ឱទហិស្សន្តី’’តិ, បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតោ ភិក្ខុ សុណាតិ – ‘‘អសុកស្មិំ កិរ អាវាសេ សម្ពហុលេហិ ភិក្ខូហិ សង្ឃោ ភិន្នោ’’តិ។ តត្រ ចេ ភិក្ខុនោ ឯវំ ហោតិ – ‘‘តេ ខោ មេ ភិក្ខូ ន មិត្តា; អបិ ច, យេ តេសំ មិត្តា តេ មេ មិត្តា។ ត្យាហំ វក្ខាមិ។ តេ វុត្តា តេ វក្ខន្តិ ‘គរុកោ ខោ, អាវុសោ, សង្ឃភេទោ វុត្តោ ភគវតា; មាយស្មន្តានំ សង្ឃភេទោ រុច្ចិត្ថា’តិ។ ករិស្សន្តិ តេសំ វចនំ, សុស្សូសិស្សន្តិ , សោតំ ឱទហិស្សន្តី’’តិ, បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតោ ភិក្ខុ សុណាតិ – ‘‘អមុកស្មិំ កិរ អាវាសេ សម្ពហុលា ភិក្ខុនិយោ សង្ឃភេទាយ បរក្កមន្តី’’តិ។ តត្រ ចេ ភិក្ខុនោ ឯវំ ហោតិ – ‘‘តា ខោ មេ ភិក្ខុនិយោ មិត្តា។ តាហំ វក្ខាមិ ‘គរុកោ ខោ, ភគិនិយោ, សង្ឃភេទោ វុត្តោ ភគវតា; មា ភគិនីនំ សង្ឃភេទោ រុច្ចិត្ថា’តិ។ ករិស្សន្តិ មេ វចនំ, សុស្សូសិស្សន្តិ, សោតំ ឱទហិស្សន្តី’’តិ, បក្កមិតព្ពំ។ អនាបត្តិ វស្សច្ឆេទស្ស។

ឥធ បន, ភិក្ខវេ, វស្សូបគតោ ភិក្ខុ សុណាតិ – ‘‘អមុកស្មិំ កិរ អាវាសេ សម្ពហុលា ភិក្ខុនិយោ សង្ឃភេទាយ បរក្កមន្តី’’តិ។ តត្រ ចេ ភិក្ខុនោ ឯវំ ហោតិ – ‘‘តា ខោ មេ ភិក្ខុនិយោ ន មិត្តា។ អបិ ច, យា តាសំ មិត្តា, តា មេ មិត្តា។ តាហំ វក្ខាមិ។ តា វុត្តា តា វក្ខន្តិ ‘គរុកោ ខោ, ភគិនិយោ, សង្ឃភេទោ វុត្តោ ភគវតា។ មា ភគិនីនំ សង្ឃភេទោ រុច្ចិត្ថា’តិ។ ករិស្សន្តិ តាសំ វចនំ, សុស្សូសិស្សន្តិ, សោតំ ឱទហិស្សន្តី’’តិ, បក្កមិតព្ពំ។ អនាបត្តិ វស្សច្ឆេទស្សតិ។

ឥធ បន, ភិក្ខវេ, វស្សូបគតោ ភិក្ខុ សុណាតិ – ‘‘អមុកស្មិំ កិរ អាវាសេ សម្ពហុលាហិ ភិក្ខុនីហិ សង្ឃោ ភិន្នោ’’តិ។ តត្រ ចេ ភិក្ខុនោ ឯវំ ហោតិ – ‘‘តា ខោ មេ ភិក្ខុនិយោ មិត្តា។ តាហំ វក្ខាមិ ‘គរុកោ ខោ, ភគិនិយោ, សង្ឃភេទោ វុត្តោ ភគវតា។ មា ភគិនីនំ សង្ឃភេទោ រុច្ចិត្ថា’តិ។ ករិស្សន្តិ មេ វចនំ, សុស្សូសិស្សន្តិ, សោតំ ឱទហិស្សន្តី’’តិ, បក្កមិតព្ពំ។ អនាបត្តិ វស្សច្ឆេទស្សតិ។

ឥធ បន, ភិក្ខវេ, វស្សូបគតោ ភិក្ខុ សុណាតិ – ‘‘អមុកស្មិំ កិរ អាវាសេ សម្ពហុលាហិ ភិក្ខុនីហិ សង្ឃោ ភិន្នោ’’តិ។ តត្រ ចេ ភិក្ខុនោ ឯវំ ហោតិ – ‘‘តា ខោ មេ ភិក្ខុនិយោ ន មិត្តា។ អបិ ច, យា តាសំ មិត្តា តា មេ មិត្តា។ តាហំ វក្ខាមិ។ តា វុត្តា តា វក្ខន្តិ ‘គរុកោ ខោ, ភគិនិយោ អយ្យាយោ (សី.), សង្ឃភេទោ វុត្តោ ភគវតា; មា ភគិនីនំ អយ្យានំ (សី.) សង្ឃភេទោ រុច្ចិត្ថា’តិ។ ករិស្សន្តិ តាសំ វចនំ, សុស្សូសិស្សន្តិ, សោតំ ឱទហិស្សន្តី’’តិ, បក្កមិតព្ពំ។ អនាបត្តិ វស្សច្ឆេទស្សាតិ។

សង្ឃភេទេ អនាបត្តិវស្សច្ឆេទវារោ និដ្ឋិតោ។

១១៥. វជាទីសុ វស្សូបគមនំ

២០៣. តេន ខោ បន សមយេន អញ្ញតរោ ភិក្ខុ វជេ វស្សំ ឧបគន្តុកាមោ ហោតិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, វជេ វស្សំ ឧបគន្តុន្តិ។ វជោ វុដ្ឋាសិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, យេន វជោ តេន គន្តុន្តិ។

តេន ខោ បន សមយេន អញ្ញតរោ ភិក្ខុ ឧបកដ្ឋាយ វស្សូបនាយិកាយ សត្ថេន គន្តុកាមោ ហោតិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, សត្ថេ វស្សំ ឧបគន្តុន្តិ។

តេន ខោ បន សមយេន អញ្ញតរោ ភិក្ខុ ឧបកដ្ឋាយ វស្សូបនាយិកាយ នាវាយ គន្តុកាមោ ហោតិ។ ភគវតោ ឯតមត្ថំ អារោចេសុំ។ អនុជានាមិ, ភិក្ខវេ, នាវាយ វស្សំ ឧបគន្តុន្តិ។

វជាទីសុ វស្សូបគមនំ និដ្ឋិតំ។

១១៦. វស្សំ អនុបគន្តព្ពដ្ឋានានិ

២០៤. តេន ខោ បន សមយេន ភិក្ខូ រុក្ខសុសិរេ វស្សំ ឧបគច្ឆន្តិ។ មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘សេយ្យថាបិ បិសាចិល្លិកា’’តិ។ ភគវតោ ឯតមត្ថំ អារោចេសុំ។ ន, ភិក្ខវេ, រុក្ខសុសិរេ វស្សំ ឧបគន្តព្ពំ។ យោ ឧបគច្ឆេយ្យ, អាបត្តិ ទុក្កដស្សាតិ។

តេន ខោ បន សមយេន ភិក្ខូ រុក្ខវិដភិយា វស្សំ ឧបគច្ឆន្តិ។ មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘សេយ្យថាបិ មិគលុទ្ទកា’’តិ។ ភគវតោ ឯតមត្ថំ អារោចេសុំ។ ន, ភិក្ខវេ, រុក្ខវិដភិយា វស្សំ ឧបគន្តព្ពំ។ យោ ឧបគច្ឆេយ្យ, អាបត្តិ ទុក្កដស្សាតិ។

តេន ខោ បន សមយេន ភិក្ខូ អជ្ឈោកាសេ វស្សំ ឧបគច្ឆន្តិ។ ទេវេ វស្សន្តេ រុក្ខមូលម្បិ និព្ពកោសម្បិ ឧបធាវន្តិ។ ភគវតោ ឯតមត្ថំ អារោចេសុំ។ ន, ភិក្ខវេ, អជ្ឈោកាសេ វស្សំ ឧបគន្តព្ពំ។ យោ ឧបគច្ឆេយ្យ, អាបត្តិ ទុក្កដស្សាតិ។

តេន ខោ បន សមយេន ភិក្ខូ អសេនាសនិកា វស្សំ ឧបគច្ឆន្តិ។ សីតេនបិ កិលមន្តិ, ឧណ្ហេនបិ កិលមន្តិ។ ភគវតោ ឯតមត្ថំ អារោចេសុំ។ ន, ភិក្ខវេ, អសេនាសនិកេន វស្សំ ឧបគន្តព្ពំ។ យោ ឧបគច្ឆេយ្យ, អាបត្តិ ទុក្កដស្សាតិ។

តេន ខោ បន សមយេន ភិក្ខូ ឆវកុដិកាយ វស្សំ ឧបគច្ឆន្តិ។ មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘សេយ្យថាបិ ឆវឌាហកា’’តិ។ ភគវតោ ឯតមត្ថំ អារោចេសុំ។ ន, ភិក្ខវេ, ឆវកុដិកាយ វស្សំ ឧបគន្តព្ពំ។ យោ ឧបគច្ឆេយ្យ, អាបត្តិ ទុក្កដស្សាតិ។

តេន ខោ បន សមយេន ភិក្ខូ ឆត្តេ វស្សំ ឧបគច្ឆន្តិ។ មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘សេយ្យថាបិ គោបាលកា’’តិ។ ភគវតោ ឯតមត្ថំ អារោចេសុំ។ ន, ភិក្ខវេ, ឆត្តេ វស្សំ ឧបគន្តព្ពំ។ យោ ឧបគច្ឆេយ្យ, អាបត្តិ ទុក្កដស្សាតិ។

តេន ខោ បន សមយេន ភិក្ខូ ចាដិយា វស្សំ ឧបគច្ឆន្តិ។ មនុស្សា ឧជ្ឈាយន្តិ ខិយ្យន្តិ វិបាចេន្តិ – ‘‘សេយ្យថាបិ តិត្ថិយា’’តិ។ ភគវតោ ឯតមត្ថំ អារោចេសុំ។ ន, ភិក្ខវេ, ចាដិយា វស្សំ ឧបគន្តព្ពំ។ យោ ឧបគច្ឆេយ្យ, អាបត្តិ ទុក្កដស្សាតិ។

វស្សំ អនុបគន្តព្ពដ្ឋានានិ និដ្ឋិតា។

១១៧. អធម្មិកកតិកា

២០៥. តេន ខោ បន សមយេន សាវត្ថិយា សង្ឃេន ឯវរូបា កតិកា កតា ហោតិ – អន្តរាវស្សំ ន បព្ពាជេតព្ពន្តិ។ វិសាខាយ មិគារមាតុយា នត្តា ភិក្ខូ ឧបសង្កមិត្វា បព្ពជ្ជំ យាចិ។ ភិក្ខូ ឯវមាហំសុ – ‘‘សង្ឃេន ខោ, អាវុសោ, ឯវរូបា កតិកា កតា ‘អន្តរាវស្សំ ន បព្ពាជេតព្ព’ន្តិ។ អាគមេហិ, អាវុសោ, យាវ ភិក្ខូ វស្សំ វសន្តិ។ វស្សំវុដ្ឋា បព្ពាជេស្សន្តី’’តិ។ អថ ខោ តេ ភិក្ខូ វស្សំវុដ្ឋា វិសាខាយ មិគារមាតុយា នត្តារំ ឯតទវោចុំ – ‘‘ឯហិ, ទានិ, អាវុសោ, បព្ពជាហី’’តិ។ សោ ឯវមាហ – ‘‘សចាហំ, ភន្តេ, បព្ពជិតោ អស្សំ, អភិរមេយ្យាមហំ អភិរមេយ្យំ ចាហំ (សី.)។ ន ទានាហំ, ភន្តេ, បព្ពជិស្សាមី’’តិ។ វិសាខា មិគារមាតា ឧជ្ឈាយតិ ខិយ្យតិ វិបាចេតិ – ‘‘កថញ្ហិ នាម អយ្យា ឯវរូបំ កតិកំ ករិស្សន្តិ ‘ន អន្តរាវស្សំ បព្ពាជេតព្ព’ន្តិ។ កំ កាលំ ធម្មោ ន ចរិតព្ពោ’’តិ? អស្សោសុំ ខោ ភិក្ខូ វិសាខាយ មិគារមាតុយា ឧជ្ឈាយន្តិយា ខិយ្យន្តិយា វិបាចេន្តិយា។ អថ ខោ តេ ភិក្ខូ ភគវតោ ឯតមត្ថំ អារោចេសុំ។ ន, ភិក្ខវេ, ឯវរូបា កតិកា កាតព្ពា – ‘ន អន្តរាវស្សំ បព្ពាជេតព្ព’ន្តិ។ យោ ករេយ្យ, អាបត្តិ ទុក្កដស្សាតិ។

អធម្មិកកតិកា និដ្ឋិតា។

១១៨. បដិស្សវទុក្កដាបត្តិ

២០៦. តេន ខោ បន សមយេន អាយស្មតា ឧបនន្ទេន សក្យបុត្តេន រញ្ញោ បសេនទិស្ស កោសលស្ស វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គច្ឆន្តោ អទ្ទស អន្តរាមគ្គេ ទ្វេ អាវាសេ ពហុចីវរកេ។ តស្ស ឯតទហោសិ – ‘‘យំនូនាហំ ឥមេសុ ទ្វីសុ អាវាសេសុ វស្សំ វសេយ្យំ។ ឯវំ មេ ពហុំ ចីវរំ ពហុចីវរំ (ក.) ឧប្បជ្ជិស្សតី’’តិ។ សោ តេសុ ទ្វីសុ អាវាសេសុ វស្សំ វសិ។ រាជា បសេនទិ កោសលោ ឧជ្ឈាយតិ ខិយ្យតិ វិបាចេតិ – ‘‘កថញ្ហិ នាម អយ្យោ ឧបនន្ទោ សក្យបុត្តោ អម្ហាកំ វស្សាវាសំ បដិស្សុណិត្វា វិសំវាទេស្សតិ។ ននុ ភគវតា អនេកបរិយាយេន មុសាវាទោ គរហិតោ, មុសាវាទា វេរមណី បសត្ថា’’តិ។ អស្សោសុំ ខោ ភិក្ខូ រញ្ញោ បសេនទិស្ស កោសលស្ស ឧជ្ឈាយន្តស្ស ខិយ្យន្តស្ស វិបាចេន្តស្ស។ យេ តេ ភិក្ខូ អប្បិច្ឆា…បេ.… តេ ឧជ្ឈាយន្តិ ខិយ្យន្តិ វិបាចេន្តិ – ‘‘កថញ្ហិ នាម អាយស្មា ឧបនន្ទោ សក្យបុត្តោ រញ្ញោ បសេនទិស្ស កោសលស្ស វស្សាវាសំ បដិស្សុណិត្វា វិសំវាទេស្សតិ។ ននុ ភគវតា អនេកបរិយាយេន មុសាវាទោ គរហិតោ, មុសាវាទា វេរមណី បសត្ថា’’តិ។ អថ ខោ តេ ភិក្ខូ ភគវតោ ឯតមត្ថំ អារោចេសុំ…បេ.… អថ ខោ ភគវា ឯតស្មិំ និទានេ ឯតស្មិំ បករណេ ភិក្ខុសង្ឃំ សន្និបាតាបេត្វា អាយស្មន្តំ ឧបនន្ទំ សក្យបុត្តំ បដិបុច្ឆិ – ‘‘សច្ចំ កិរ ត្វំ, ឧបនន្ទ, រញ្ញោ បសេនទិស្ស កោសលស្ស វស្សាវាសំ បដិស្សុណិត្វា វិសំវាទេសី’’តិ? ‘‘សច្ចំ, ភគវា’’តិ។ វិគរហិ ពុទ្ធោ ភគវា…បេ.… កថញ្ហិ នាម ត្វំ, មោឃបុរិស, រញ្ញោ បសេនទិស្ស កោសលស្ស វស្សាវាសំ បដិស្សុណិត្វា វិសំវាទេស្សសិ។ ននុ មយា, មោឃបុរិស, អនេកបរិយាយេន មុសាវាទោ គរហិតោ, មុសាវាទា វេរមណី បសត្ថា។ នេតំ, មោឃបុរិស, អប្បសន្នានំ វា បសាទាយ…បេ.… វិគរហិត្វា…បេ.… ធម្មិំ កថំ កត្វា ភិក្ខូ អាមន្តេសិ –

២០៧. ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គច្ឆន្តោ បស្សតិ អន្តរាមគ្គេ ទ្វេ អាវាសេ ពហុចីវរកេ។ តស្ស ឯវំ ហោតិ – ‘‘យំនូនាហំ ឥមេសុ ទ្វីសុ អាវាសេសុ វស្សំ វសេយ្យំ។ ឯវំ មេ ពហុំ ចីវរំ ឧប្បជ្ជិស្សតី’’តិ។ សោ តេសុ ទ្វីសុ អាវាសេសុ វស្សំ វសតិ។ តស្ស, ភិក្ខវេ, ភិក្ខុនោ បុរិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ បាដិបទេន (ក.) វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ តទហេវ អករណីយោ បក្កមតិ។ តស្ស, ភិក្ខវេ, ភិក្ខុនោ បុរិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ តទហេវ សករណីយោ បក្កមតិ។ តស្ស , ភិក្ខវេ, ភិក្ខុនោ បុរិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ ទ្វីហតីហំ វសិត្វា អករណីយោ បក្កមតិ។ តស្ស, ភិក្ខវេ, ភិក្ខុនោ បុរិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ ទ្វីហតីហំ វសិត្វា សករណីយោ បក្កមតិ។ តស្ស, ភិក្ខវេ, ភិក្ខុនោ បុរិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ ទ្វីហតីហំ វសិត្វា សត្តាហករណីយេន បក្កមតិ។ សោ តំ សត្តាហំ ពហិទ្ធា វីតិនាមេតិ។ តស្ស, ភិក្ខវេ, ភិក្ខុនោ បុរិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ ទ្វីហតីហំ វសិត្វា សត្តាហករណីយេន បក្កមតិ ។ សោ តំ សត្តាហំ អន្តោ សន្និវត្តំ ករោតិ។ តស្ស, ភិក្ខវេ, ភិក្ខុនោ បុរិមិកា ច បញ្ញាយតិ, បដិស្សវេ ច អនាបត្តិ។

ឥធ បន, ភិក្ខវេ , ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ , បរិវេណំ សម្មជ្ជតិ។ សោ សត្តាហំ អនាគតាយ បវារណាយ សករណីយោ បក្កមតិ។ អាគច្ឆេយ្យ វា សោ, ភិក្ខវេ, ភិក្ខុ តំ អាវាសំ ន វា អាគច្ឆេយ្យ, តស្ស, ភិក្ខវេ, ភិក្ខុនោ បុរិមិកា ច បញ្ញាយតិ, បដិស្សវេ ច អនាបត្តិ។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គន្ត្វា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ តទហេវ អករណីយោ បក្កមតិ។ តស្ស, ភិក្ខវេ, ភិក្ខុនោ បុរិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បុរិមិកាយ។ សោ តំ អាវាសំ គន្ត្វា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ តទហេវ សករណីយោ បក្កមតិ…បេ.… សោ ទ្វីហតីហំ វសិត្វា អករណីយោ បក្កមតិ…បេ.… សោ ទ្វីហតីហំ វសិត្វា សករណីយោ បក្កមតិ…បេ.… សោ ទ្វីហតីហំ វសិត្វា សត្តាហករណីយេន បក្កមតិ។ សោ តំ សត្តាហំ ពហិទ្ធា វីតិនាមេតិ។ តស្ស, ភិក្ខវេ, ភិក្ខុនោ បុរិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស…បេ.… សោ ទ្វីហតីហំ វសិត្វា សត្តាហករណីយេន បក្កមតិ។ សោ តំ សត្តាហំ អន្តោ សន្និវត្តំ ករោតិ។ តស្ស, ភិក្ខវេ, ភិក្ខុនោ បុរិមិកា ច បញ្ញាយតិ, បដិស្សវេ ច អនាបត្តិ…បេ.… សោ សត្តាហំ អនាគតាយ បវារណាយ សករណីយោ បក្កមតិ។ អាគច្ឆេយ្យ វា សោ, ភិក្ខវេ, ភិក្ខុ តំ អាវាសំ ន វា អាគច្ឆេយ្យ, តស្ស, ភិក្ខវេ, ភិក្ខុនោ បុរិមិកា ច បញ្ញាយតិ, បដិស្សវេ ច អនាបត្តិ។

២០៨. ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ តទហេវ អករណីយោ បក្កមតិ។ តស្ស, ភិក្ខវេ, ភិក្ខុនោ បច្ឆិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ តទហេវ សករណីយោ បក្កមតិ។ តស្ស, ភិក្ខវេ, ភិក្ខុនោ បច្ឆិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ ទ្វីហតីហំ វសិត្វា អករណីយោ បក្កមតិ ។ តស្ស, ភិក្ខវេ, ភិក្ខុនោ បច្ឆិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ ទ្វីហតីហំ វសិត្វា សករណីយោ បក្កមតិ។ តស្ស, ភិក្ខវេ, ភិក្ខុនោ បច្ឆិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ ទ្វីហតីហំ វសិត្វា សត្តាហករណីយេន បក្កមតិ។ សោ តំ សត្តាហំ ពហិទ្ធា វីតិនាមេតិ។ តស្ស, ភិក្ខវេ, ភិក្ខុនោ បច្ឆិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ ទ្វីហតីហំ វសិត្វា សត្តាហករណីយេន បក្កមតិ។ សោ តំ សត្តាហំ អន្តោ សន្និវត្តំ ករោតិ។ តស្ស, ភិក្ខវេ, ភិក្ខុនោ បច្ឆិមិកា ច បញ្ញាយតិ, បដិស្សវេ ច អនាបត្តិ។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គច្ឆន្តោ ពហិទ្ធា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ សត្តាហំ អនាគតាយ កោមុទិយា ចាតុមាសិនិយា សករណីយោ បក្កមតិ។ អាគច្ឆេយ្យ វា សោ, ភិក្ខវេ, ភិក្ខុ តំ អាវាសំ ន វា អាគច្ឆេយ្យ, តស្ស, ភិក្ខវេ, ភិក្ខុនោ បច្ឆិមិកា ច បញ្ញាយតិ, បដិស្សវេ ច អនាបត្តិ។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គន្ត្វា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ តទហេវ អករណីយោ បក្កមតិ។ តស្ស, ភិក្ខវេ, ភិក្ខុនោ បច្ឆិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គន្ត្វា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ តទហេវ សករណីយោ បក្កមតិ…បេ.… សោ ទ្វីហតីហំ វសិត្វា អករណីយោ បក្កមតិ …បេ.… សោ ទ្វីហតីហំ វសិត្វា សករណីយោ បក្កមតិ…បេ.… សោ ទ្វីហតីហំ វសិត្វា សត្តាហករណីយេន បក្កមតិ។ សោ តំ សត្តាហំ ពហិទ្ធា វីតិនាមេតិ។ តស្ស, ភិក្ខវេ, ភិក្ខុនោ បច្ឆិមិកា ច ន បញ្ញាយតិ, បដិស្សវេ ច អាបត្តិ ទុក្កដស្ស…បេ.… សោ ទ្វីហតីហំ វសិត្វា សត្តាហករណីយេន បក្កមតិ។ សោ តំ សត្តាហំ អន្តោ សន្និវត្តំ ករោតិ។ តស្ស ភិក្ខវេ, ភិក្ខុនោ បច្ឆិមិកា ច បញ្ញាយតិ, បដិស្សវេ ច អនាបត្តិ។

ឥធ បន, ភិក្ខវេ, ភិក្ខុនា វស្សាវាសោ បដិស្សុតោ ហោតិ បច្ឆិមិកាយ។ សោ តំ អាវាសំ គន្ត្វា ឧបោសថំ ករោតិ, បាដិបទេ វិហារំ ឧបេតិ, សេនាសនំ បញ្ញបេតិ, បានីយំ បរិភោជនីយំ ឧបដ្ឋាបេតិ, បរិវេណំ សម្មជ្ជតិ។ សោ សត្តាហំ អនាគតាយ កោមុទិយា ចាតុមាសិនិយា សករណីយោ បក្កមតិ។ អាគច្ឆេយ្យ វា សោ, ភិក្ខវេ, ភិក្ខុ តំ អាវាសំ ន វា អាគច្ឆេយ្យ, តស្ស, ភិក្ខវេ, ភិក្ខុនោ បច្ឆិមិកា ច បញ្ញាយតិ, បដិស្សវេ ច អនាបត្តីតិ។

បដិស្សវទុក្កដាបត្តិ និដ្ឋិតា។

វស្សូបនាយិកក្ខន្ធកោ តតិយោ។

១១៩. តស្សុទ្ទានំ

ឧបគន្តុំ កទា ចេវ, កតិ អន្តរាវស្ស ច;

ន ឥច្ឆន្តិ ច សញ្ចិច្ច, ឧក្កឌ្ឍិតុំ ឧបាសកោ។

គិលានោ មាតា ច បិតា, ភាតា ច អថ ញាតកោ;

ភិក្ខុគតិកោ វិហារោ, វាឡា ចាបិ សរីសបា។

ចោរោ ចេវ បិសាចា ច, ទឌ្ឍា តទុភយេន ច;

វូឡ្ហោទកេន វុដ្ឋាសិ, ពហុតរា ច ទាយកា។

លូខប្បណីតសប្បាយ, ភេសជ្ជុបដ្ឋកេន ច;

ឥត្ថី វេសី កុមារី ច, បណ្ឌកោ ញាតកេន ច។

រាជា ចោរា ធុត្តា និធិ, ភេទអដ្ឋវិធេន ភេទា អដ្ឋវិធេន (សី. ស្យា.) ច;

វជសត្ថា ច នាវា ច, សុសិរេ វិដភិយា ច។

អជ្ឈោកាសេ វស្សាវាសោ, អសេនាសនិកេន ច;

ឆវកុដិកា ឆត្តេ ច, ចាដិយា ច ឧបេន្តិ តេ។

កតិកា បដិស្សុណិត្វា, ពហិទ្ធា ច ឧបោសថា;

បុរិមិកា បច្ឆិមិកា, យថាញាយេន យោជយេ។

អករណី បក្កមតិ, សករណី តថេវ ច;

ទ្វីហតីហា ច បុន ច ទ្វីហតីហំ វសិត្វាន (សី.), សត្តាហករណីយេន ច។

សត្តាហនាគតា ចេវ, អាគច្ឆេយ្យ ន ឯយ្យ វា;

វត្ថុទ្ទានេ អន្តរិកា, តន្តិមគ្គំ និសាមយេតិ។

ឥមម្ហិ ខន្ធកេ វត្ថូនិ ទ្វេបណ្ណាស។

វស្សូបនាយិកក្ខន្ធកោ និដ្ឋិតោ។